Neyana ngà ta La Ceiba, Honduras. Sakan i burido ta lima nga mawwaragi anna tattadday ku laman nga lalaki. Sakan laman gapa i umal ta familia mi. Delikadu nga lugar i paddianan na familia mi anna poppobre kami. Ngem mas nazziga kami turi ta natay si yamà megafu ta tadday nga aksidente ta pattrabahuanna turi ta appa i dagukku.

 Kingngua na yenà i adde na mawayyana tapenu iyawa i pakawagammi na manang ku ira. Ngem kurang i kuartuna tapenu makagatang tu sinnukku. Yayya nga nu magurang, malammingan ngà megafu ta kurang i sinnukku.

 Turi ta ziminakal ngà, nagigiammù i Honduras Sign Language (LESHO) yayya nga makibbidà i tanakuan ira nga umal. Ngem ari nga ammu na yenà anna na manang ku ira i LESHO, anna makkumpas laman ira anna usadda i pinadda-paddeda nga senias tapenu makibbidadà. Ngem megafu ta iddeddunà na yenà, pinrotektannà ta peligro ira. Maski nu baddi laman nga senias i ammuna, sinudduannà nga ari nga massigariliu anna magillellaw. Pia ngana laman ta kingnguana yatun ta ziminakal ngà nga awan tu bisiù.

 Ta kabbikku, kanayunnà nga ivulu na yenà ta simbahan na Katoliko ngem awan tu mantindiakku megafu ta awan mabba tu manginterpret tatun para nio ta sign language. Nawanan ngà tu ganas yayya nga ari ngà ngana makimisa turi ta mafulu i dagukku. Ngem kayà ku lagapa nga mas aru paga nakuan i mammuakku meyannung ta Dios.

 Turi ta 1999 anna 23 ngana i dagukku, nakilalà i tadday nga babay nga naggafu ta United States, miembro yayya na evangelical church. Sinudduannà meyannung ta Biblia anna nu kunnasi i ma-American Sign Language (ASL). Kakayà ku i nagigiammù meyannung ta Biblia yayya nga nadesisiokku nga mabbalin ngà tu pastor. Megafu tatun, nagali ngà ta Puerto Rico tapenu magatende ta tadday nga Christian training center para ta umal ira. Ta panolì ta La Ceiba ta 2002, namataddag ngà tu simbahan para ta umal ira ta uffun na kokkofukku. Tadday si Patricia tatun nga kokkofukku anna yayya i nabbalin tu atawà.

 Megafu ta sakan i pastor na simbahammi, usakku i LESHO nu mammisa ngà. Ipasingakku gapa nira i letratu na istoria ira ta Biblia anna idemonstrà yatun tapenu mas malippawa na umal ira. Bisitakku gapa i umal ira nga aranni ta lugar mi tapenu pagaramman ira anna uffunan ta problemada. Nabbalin ngà paga lagu nga misionero ta United States anna ta Zambia. Ngem ta kakuruganna, awan tu kuruga ammù ta Biblia. Ipakolì laman nira nu anni i nakagi nio, anna nu anni i nalippawa ku ta letratu ira. Ngem napakaru i pakkiavu ku.

 Mittan, nichi-chismisnà na karuan nga miembro na simbahammi. Kinagida nga minaggillellaw ngà anna namabay ngà. Megafu tatun, nadismaya ngà anna napporay. Ari nabbayag, pinanawammi ni Patricia yatun nga simbahan.

 Maruddu nga mappasiar ta balemi ni Patricia i Saksi ira. Ngem ariammi ira vuluvuga nga ginigginna. Turi ta pinanawammi i simbahammi, minanugu si Patricia nga maki-Bible study ta magatawa nga Saksi nga si Thomas anna Liccy. Nakaddag ngà ta ammuda i ma-sign language maski nu ari mabba ira nga umal. Yatutta ari nabbayag, nevulu ngà ta pagistudy ni Patricia.

 Nab-Bible study kami ta piga nga vulan gukaban na video ira ta ASL. Ngem turi ta inakusan na kokkofukku i Saksi ira nga tolay laman i tuttuladda, nagimmang kami nga naggigiammu tu Biblia. Maski nu nangipasingan si Thomas tu ebidensia ira nga ari nga tumuttul ta tolay nga lider i Saksi ira, ari ngà nga nangurug nisa.

 Piga nga vulan i nappasa, neparubang si Patricia ta depresion. Megafu tatun, nakimallo yayya ta Dios nga bisitan uli yayya na Saksi ira. Ari nabbayag binisita yayya na karrubana nga tadday nga Saksi ni Jehova anna kinagina nga ikagina kani Liccy nga mabbisita ta nisa. Nipasingan ni Liccy nga kurug yayya nga kofun. Linigguan nga bisitanna si Patricia tapenu pasikannan yayya anna tudduan ta Biblia. Ngem maski kunnari, paddudakku lagapa i Saksi ira.

 Ta 2012, nakipartisipa i Saksi ira ni Jehova ta espesial nga kampania ta pangitaneg ta LESHO nga video na Would You Like to Know the Truth? Niddan kami ni Liccy tu kopia natun nga video. Turi ta ginirò yatun, nakaddag ngà ta aru ta doktrina nga dati nga ituttuddù gitta na umafa-afi nga infiernu anna imortal nga kararua ay ari nga malegan ta Biblia.

 Ta tumunug nga ligguan, minay ngà ta Kingdom Hall na Saksi ira ni Jehova tapenu kibbidan si Thomas. Kinagì nisa nga kayà ku nga tudduan i umal ira meyannung ta kinakurug ta Biblia, ngem ari bilang tadday nga Saksi ni Jehova. Planò i mappataddag tu bagu anna nesina nga simbahan para ta umal ira. Megafu tatun, kinomendannà ni Thomas ta lallappo ku ngem nipasinganna niakan i nakagi ta Efeso 4:5 nga mawag i pattaradday ta unag na kurug nga kongregasion Cristiano.

 Niddannà gapa ni Thomas tu ASL nga video na Jehovah’s Witnesses—Faith in Action, Part 1: Out of Darkness. Nipasingan naw nga video i grupo na lallaki nga ginigiammuda tu mapia i Biblia tapenu malippawada i kinakurug meyannung ta primeru ira nga doktrina. Durante nga girawakku yaw nga video natageno ku i mataga-tageno naw nga lallaki. Ala-alegakku gapa i kinakurug gittada. Nakumbinsi ngà naw nga video nga ituttuddu na Saksi ira i kinakurug megafu ta ibaseda laman ta Biblia i ituttudduda. Yatutta nappa-Bible study ngà uli anna turi ta 2014, nappabawtiso kami ni Patricia bilang Saksi ni Jehova.

 Kakayà ku i kongregasion na Saksi ira ni Jehova megafu ta marenu ira nu kunnasi nga i Dios ay marenu. Marespeto i paguvovugda anna masippo i pattratuda ta tanakuan. Memammo ira anna makkapaga-pagaram. Mattaradday i Saksi ira anna para-parehu laman nga kinakurug ta Biblia i ituttuddu na ngamin maski nu anni i lengguaheda onu i nasion nga naggafuadda.

 Kakayà ku i magiggigiammù ta Biblia. Angngariganna, nammuakku nga si Jehova i Makapangngua-sa-ngamin nga Dios anna i Soberano ta interu mundo. Parehu nga iddukanna danuri ari makaginna anna danuri makaginna. Tagibalorakku i pangaya na Dios nio. Nammuakku gapa nga mabbalin noka nga makakkasta nga paraiso i interu nga davvun anna egga i tiansà nga mattolay tu mannanayun nu sitaw perfekto i gawa-gawayyakku. Kakayà ku ngana nga mesimmu ngamin yatun!

 Kakayà mi ni Patricia nga ituddu ta umal ira i meyannung ta Biblia. Bible study mi ngana sangawe i karuan ta miembro na dati nga simbahammi. Ngem ari tu gitta na turi ta pastor ngà paga, awan ngana tu pakkiavu ku sangawe meyannung ta ituttuddù. Natabbag gabbalaman i pakkiavu ku ira turi ta nakipaggigiammu ngà tu Biblia ta Saksi ira ni Jehova.