Mammammaneho si Bob tu mga 100 kilometro kada oras ta tiempo nga malamming anna mappadda-paddag ta Alberta, Canada. Mga lima kilometro paga i karayyuna ta balay turi ta gavva nga simmabug i zimigi nga piligna ta likug. Ta ollu, ari nga ammu ni Bob i nesimmu yatutta tulu-tuloy laman yayya.

 Ta tadday nga tura nga nipatulug ni Bob ta Kingdom Hall na Saksi ira ni Jehova tari, niyistoriana i nesimmu. “Egga i lima nga kabataan nga agga-takay ta kotse i timmagarug ta biko na takè anna vinukatadda i bentada,” niturana. “Kinagida nga flat i pilig ku yatutta nagimmakkami anna kinagida nga talianadda yatun. Ariakku paga lagu ammu nu egga i reserbà nga pilig onu jack. Durante nga agga-itubang ngà ta wheelchair ku ta aggig na dalan, minay ira ta gukag na van, inada i reserbà nga pilig anna i jack tapus tinalianadda i pilig. Mayyeyelo tagga anna kitassikan i paddag. Agga-longsleeves paga lagu ira ngem kingnguada yari tapenu laman makalabbe ngà. Kakku nakua yari nu awan ira.

 “Mappabalo nga ta lima nga kabataan nga Saksi nga nanguffun nio. Egga ira tari tatun nga aggaw tapenu mallayyagayya. Kurug nga kukukuadda nu anni i ituttudduda. Ariakku ammu i kuakku nu awan ira yatutta daka-dakal i appabalo ku. Sinni gare gapa i magabbo nga egga ira i abbing nga anghel ta dalan tatun nga aggaw?”