Si Marta ay tadday nga Saksi ni Jehova ta Guatemala. Giggigiammuan na i lengguahe nga Kekchi tapenu mebillay na i mensahe na Biblia ta totolay nga maguvovug tu kunnatun. Mittan, nasingan na i tadday nga lalaki nga manaw ta hospital. Ta itchura natun nga lalaki, nanono ni Marta nga Kekchi i paguvovug na anna maddian yayya ta tadday nga bario ta vuku-vukig nga bihira laman nga malayyagayyan na Saksi ira ni Jehova. Inarannian na i lalaki tapus inusa na i baddi ira nga Kekchi nga uvovug nga ammu na.

 Inoferan ni Marta i lalaki tu Bible study. Magayayya nga inalawa na yatun, ngem kinagi na kani Marta nga awan tu pappaga na. Niyesplika ni Marta ta nisa nga libre laman i iyofer na Saksi ira ni Jehova tu Bible study. Kinagi na paga nisa nga awayya da i mab-Bible study ta cellphone anna puede gapa nga mevulu ta pab-Bible study i interu nga familia na. Minanugu yatun nga lalaki. Maka-uvovug anna makabibbig tu Spanish i lalaki, yatutta niddan yayya ni Marta tu Spanish nga New World Translation of the Holy Scriptures. Niddan na gapa yayya tu Anni Talaga i Ituttuddu na Biblia? ta lengguahe na Kekchi tapenu usadda ta paggigiammu. Ta tumunug nga ligguan, nigafu ni Marta nga i-Bible study yatun nga lalaki kavulu i atawa na anna i dua tu ána da gukaban na cellphone. Mamiddua ira nga mab-Bible study kada ligguan. Kagian ni Marta: “Megafu ta ariakku kuruga antigu i ma-Kekchi, Spanish i usammi ta paggigiammu anna i-translate natun nga lalaki ta atawa na i paguruvovugammi. Mantindian na ána da i Spanish.”

 Tadday nga pastor ta simbahadda yatun nga lalaki. Nituddu na gapa ta miembro ira na simbahan na i magiggigiammu na ta pab-Bible study. Nagustuadda i naginna da ta nisa yayya nga niyavu da nu sitaw na nga nagigiammu danatun nga bagu nga tuddu. Niyistoria na nira i meyannung ta pab-Bible study na tapus nevulu ira ta nisa. Ari nabbayag, ma-15 ngana nga totolay i maggarammammung kada ligguan tapenu mevulu ta pab-Bible study ni Marta gukaban na cellphone. Tapus nangipay ira tu tadday nga microphone aranni ta cellphone tapenu maginna da yatun ngamin.

 Inistoria ni Marta ta elder ira ta kongregasion na i meyannung tatun nga pab-Bible study. Tapus tadday ta elder ira i nabbisita ta bario danatun nga Bible study. Inimbita na ira nga magatende ta tadday nga palappa ta publiko. Mappalappa gare i manangngal ta sirkito a ta tadday nga bario. Ngem mawag tu mattakay ira tu tangoras tapus lumakag ira tu dua paga nga oras tapenu makadde tari. Nakayatan yatun na Bible study ira anna 17 nira i naka-atende.

 Nappasa i piga ligguan, appa-ta-aggaw nga nakikavulu i manangngal ta sirkito anna i karuan paga nga Saksi tatun ira nga Bible study. Nu umma, maggiraw ira tu nebase-Biblia ira nga video ta jw.org ta Kekchi. Tapus gigiammuadda gapa i brosiur nga Sinni i Magaggangngua tu Uray ni Jehova ta Maddaggun? Nu fugag gapa, maggiraw ira tu video ira nga JW Broadcasting. Niyunnug paga na manangngal ta sirkito nga egga lagapa i mab-Bible study ta kada tadday ta nira.

 Tatun nga appa nga aggaw, nallayyagayya gapa i Saksi ira ta kabiko ira nga bario nga maguvovug gapa tu Kekchi. Inimbita da i totolay nga magatende ta tadday nga espesial nga paggarammammung. Tatun nga paggarammammung, 47 i nagatende. Tapus niyofer na wawwaragi ta kada tadday nira nga mab-Bible study ira. Onse nga familia i nangalawa tatun.

 Nappasa i piga vulan, niyunnug na elder ira nga mapeggan tu study kada weekend tari ta ollu nga bario nga inangngayadda. Ta maddaggun, maggi 40 i regular nga makistudy. Tapus turi ta sinelebra na wawwaragi i Memorial na patay ni Jesus tatun, nagayayya ira ta 91 i nagatende.

 Nu meraddamman ni Marta nu kunnasi namegafu yatun nga ekspiriensa anna nu anni ira i nesimmu, kunnaw i kagian na: “Mabbala-balo ngà kani Jehova ta nu mittan, matageno ku nga awan kuruga tu makuà. Ngem awayya ittam usan na Dios tapenu uffunan i totolay. Nabibbig na i mayan na giffutuan danari na maguvovug tu Kekchi anna niyaranni na ira ta totolena. Iddeddu ira ni Jehova.”