Maddaggun nga mangi-Bible study si Eliso, tadday nga babay nga Saksi ni Jehova ta balay na interesadu nga babay, tapus egga i zimittal nga bisita nga ariadda inekspekta. Egga ta puerta i tadday nga pari kavulu i atawana. Nakannammuan ni Eliso nga nikanni laman natay i itatana nga ana naw nga magatawa.

 Turi ta kinagi ni Eliso nga makiparraddam yayya, fermi i tangi na pari anna na atawana. Tapus makaporay nga kinagi na pari: “Kakku vuluvuga matindian nu ngatta pinuruebannà na Dios ta kunnaw! Ngatta inana i tattadday nga ana ku? Bente-otcho ragun ngà ngana nga massesserbi ta Dios. Napakaru i kingnguà tu kinapia, tapus kunnaw i ibala-balona nio! Ngatta pinatay na Dios i ana ku?”

 Niyesplika ni Eliso ta magatawa nga ari nga ina na Dios i anada. Nipakanawagna gapa nira i meyannung ta tavvu, paginnolay, anna i rason ira nu ngatta ipamavulun na Dios nga mesimmu i marake nga ganna-gannug. Kinagi na pari anna na atawana nga i nipakanawag ni Eliso i tabbag ira ta ipaka-pakimalloda.

 Ta tumunug nga ligguan, nanoli i pari anna i atawana tapus nakisali ira ta pab-Bible study nari na babay. Maddaggun nga gigiammuan da Eliso i kapitulo nga “Iddanama Para ta Natay nga Ideddukammu” ta libru nga Anni Talaga i Ituttuddu na Biblia? Magayayya nga nakkomento i magatawa ta pab-Bible study.

 Turi kua, nagatende i magatawa ta espesial nga kombension na Saksi ira ni Jehova ta Tbilisi, Georgia. Nagustuadda i nasingadda nga aya anna pattaradday, kualidad ira nga nabayag ngana nga ituttudduda ta miembro ira na kapilyada, ngem ariadda nagigiammu nga ipasingan danatun.