Aru nga totolay maggafu ta nadduruma nga tribu, lengguahe, anna nasion i maddian ta vuku-vukig na Amazon ta South America. Ararayyu ira ta matannug nga siudad nu sitaw napakaru i totolay. Yayya nga tagga ta Hulio 2017, 13 nga Saksi ni Jehova i nabbiahe ta Maroni River anna ta sakup natun ira nga lugar ta zigattu na French Guiana. Anni i gakkagda? Ipakannammu ta totolay nga maddian aranni ta bannag i mensahe na Biblia nga mangiyawa tu iddanama.

 Tanga-vulan nige na 12-aggaw nga pabbiahe, nammiriting i ngamin tapenu mapplano. Neraddamman ni Winsley: “Nannammuammi i meyannung ta lugar anna i historia natun anna naguruvovugammi gapa nu kunnasi nga iprepara i baggi mi para ta pabbiahe.” Egga i vulu-vulu na kada tadday tu aggipayyan nu sitaw ipena i doyang anna i muskateru tapenu ari nga mabasa. Namiddua ira nga nageroplano anna aru oras ira nga nabbiahe gukaban na baraddi nga barangay.

 Anni i matageno danuri na nembitan tatun? Insigida nga inalawa da Claude anni Lisette yatun nga imbitasion. Parefu ngana ira nga retiradu. Kunni Claude: “Sobra i ayayya ku ngem mediu maganassing ngà. Aru ngana nga istoria i naginnà meyannung ta delikadu anna masiki-sikan nga agi tatun nga lugar.” Tanakuan gapa i pakavurungan ni Lisette: “Problemakku nu maka-uvovug ngà kari tu Amerindian ira nga lengguahe,” kunna.

 Kunnatun gapa i matageno ni Mickaël. “Ariammi kuruga ammu i meyannung ta tribu nga Wayana,” kunna, “yayya nga nar-research ngà ta Internet tapenu magigiammù i karuan nga uvovug anna tapenu makapaddios ngà ta totolay ta lengguaheda.”

 Nabbiahe gapa si Shirley anna i atawana nga si Johann mappange tari. Nilista ni Shirley i lengguahe ira na totolay nga maddian ta biko na bannag. “Nad-download kami tu video ira ta jw.org natun ira nga lengguahe anna giminatakkami tu libru tapenu magigiammu mi i maguvovug tu Wayana,” kunna.

 Tagga ta Martes, Hulio 4, nageroplano i grupo ta Saint-Laurent du Maroni mappange ta Maripasoula, tadday nga baddi anna unu-unag nga ili ta French Guiana.

 Ta tumunug nga appa nga aggaw, nilayyagayyan na grupo danuri maddian ta babario aranni ta weg ira na Maroni. Nattakay ira ta de-motor ira nga barangay nga magalan tu pirogues. “Nammuammi nga kuruga interesadu i Amerindian ira ta Biblia,” kagian na tadday nira nga si Roland. “Aru i pakkiavuda anna kayà na karuan nga i-Bible study mi ira.”

 Ta tadday nga bario, nasimmuan da Johann anni Shirley i tadday nga mabbing nga magatawa. Egga i kaparientesda nga nikanni laman nga nappakamatay. Kunni Johann: “Nipagiromi nira i video nga Nakilala ng Isang Katutubong Amerikano ang Kaniyang Maylalang,” ta JW Broadcasting^®. “Talaga nagustuan na mabbing nga magatawa yatun nga video. Niyawada nikami i e-mail address-da megafu ta kayàda nga metuloy i paguvovug mi.”

 I Antécume Pata i karayyuan nga nadde na grupo. Tatun nga bario, pinamavulunan na panakalladda i nababbannag ira nga Saksi nga ibesing i doyadda ta publiko nga lugar. Nazzigu gapa ira ta bannag kagitta na kukukuan na taga-tari ira.

 Tapus nagali i grupo ta bario na Twenké nu sitaw nadanganadda i totolay tatun nga maraddam megafu ta patay na iddeddukan. Kagian ni Éric nga tadday ta nangorganisa ta grupo: “Pinamavulunan nakami na panakallan na tribu nga magalan tu ‘Grand Man’ nga layyagayyan i totolay ta bario tapenu banna-bannayan danuri natayan. Nagustuan na panakallan anna na familiana i teksto ira nga binibbig mi nira ta Wayana nga Biblia. Nipagiromi gapa nira i video ira nga mangipasingan ta promesa na Biblia nga paginnolay.”

 Maggafu ta Maripasoula, nageroplano i grupo tu gaddua oras mappange ta baddi nga ili na Grand-Santi. Ta Martes anna Mierkules, nibillay na grupo i mensahe na Biblia ta taga-tari ira. Ta Huebes, nabbarangay mangana i Saksi ira tu lima-oras-gaddua ta Maroni River mappange ta ili na Apatou.

 Ta tumunug nga aggaw adde ta ultimu nga aggaw na pabbiahe na grupo, binisitada i Maroon ira nga maddian ta bario ira ta vukig. Gaka-gaka ira na aripan ira nga Afrikano nga neyangay ta South America ta tiempo nu kanni nga kolonia paga i Suriname nga kabiko nga nasion. Inimbita na Saksi ira i ngamin tapenu magatende ta study ta vukig. Nangipataddag ira tu dakal nga tolda para tatun nga paggarammammung. Kunni Claude: “Nagaya-ayayya kami megafu ta napakaru i minay. Ta umma mi laman ira nga inimbita!” Si Karsten nga ollolluna pagalaman nga mevulu ta pabbiahe tatun nga unu-unag nga parte na French Guiana i nappalappa ta Aukan. Nateman yatun tu “Kunnaw Ngana Laman Kari i Pattolay?” Egga i 91 nga nagatende maggafu ta nadduruma nga bario.

 Nakatoli gabbalaman i grupo ta Saint-Laurent du Maroni. Grabe i ayayya na ngamin megafu ta positibo nga reaksion na taga-tari ira. Inalawa na totolay i napakaru nga publikasion anna giniroda i napakaru nga video nga nipublisa na Saksi ira ni Jehova.

 “Talaga kitassaya ta nevulu ngà taw nga pabbiahe,” kunni Lisette. Umanugu gapa tatun si Cindy nga nakkagi: “Nu mawayyà uli kuan yatun, ipepakimallo ku nga magalan ngà nakuan. Mawag tu maekspiriensam yatun tapenu matindiammu nu kunnasi kasaya yatun!”

 Megafu ta naekspiriensa na wawwaragi, kayàda ngana uli i manoli. “Kayà mi uli nga kuan yatun!” kunni Mickaël. Nagali ngana gapa sangawe si Winsley ta Saint-Laurent du Maroni. Dinesision gapa da Claude anni Lisette nga parehu nga ma-60 ngana i dagudda nga magali ngana ta Apatou.