Taga-North Carolina, U.S.A. si Bryn anna miembro yayya na Hospital Liaison Committee ta diadda. Maki-coordinate ira ta hospital ira tapenu matangngallan i pakawagan na pasiente ira nga Saksi ni Jehova.

 Megafu ta COVID-19 pandemic, ari nga mappatallung tu bisita i aru nga hospital. Tinawagan ni Bryn i hospital ta diadda tapenu kibbidan yari i director nga mangiyunnug nu kunnasi nga malawa na pasiente ira anna na familia da i uffun na kapangngurug da. Kayà na gare nga ammuan nu kunnasi na nga mabanna-bannayan danuri pasiente nga kaparefu na tu Saksi.

 Nakibbida ni Bryn i assistant na director. Megafu ta ari nga mappatallung i hospital, niyavu ni Bryn nu puede nga meyawa i phone number na tari ira ta pasiente nga Saksi tapenu makibbida na ira. Minanugu tatun i assistant na director.

 Tapus nanono ni Bryn danuri mattrabahu ta hospital. Kinagi na ta assistant nga appresian na i kukukuan danuri na mattrabahu ta hospital anna paray nakuan tu makasta i gawa-gawayyadda. Kinagi gapa ni Bryn nga nabibbig na nga grabe i stress na totolay megafu ta pandemic mas ngana danuri mattrabahu ta hospital.

 Simibbag i assistant anna kinagi na nga kurug tu grabe i stress sangawe nari na mattrabahu ira ta hospital megafu ta COVID-19.

 Yayya nga kinagi ni Bryn: “Egga ira i informasion ta website mi nga makoffun ta totolay nu kunnasi da nga arubangan i stress. Nu umay ka ta jw.org tapus i-type mu i ‘stress’ tari ta Search box, makaleg ka tu artikulo ira nga makoffun ta staff nu.”

 Maddaggun pagalaman ira nga mabbida, minay ngana insigida i assistant tari ta website. Ni-type na i “stress” tari ta Search box tapus nappasingan yari ira i ne-feature nga artikulo. Kinagi na: “Wow! Ipasingakku yaw ta director. Makoffun yaw ta staff mi anna ta karuan paga. Mangi-print ngà tu kopia ira naw tapus itaneg ku ta nira.”

 Nappasa i piga ligguan, nakibbida ni Bryn i director. Kinagi natun ta nisa nga inangngayadda yari website tapus nangi-print ira tu kopia na artikulo ira meyannung ta stress anna related paga ira nga topiko. Niyawa da yatun ta nars ira anna ta karuan paga nga mattrabahu ta hospital.

 Kinagi ni Bryn: “Nappabalo i director ta nio ta kukukuattam anna ta makakkasta ira nga artikulo. Kinagi na nga daka-dakal nga uffun yatun ta nira.”