Ariammi arayyuan danuri nabawtisowan nga Saksi ni Jehova ngem ari nga mallayyagayya ta tanakuan, onu danuri ari ngana nga makikavulu ta kapangngurugmi. Ta kakuruganna, uffunammi ira tapenu metoli i interesda ta espiritual.

 Ariammi insigida nga i-disfellowship i tadday nga nakaliwa tu madammo. Ngem, nu i tadday nga nabawtisowan nga Saksi ay kanayun nga arianna tuppalan i moral nga estandarte na Biblia anna ari mabbabawi, marayyuan yaya onu madisfellowship. Manawag i kinagi na Biblia: “Papanawan nu i marakay nga tolay ta grupo nu.”—1 Corinto 5:13.

 Kunnasi gafu nu tadday nga lalaki ay nadisfellowship ngem Saksi lagapa i atawana anna ánana? Nanguli ngana i relasionna ta espiritual ta familiana, ngem kafamiliana lagapa ira. Ari mawawan i aya anna pakilalladda ta kataggi-tadday bilang familia.

 Awayya gapa magatende danuri nadisfellowship ta study-mi ira. Nu kayàda, awayyada gapa makalawa tu espiritual nga tabarang ta elder ira ta kongregasion. I gakkagna ay tapenu uffunan i kada indibidual nga mabbalin tu kualipikadu mangana nga Saksi ni Jehova. Malawa mangana nga miembro na kongregasion danuri nadisfellowship ira nga nilikuradda i ari mepangngo ira nga kondukta anna nangipasingan tu napafutuan nga pakkaraga nga mattolay segun ta estandarte na Biblia.