Paguyuan na aya ta Dios anna ta kasittoleda i Saksi ira ni Jehova tapenu magayayya nga ikagi i mensahe na Biblia ta ngamin nga totolay, nelavu danuri i nakkagi nga “Ari ngà interesadu.” (Mateo 22:37-39) Aya ta Dios i mamaguyu ta nikami nga tuttulan i bilin na Ana na nga mangiyawa tu ‘pamakurug ta totolay.’ (Kingngua 10:42; 1 Juan 5:3) Tapenu makua yaw, ari mi laman nga ikagi i mensahe na Dios tu mittan, kagitta na kingngua na profeta ira na Dios tagga. (Jeremias 25:4) Megafu ta iddukammi i kasittolemi, ikagumammi nga ikagi i makepaliag inango nga ‘mapia nga dumug na Pappatulan’ ta ngamin, maski danuri ari interesadu ta gafu.​—Mateo 24:14.

 Maruddu nga makaleg kami tu interesadu nu manoli kami ta babalay nga awan tagga tu interesadu. Ikonsidera i tallu nga rason:

•   Magali tu paddianan i totolay.

•   Mangipasingan tu interes ta mensahe mi i tanakuan nga tolay tatun nga balay.

•   Manguli i totolay. Awayya na nga mabbalin tu “sigga-nono ta espiritual nga kawagadda” anna maginteres ta mensahe na Biblia i totolay megafu ta mesimmu ira ta mundo onu ta personal nga pattolay da. (Mateo 5:3, NW ) Awayya na gapa nga manguli maski danuri i mangokkontra, kagitta ni apostol Pablo.​—1 Timoteo 1:13.

 Ngem ariammi nga fuersan i maski sinni nga ginnan i mensahe mi. (1 Pedro 3:15) Irespeto mi i lallaguray na kada tadday nga pilian nu anni i kayà da nga paddayawan.​—Deuteronomio 30:19, 20.