Ari kami nga masselebra tu birthday gafu ta kurugammi nga ikalussaw na Dios i kunnatun nga selebrasion. Ari nga direkta nga igamma na Biblia i passelebra tu birthday. Ngem makoffun i Biblia tapenu malippawa tam i importante ira nga detalye meyannung taw nga selebrasion anna i pagimamma na Dios taw. Innattam i appa nga detalye ira anna i prinsipio ira na Biblia meyannung taw.

1.   Naggafu ta pagano i passelebra tu birthday. Segun ta Funk & Wagnalls Standard Dictionary of Folklore, Mythology, and Legend, naggafu danaw nga selebrasion ta pangurug nga ta birthday na tadday nga tolay, “egga i chansa na marake nga espiritu anna marake nga influwensia nga takitan i mab-birthday” anna “mabbalin tu proteksion i kegga na kokkofunna anna i pag-greet da nisa.” Kagian na libru nga The Lore of Birthdays nga ta ollu nga tiempo, i rekord ira na birthday ay “kawagan ta pagangngua tu horoscope” base ta “siensia na astrolohiya.” Segun paga taw nga libru, “kurugan na totolay tagga nga egga i magic na kandela ira ta birthday nga mangiyawa ta ikikkiddaw” na mab-birthday.

    Ngem igamma na Biblia i magic, pallavvun, espiritismo, onu “maski anni nga kagitta naw.” (Deuteronomio 18:14; Galacia 5:19-21) Kakuruganna, i tadday nga rason nu ngatta sinentensian na Dios i totolay nga maddian ta siudad na Babilonia tagga ay megafu ta kukukuadda nga astrolohiya, nga tadday nga klase na pallavvun. (Isaias 47:11-15) Ari nga nakafokus i Saksi ira ni Jehova ta naggafuan na kada kostumbre; ngem nu egga i manawag nga instruksion maggafu ta Biblia, siguraduammi nga matuttulmi yatun.

2.   Ari nga nasselebra tu birthday i ollu ira nga Cristiano. Kagian na The World Book Encyclopedia nga “nikonsiderada [na ollu ira nga Cristiano] nga pagano nga kostumbre i passelebra ta kaggawan na nikeyana na maski sinni.” Ipasingan na Biblia nga i apostol ira anna i karuan ira nga sinudduan mismu ni Jesus ay nangibattang tu ehemplo nga mawag tu parigan na ngamin nga Cristiano.​—2 Tesalonica 3:6.

3.   I patay laman ni Jesus i nebilin ta Cristiano ira nga mawag tu iselebrada, ari tu i keyanana. (Lucas 22:17-20) Ari nga kakkadda-kaddag yaw megafu ta kagian na Biblia nga “i aggaw na patay ay mas makasta anne ta aggaw na nikeyana.” (Eclesiastes 7:1) Ta urian na pattolay ni Jesus ta davvun, nakangngua yayya tu makasta nga ngagan ta arubang na Dios, yayya nga mas importante i aggaw na patay ni Jesus anne ta aggaw na nikeyanana.​—Hebreo 1:4.

4.   Awan vuluvuga tu mabibbig ta Biblia nga aripan na Dios nga nasselebra tu birthday. Ari laman tu basta nakattaman yaw megafu ta egga i dua nga nerekord ta Biblia nga ari tu aripan na Dios nga nasselebra tu birthday. Ngem parehu nga marake i nesimmu tatun nga selebrasion.​—Genesis 40:20-22; Marcos 6:21-29.

 Kagitta na minaggiddu ira nga magana, ipatageno na Saksi ira i ayada ta ánada ta ngamin nga tiempo gukaban na parregalu nira anna gukaban na makapagayayya ira nga okasion. Ikagumadda nga parigan i ehemplo na Dios nga kanayun nga mangiyayawa tu mapia ira nga gannug ta ánana. (Mateo 7:11) Ipasingan danaw nga komento nga ari tu matageno na ána na Saksi ira nga neyetukan ira:

•   “Mas masaya i makalawa tu regalu nu ariammu nga ekspektan yatun.”​—Tammy, 12 anios.

•   “Awan tu regalù nu birthday ku, ngem regaluaddà na magana ku maski nu ariakku nga birthday. Kakayà ku yatun ta masorpresa ngà.”​—Gregory, 11 anios.

•   “Party ngana kari niko i piga minuto, tapus egga i cupcake ira, anna tadday nga kansion? Umeka ta balemi tapenu masingammu i kurug nga party!”​—Eric, 6 anios.