Namegafu i moderno-aggaw nga organisasion na Saksi ira ni Jehova turi ta pangultimo na meka-19 siglo. Tatun nga tiempo, nigafu na baddi nga grupo na estudiante ira na Biblia nga maddian aranni ta Pittsburgh, Pennsylvania ta United States i sistematiko nga paggigiammu ta Biblia. Nikumparada i doktrina ira nga ituttuddu na relihion ira ta nu anni talaga i ituttuddu na Biblia. Nipublisada i nagigiammuda ira ta libru, diario, anna ta magazina nga magalan ta maddaggun tu Passifusifutan—Mangipakannammu ta Pappatulan ni Jehova.

 Tadday tatun nga grupo na sinsero ira nga estudiante na Biblia si Charles Taze Russell. Maski yaya i nangiyorollu ta trabahu nga edukasion ta Biblia tatun nga tiempo anna ollu nga editor na The Watchtower, ari tu yaya i founder na bagu nga relihion. I gakkag ni Russell anna na tanakuan nga Estudiante ira na Biblia, nga dati ngagan natun nga grupo, ay iyammammu i tuttuddu ni Jesu-Cristo anna tuttulan i kukukuan na ollu-siglo ira nga Cristiano. Megafu ta si Jesus i Founder na Cristianismo, imammatammi yaya bilang i founder na organisasiommi.—Colosas 1:18-20.