Mangusa i Saksi ira ni Jehova tu nadduruma nga transleysion ta paggigiammu da tu Biblia. Ngem ta lengguahe nga available i New World Translation of the Holy Scriptures, mas kakayà mi nga usan yatun megafu ta meyusa i ngagan na Dios, fustu anna manawag i naddian na.

•   Neyusa i ngagan na Dios. Ari nga nidayaw na karuan nga nangipublisa ta Biblia i Autor na. Angngarigan na, ta tadday nga transleysion na Biblia, nelista i maturu tu 70 nga totolay nga nanguffun ta pagangngua tatun. Ngem awan vuluvuga tatun nga Biblia i ngagan na Autor na, si Jehova nga Dios!

   Ngem ta New World Translation, netoli i ngagan na Dios tu rinivu nu sitaw mabibbig yatun ta orihinal nga kopia na Biblia. Ari nga nappakilala i totolay nga nanguffun ta pagangngua tatun.

•   Fustu. Tanakuan i mensahe na karuan nga transleysion na Biblia ari tu kagitta na orihinal nga kopia ira. Angngarigan na ta tadday nga transleysion ta Mateo 7:​13, 14, kunnaw i kagian na: “Tullung kamu ta atazzi nga trangka. Ta i trangka nga mappange ta infiernu ay alawa, anna mapia i dalan nga mappange tari.” Ngem ta orihinal nga kopia neyusa i uvovug nga “kadaral,” ari tu “infiernu.” Awayya na nga niyusa na translator ira i uvovug nga “infiernu” megafu ta mangurug ira nga mannanayun nga maparigatan i marake ira ta umafa-afi nga infiernu. Ngem ari yatun nga suportan na Biblia. Ta New World Translation, kunnaw i fustu nga kagian na: “Tullung kamu ta atazzi nga trangka, megafu ta dakal i trangka anna alawa i dalan nga mappange ta kadaral.”

•   Manawag. I makasta nga transleysion ay ari laman nga fustu. Manawag gapa anna mabi laman nga malippawa. Angngarigan na ta Roma 12:11, niyusa na Cristiano nga si apostol Pablo i uvovug nga i literal nga kebalinan na ay “ta malluag nga espiritu.” Megafu ta ari malippawa yatun ta moderno nga English, netransleyt yatun nga teksto ta New World Translation nga mas mabi malippawa. Kinagi na nga i Cristiano ira ay mawag nga “mattalikarag . . . gukaban na espiritu.”

 Ta New World Translation neyusa i ngagan na Dios, fustu anna manawag i naddian na. Fuera paga tatun, nerumu-ruma yaw megafu ta metaneg nga awan tu paga na. Yatutta minillion ngana i makabibbig tu Biblia ta sarili da nga lengguahe maski danuri awan tu paggatang da tu Biblia.