Nebase ta Biblia i kuru-kurugammi, yari nga nu mas malippawa mi i Katurakan, uliammi i kurugammi. a

 Suportan na prinsipio ira na Biblia i kunnatun nga panguli kagitta na nakagi ta Proverbio 4:18: “I dalan na matunung ay kagitta na nawag ta umma, mannawag nga mannawag adde ta mattangnga-naggaw ngana.” Nu kunnasi nga ta pallattuag na bilag sisinu nga mannawag i pallevu, sisinu gapa nga ipalippawa na Dios i uvovug na ta kayà na nga tiempo. (1 Pedro 1:10-12) Kagitta na neprofesiya ta Biblia, palistuan na yaw nga proseso ta “tiempo na panuppalan.”​—Daniel 12:4.

 Yari ta ariammi nga makaddag onu mavuru-vurung nu egga ira panguli ta pakalippawa mi. Maski gapa i aripan ira tagga na Dios, egga ira i mali nga ideya anna ekspektadda nga mesimmu yari tu mawag nga uliadda i pakalippawa da.

•   Kayà ni Moises nga ipaliag i nasion na Israel 40 dagun nige paga na tiempo nga pinili na Dios.​—Kingngua 7:23-25, 30, 35.

•   Ari nalippawa na apostol ira i profesiya meyannung ta patay anna paginnolay na Mesias.​—Isaias 53:8-12; Mateo 16:21-23.

•   Mali i ideya na ollu ira nga Cristiano meyannung ta tiempo nga paddattal na “aggaw ni Jehova.”​—2 Tesalonica 2:1, 2, NW.

 Nitunung gabbalaman na Dios i mali nga pakalippawa da, anna ipakimallo mi nga tulu-tuloy gapa nga itunung na i pakalippawa mi.​—Santiago 1:5.