Kunnasi Masanay i Saksi ira ni Jehova ta Pamministerio?

I-PLAY

Tulu-tuloy nga masanay i Saksi ira ni Jehova ta ngamin nga aspeto na pattoleda bilang Cristiano, nelavu tatun i pamministerio. Nidob yaw ni Jesus nga trabahu ta tagatuttul na—i pallayyagayya anna panuddu meyannung ta mapia nga dumug na Pappatulan na Dios. (Mateo 24:14; 28:19, 20) Malawa mi yatun nga passanay ta linigguan nga study mi anna ta kombension anna asembli ira. Makalawa gapa tu kammungan nga passanay i Saksi ira ni Jehova nga egga ira i pribilehio da, ta kongregasion anna organisasion, ta nebase Biblia nga eskuela ira.

Taw nga artikulo

Anni nga passanay i malawa na Saksi ira ni Jehova?

Study ira ta kongregasion. Dua nga study kada ligguan i atendeyammi ta lugar nu sitaw kami maddayaw, magalan yatun tu Kingdom Hall. Makua i tadday nga study mi ta midweek; ta weekend gapa i tadday. Awayya na magatende na maski sinni anna awan tu mapagan.

Study ta Midweek. Masanay kami ta pabbibbig tu mapia, pakibbida, pappalappa, pallayyagayya, anna panuddu. Malawa mi i passanay gukaban na palappa, demonstrasion, video ira, anna topiko ira nga paguruvovugan. Moffunan kami naw nga passanay tapenu mas efektibo kami ta pangikagi mi ta mensahe na Biblia ta tanakuan anna ta pangikondukta mi tu Bible study ta interesadu ira. Mabenefisiowan i ngamin nga magatende taw nga passanay. Megafu taw nga study mas massikan i pangurug mi ta Dios anna i pangaya mi nisa anna ta wawwaragi ira.
Study ta Weekend. Egga i dua nga parte naw nga study, mamegafu yaw ta palappa nga neprepara para ta ari ira nga Saksi. Question and answer i mekadua nga parte na study nu sitaw mapaguruvovugan i artikulo na magigiammu nga edision na Passifusifutan. a Mapaguruvovugan i artikulo ira anna mepakanawag i topiko anna prinsipio ira ta Biblia nga makoffun ta ministerio anna ta inaggaw nga pattolay mi.

Asembli anna kombension ira. Kada ragun egga i tallu nga paggarammammung mi nga atendeyan na aru nga kongregasion. Nebase ta Biblia i tema naw ira nga kappagayayya nga okasion, egga ira i palappa, demonstrasion, interviu, anna video ira. Kagitta na study mi ta kongregasion, moffunan na kami na asembli anna kombension nga mas maponag i pakannammu mi ta Biblia anna mabbalikkami tu mas efektibo ta pallayyagayya anna pangituddu ta mapia nga dumug. Awayya na magatende i ngamin anna awan tu mapagan.

Nebase Biblia nga eskuela ira para ta Saksi ira ni Jehova

Nembitan i karuan nga Saksi ira ni Jehova ta nadduruma nga eskuela nga nebase ta Biblia tapenu masanay paga ira. Anni ira yaw nga eskuela? Anni i gakkag naw anna kunnasi i kanaddu na? Anna sinni i awayya na magatende?

Pioneer Service School

I gakkag na: Tapenu sanayan i ngamin-tiempo nga ministro nga magalan tu pioneer b nga mabbalin tu mas efektibo ta pallayyagayya anna panuddu nga trabahu. Nelavu taw nga klase i demonstrasion, palappa, workshop, anna topiko nga paguruvovugan.
I kanaddu na: Annam nga aggaw.
I magatende: Awayya na membitan nga magatende danuri tanga-ragun ngana nga pioneer. Awayya na gapa membitan uli nga magiskuela i nabayag ngana nga pioneer nga ari nagiskuela ta nappasa nga lima nga ragun.

School for Kingdom Evangelizers

I gakkag na: Tapenu iddan tu espesial nga passanay i ekspiriensadu ira nga ngamin-tiempo nga ministro. Mas nga mapakasta na estudiante ira i abilidad da ta pallayyagayya anna panuddu, anna monag nga gigiammuadda i topiko ira ta Biblia. Aru ta naggradua ira i membitan ta lugar nu sitaw kawagan i mas aru nga mallayyagayya.
I kanaddu na: Dua nga vulan.
I magatende: Awayya na magapply na pioneer ira nu nadde da i requirement ira anna nu mawayya da i masserbi ta lugar nga egga i pakawagan.

School for Congregation Elders

I gakkag na: Tapenu moffunan i elder c ira nga ituppal i responsibilidad da ta kongregasion, gitta na panuddu anna pas-shepherding anna tapenu mas maponag i pangaya da ta Dios anna ta wawwaragi.—1 Pedro 5:2, 3.
I kanaddu na: Lima nga aggaw.
I magatende: Membitan nga magatende i bagu ira nga elder anna i ekspiriensadu ira nga elder nga ari nagiskuela ta nappasa nga lima nga ragun.

School for Circuit Overseers and Their Wives

I gakkag na: Tapenu sanayan i traveling minister ira nga magalan tu manangngal ta sirkito, d tapenu mabbalin ira tu efektibo ta pangituppal da ta responsibilidad da. (1 Timoteo 5:17) Makoffun yaw nga eskuela ta Cristiano ira nga elder anna atawa da tapenu mas aru i mammuadda ta Biblia.
I kanaddu na: Tadday nga vulan.
I magatende: Membitan nga magatende i tanga-ragun ngana nga manangngal ta sirkito anna i atawa da. Tapus membitan ira uli nga magatende kabalin na lima nga ragun.

Kingdom Ministry School

I gakkag na: Tapenu uffunan i elder anna ministerial nga aripan ira e nga ituppal i responsibilidad da ta kongregasion segun ta maddagun nga situasion anna pakawagan ira. (2 Timoteo 3:1) Makua yatun nga paggigiammu kada pappasa na piga ragun.
I kanaddu na: Depende, mittan tangaggaw laman.
I magatende: Manangngal ta sirkito, elder ira, anna ministerial nga aripan ira.

Bethel Service School

I gakkag na: Tapenu moffunan i miembro ira na Bethel f nga ituppal i annungadda anna mas paga nga maponag i pangaya da ta Dios anna ta kataggi-tadday.
I kanaddu na: Lima anna gaddua nga aggaw.
I magatende: Mekiddaw nga magatende i bagu ira nga miembro na Bethel. Awayya na gapa nga magatende uli danuri nabayag ngana nga miembro na Bethel nga ari naka-atende ta nappasa nga lima nga ragun.

Watchtower Bible School of Gilead

I gakkag na: Tapenu tudduan i estudiante ira nga mapeggan tu monag nga pangappresia ta Uvovug na Dios anna tapenu moffunan ira nga iyaplika i magigiammu da. (1 Tesalonica 2:13) Aru i meyuffun na manakam ira ta espiritual nga lallaki anna babbay nga nagatende ta Gilead ta organisasion ni Jehova anna ta panuddu tu Biblia ta interu mundo. Awayya na nga ma-assign ta field onu ta branch office i naggradua ira, awayya na tu ta nasiodda onu ta tanakuan nga nasion.
I kanaddu na: Lima nga vulan.
I magatende: Imbitan na branch office ira nga magapply i napili ira nga ngamin-tiempo nga ministro. Makua yaw nga paggigiammu ta United States ta Watchtower Educational Center ta Patterson, New York.

School for Branch Committee Members and Their Wives

I gakkag na: Tapenu sanayan i miembro ira na Branch Committee g ta pangituppal da ta trabahu da ta branch office anna ta espiritual ira nga aktibidad na Saksi ira ta nasion onu nasion ira nga neyasayn ta branch office da.
I kanaddu na: Dua nga vulan.
I magatende: Imbitan na World Headquarters na Saksi ira ni Jehova i napili ira nga miembro na Branch Committee anna atawa da nga magatende, makua yatun ta Watchtower Educational Center ta Patterson, New York.

Sitaw nebase i passanay nga malawa na Saksi ira?

I Biblia i primeru nga libru nga meyusa ta passanay na Saksi ira ni Jehova. Mangurug kami nga naggafu ta Dios i Biblia anna mabibbig taw i kapianan ira nga instruksion ta ngamin nga aspeto na pattolay na Cristiano.—2 Timoteo 3:16, 17.

Egga kari i pagan na Saksi ira ni Jehova nu masanay ira?

Awan. Libre yaw nga passanay. Maggafu ta boluntariu nga donasion i aktibidad ira na Saksi ira ni Jehova.—2 Corinto 9:7.

a Available ta website mi nga jw.org i Biblia, publikasion ira nga nebase ta Biblia, anna video ira.

b Makasta nga ehemplo nga bawtisadu nga Saksi i tadday nga pioneer—lalaki onu babay—nga goal na nga gawatan i mekiddaw nga oras kada vulan ta pangilayyagayya ta mensahe na Biblia ta tanakuan.

c Matured nga Cristiano nga lallaki i elder ira, ituddu da i Katurakan anna tangngalladda i totolay ni Jehova gukaban na panguffun anna pamagaram nira. Ari ira mapagan.

d Ngamin-tiempo nga ministro i manangngal ta sirkito nga mabbisita kada ligguan ta nadduruma nga kongregasion ta sirkito na. Pagaramman na i wawwaragi ira ta kongregasion ta nebase Biblia nga palappa anna pakikavulu nira ta ministerio.

e Aru nga praktikal nga uffun i iyawa na ministerial ira nga aripan para ta wawwaragi. Megafu taw mas aru i oras na elder ira ta panuddu anna pas-shepherding.

f Bethel i ngagan na branch office na Saksi ira ni Jehova. I ngamin-tiempo nga ministro nga egga tatun i massuporta ta aktibidad na Saksi ira ta teritoria na Branch.

g I Branch Committee ay tallu onu mas aru paga nga manakam ta espiritual.

Kunnasi nga mabenefisiowan i Saksi ira ni Jehova nu masanay ira?

“Megafu ta minappasiran ngà marigatan ngà nga kibbidan i ariakku kakilala meyannung ta Biblia. Ngem noffunan nà na passanay nga malawa ku ta study ta midweek nga maggutu anna mas mapakasta i abilidad ku nga manuddu. Ari ngà ngana marigatan nga makibbida ta tanakuan, ta kongregasion, anna ta trabahù.”—Natasha, United States.
“Noffunan nà na pagatende ta School for Kingdom Evangelizers tapenu makultiba i makadios nga kualidad kagitta na aya, pasensia, anna kinasippo. Megafu tatun nabbalin ngà tu mas mapia nga Cristiano, kofun, anna karruba. Nagigiammù gapa nu kunnasi i ma-research ta topiko ira ta Biblia anna nu kunnasì iyesplika i Uvovug na Dios tapenu madde na i futu na totolay.”—Stephen, Nigeria.
“Nakoffun niakan i School for Congregation Elders tapenu makultiba i kinapakalinno nga kawagakku ta passerbi bilang elder. Nepasigo ta palappa ira nga mawag nga tuttulakku i ehemplo ni Jesus.”—Luca, Italy.
“Nagigiammù ta Kingdom Ministry School nga mawag nga mabbalin ngà tu mabi marannian, masippo, anna minaggiddu. Nagigiammù nga nu uffunakku i tanakuan, kuakku yatun megafu ta aya anna ari tu megafu ta mawag nga kuakku yatun.”—Samuel, United Kingdom.
“Noffunan na kami na Gilead school nga usitakkan i baggi mi gukaban na Uvovug na Dios. (Santiago 1:22-25) Megafu tatun nasingammi i mawag mi ulian ta personalidad mi anna ta passerbi mi kani Jehova. Nagigiammu mi gapa nga mawag nga mas pagolluammi i tanakuan anne ta baggi mi anna siguraduammi nga megafu ta aya i ngamin nga kagiammi anna kukukuammi.”—Elnathan anna Princess, Philippines.