Usu-usammi i donasion ira para ta aktibidad ira na organisasiommi anna ta panguffun ta totolay. Kukukuammi danatun tapenu metuppal mi i primeru nga gakkag mi—i panuffun ta totolay tapenu mabbaling ira tu disipulo ni Cristo Jesus.​—Mateo 28:19, 20.

 Ariammi nga usu-usan i donasion tapenu marriku i sinni laman nga tolay. Ari tu mapagan i elder onu ministro mi ira, anna awan tu sueldu na Saksi ira ni Jehova ta pamala-balay da. Awan gapa tu sueldu danuri mattrabahu ta branch office mi ira anna ta world headquarters mi, maski danuri miembro na Manangngal nga Baggi.

•   Pangipublisa: Kada ragun, mangi-translate, magimprenta, mangipatulug, anna mangitaneg kami tu minillion nga Biblia anna tanakuan paga ira nga publikasion nga nebase ta Biblia. Libre ngamin danatun. Available gapa i publikasiommi ira ta website mi nga jw.org anna ta JW Library app. Libre danatun anna awan tu advertisement na.

•   Pamataddag Anna Pammentena: Ta interu mundo, mamataddag anna mammentena kami tu simple ira nga lugar nga para ta paddayaw tapenu egga i usan na kongregasion ira ta paggarammammung da tapenu maddayaw ta Dios. Mamataddag anna mammentena kami gapa tu branch office anna translation office ira. Boluntariu i aru nga mamataddag anna mammentena, yayya nga makamenos kami ta gastu.

•   Pangorganisa: Maggafu ta donasion ira para ta interu mundo nga trabahu i fundu nga meyusa para ta trabahu ira ta world headquarters mi, branch office, anna translation office, kunne na gapa i fundu para ta aktibidad ira na massesserbi bilang traveling minister ira.

•   Pallayyagayya: Ari nga mapagan i Saksi ira ta pangilayyagayya da ta mapia nga dumug onu ta panuddu da ta totolay meyannung ta “uvovug na Dios.” (2 Corinto 2:17) Ngem kagitta na ollu-siglo ira nga Cristiano, meddan tu simple nga paddianan anna meyawa i primeru ira nga pakawagan danuri napili anna na-train ira nga ministro nga mangusu-usa ta aru nga tiempo da ta pallayyagayya.​—Filipos 4:16, 17; 1 Timoteo 5:17, 18.

•   Panuddu: Maggafu ta donasion i fundu nga meyusa ta asembli anna kombensiommi ira. Fuera paga tatun, mamadday kami gapa tu audio anna video ira nga nebase ta Biblia. Egga gapa ira i klase mi nu sitaw matudduan i elder ira anna i ngamin-tiempo ira nga ministro tapenu mabbaling ira tu malalaki ta annungadda.

•   Panguffun ta Tiempo na Kalamidad: Mangiyawa kami tu makan, danum, anna paddianan para ta biktima ira na kalamidad. Manguffukkami ta “wawwagi [mi] ira ta angngurug,” anna maski gapa ta ari ira tu Saksi.​—Galacia 6:10.