Ari. Regular kami ta pamala-balay nga ministerio, ngem arianna kayà kagian nga mapaliag kami nu kuammi yatun nga trabahu. (Efeso 2:8) Ngatta?

 Nonopan yaw nga ilustrasion: Egga i vuka-palag nga lalaki nga nangitabba nga mangiyawa yayya tu mangina nga regalu ta ngamin nga umay ta espesipiko nga lugar anna oras nga kinagi na. Nu kurugammu yatun nga lalaki, tuttulammu kari i kinagi na? Siguradu! Anna magga ikagim gapa yatun ta kokkofummu anna kafamiliam tapenu mabenefisiowan gapa ira. Ngem maski paga kunnatun, ariammu malawa yatun nga regalu megafu laman ta panuttul mu ta kinagi na. Malawa mu yatun megafu ta kayà na nga iyawa yatun nikaw.

 Kunnatun gapa, kurugan na Saksi ira ni Jehova nga nipromesa na Dios nga mattolay tu mannanayun danuri manuttul nisa. (Roma 6:23) Ikaya mi nga ikagi ta tanakuan i kuru-kurugammi anna iddanamammi nga mabbenefisio gapa ira ta promesa ira na Dios. Ngem ariammi malawa i mannanayun nga inango megafu laman ta pamministerio. (Roma 1:17; 3:28) Awan vuluvuga tu makua na tolay tapenu malawa yaw nga bendision na Dios. “Pinaliag na ittam. Ari tu megafu ta anni laman nga mapia nga kingngua tam, nu ari megafu laman ta inaggallallo na.”​—Tito 3:5.