Ngatta Ari Makiggerra i Saksi ira ni Jehova?
Ari makiggerra i Saksi ira ni Jehova megafu taw ira nga rason:
Panuttul ta Dios. Kagian na Biblia nga i masserbi ira ta Dios, “poppokadda noka i espada da ira tapenu mabbalin tu taram na aradu . . . ni tu maggigiammu paga ira tu pakiggerra.”—Isaias 2:4.
Panuttul kani Jesus. Kinagi ni Jesus kani apostol Pedro: “Ituku mu uli i espadam; ta ngamin i mangiyusa ta espada ay matay gabbalaman ta espada.” (Mateo 26:52) Ipasingan naw nga arianna kayà ni Jesus nga mangusa tu armas nga pakiggerra i tagatuttul na ira.
Sinuttul na disipulo ira ni Jesus i bilin na nga “ari ira nga kukua na mundo” gukaban na pattalupaddiadda nga neutral ta pulitika. (Juan 17:16) Ari ira nga mapprotesta kontra ta kukukuan na militar ira anna ariadda gapa fugaddan danuri maya nga massuddalu.
Pangaya ta totolay. Nibilin ni Jesus ta disipulo na ira nga “makka-aya-aya kamu.” (Juan 13:34, 35) Mabbalin ira tu parte na interu-mundo nga pawwaragi anna ari ira vuluvuga nga makiggerra ta wawwaragi da.—1 Juan 3:10-12.
Ehemplo na ollu ira nga Cristiano. Kagian na Encyclopedia of Religion and War: “Ari nga nakiparte ta gerra anna militar i ollu ira nga tagatuttul ni Jesus,” megafu ta ammu da nga “mekontra yatun ta tuddu ni Jesus nga makka-aya-aya anna ayatan i mangontra nira.” Kunnatun gapa i kinagi na German nga teologo nga si Peter Meinhold ta ollu ira nga disipulo ni Jesus: “Ari puede nga massuddalu i tadday nga Cristiano.”
I meyuffudda ta komunidad
Aru i meyuffun na Saksi ira ni Jehova ta lugar da anna ari tu ira i paggafuan na paggurulu onu kawan na seguridad ta nasiodda. Irespeto mi i autoridad na gobiernu, nebase yatun taw ira nga prinsipio na Biblia:
“Makimoray ta mammaguray ira nga egga ta gobiernu.”—Roma 13:1.
“Iyawa nu gafu ta Emperador i kukua ira na Emperador anna iyawa nu ta Dios i kukua ira na Dios.”—Mateo 22:21.
Yari tu tuttulammi i dob ira, mappaga kami tu vugi, anna suportammi i pappursigi na gobiernu nga iyawa i pakawagan na imagurayadda.