Irespeto na Saksi ira ni Jehova i gobiernu ira anna i simbolo ira nga mangirepresenta ta nasion ira. Irespeto mi gapa i desision na tanakuan nga massaludo ta bandera, map-panatang makabayan, onu makkansion tu pambansang awit.

 Ngem ari nga makipartisipa i Saksi ira ni Jehova ta kunnatun ira nga seremonia gafu ta kurugammi nga mekontra danatun ta tuttuddu na Biblia. Mappappabalo kami nu irespeto na tanakuan i kuru-kurugammi, nu kunnasi nga irespeto mi gapa i kuru-kurugadda.

Taw nga artikulo

•  Anni i ituttuddu na Biblia meyannung taw?

•  Kunnasi nu ikiddaw na dob na gobiernu nga makipartisipa kami?

•  Egga kari i ilalaban na Saksi ira ni Jehova nga isyu ta pulitika onu ta lugar da?

 Yaw i dua nga tuddu na Biblia nga tuttuttulammi ta desisiommi:

•   I Dios laman i mepangngo nga dayawattam. Kagian na Biblia: “Daya-rayawam-mu i Yafu nga Dios mu, anna yaya laman i passerbiam-mu!” (Lucas 4:8) Gagangay ngana nga metabba ta panatang makabayan anna mekansion ta pambansang awit i promesa nga pagolluan na totolay i nasiodda anne ta anni laman onu sinni laman, yari tu para ta Saksi ira ni Jehova, mali i makipartisipa ta kunnatun ira nga seremonia.

   Kunnatun gapa i taddag na Saksi ira ni Jehova ta passaludo ta bandera. Tadday yatun nga klase na paddayaw, onu idolatria, nga igamma na Biblia. (1 Corinto 10:14) Kagian na karuan nga historiador nga simbolo na relihion i bandera na nasion ira. Nitura na historiador nga si Carlton J. H. Hayes: “I nasionalismo ay kagitta na relihion nga i pinakasimbolo na ay i bandera anna yatun gapa i primeru nga medayaw.” a Kunnaw i obserbasion na autor nga si Daniel P. Mannix meyannung ta Cristiano ira ta ollu nga tiempo: “Manaki na Cristiano ira nga . . . mangitavvung ta anghel dela guardia na emperador [na Roma]—ta kaggawattam, kagitta natun i pammanaki nga massaludo ta bandera.” b

  Maski nu ari nga massaludo ta bandera i Saksi ira ni Jehova, ari mi yatun nga daralan onu tuggian. Ari kami gapa magangngua tu anni laman nga mangipasingan tu kawan na respeto tatun onu ta anni laman nga simbolo na nasion.

•   Para-parehu ittam ngamin ta paningan na Dios. (Kingngua 10:34, 35) Kagian na Biblia nga “tadday laman nga tolay i pinaratu [na Dios] nga naggafuan na ngamin nga rasa na totolay.” (Kingngua 17:26) Megafu tatun, kurugan na Saksi ira ni Jehova nga mali nga ikwenta nga mas atannang i anni laman nga lahi onu nasionalidad. Ikakua mi i ngamin nga totolay, maski nu sitaw paga nga lugar i naggafuanadda onu paddianadda.—1 Pedro 2:17.

 Ari nga kontra ta gobiernu i Saksi ira ni Jehova. Mangurug kami nga i gobiernu ira ay unnug onu “sinullo na Dios” nga nipamavulun na nga mammaguray. (Roma 13:1-7) Mangurug kami gapa nga mawag nga mattuppal i Cristiano ira ta sekular nga autoridad.—Lucas 20:25.

 Kunnasi nu makkaduma i dob na gobiernu anna dob na Dios? Ta karuan nga situasion, legal nga ikiddaw mi ta gobiernu nu puede da nga i-adjust i dob. c Nu ari nga posible, marespeto nga pilian na Saksi ira ni Jehova nga tuppalan onu ‘kurugan i Dios anne ta tolay.’—Kingngua 5:29.

 Awan. Awan tu sussuportan na Saksi ira ni Jehova nga isyu ta pulitika onu ta lugar da. Nu ari kami nga makipartisipa ta panatang makabayan, massaludo ta bandera, onu makkansion tu pambansang awit, ari na kayà kagian nga aktibista kami. Tuttuttulammi laman i nebase-Biblia ira nga pangurug mi meyannung tatun ira nga seremonia.