I abbo na totolay: I rason nu ngatta ari masselebra tu Easter i Saksi ira ni Jehova ay megafu ta ari ira nga Cristiano.

 I kurug: Mangurug kami nga si Jesu-Cristo i Mamaliag nittam, anna kuammi i ngamin nga mawayya mi tapenu ‘tuttulan yayya.’—1 Pedro 2:21; Lucas 2:11.

 I abbo na totolay: Ari nu kurugan nga napaginnolay si Jesus.

 I kurug: Mangurug kami nga napaginnolay si Jesus; ammu mi nga importante yaw ta pangurug na tadday nga Cristiano anna ilayyagayya mi yaw ta totolay.​—1 Corinto 15:3, 4, 12-15.

 I abbo na totolay: Manaki nu nga magayayya i ána nu ta ari kamu masselebra tu Easter.

 I kurug: Iddukammi i ána mi. Kuammi i adde na mawayya mi tapenu sanayan ira anna mabbalin tu magayayya.​—Tito 2:4.

•   Ari nebase ta Biblia i passelebra tu Easter.

•   Nidob ni Jesus nga iselebra tam i patena, ari tu i paginnolena. Iselebra mi yaw nga Memorial kada ragun ta anibersario na patay na segun ta lunar calendar na Biblia.​—Lucas 22:19, 20.

•   Kurugammi tu ari nga akseptan na Dios i passelebra tu Easter megafu ta naggafu yatun ta kostumbre meyannung ta ritual na pagana. Ikiddaw na Dios nga iyawa tam nisa i “interu-futu nga debosion,” anna matakitan yayya ta ari mepangngo nga paddayaw.​—Exodo 20:5; 1 Patul Ira 18:21.

 Kurugammi nga nebase ta Biblia i desisiommi nga ari masselebra tu Easter. Ipagaram na Biblia i pangusa tu “praktikal nga ka-uto anna abilidad nga mannono” imbes tu basta panuttul ta tradision na tolay. (Proverbio 3:21; Mateo 15:3) Ikagi mi i kuru-kurugammi meyannung ta Easter nu iyavu da nikami, ngem irespeto mi gapa i desision na tadday meyannung tatun.​—1 Pedro 3:15.