I abbo na totolay: Ari nga masselebra i Saksi ira ni Jehova tu Krismas ta ariadda nga mangurug kani Jesus.

 I kurug: Cristiano kami. Mangurug kami nga mapaliag ittam laman gukaban ni Jesu-Cristo.​—Kingngua 4:12.

 I abbo na totolay: Passirinammi i familia ta ibawalmi i Krismas.

 I kurug: Importante ta nikami i familia, anna usammi i Biblia tapenu mabbaling tu magayayya i familiami.

 I abbo na totolay: Ariammi maekspiriensa i pagayayya na pangiyawa, imammo, anna kinasippo ta kasittolemi ta tiempo na Krismas.

 I kurug: Kakayàmi i mangiyawa anna i imammo. (Proverbio 11:25; Roma 12:18) Angngariganna, ta pakkaravulumi ta study mi ta Kingdom Hall anna ta pallayyagayyami, tuttuttulammi i kinagi ni Jesus nga nu nalawa tam nga awan tu pagana, ariattam gapa ipapaga. (Mateo 10:8) Fuera paga tatun, mangurug kami nga i Pappatulan na Dios laman i makeyawa tu kurug nga imammo ta davvun.—Mateo 10:7.

•   Nibilin ni Jesus nga iselebra tam i patayna, ari tu i keyanana.​—Lucas 22:19, 20.

•   Ari nga nak-krismas i apostoles ira ni Jesus anna i disipulosna ira tagga. Kagian na New Catholic Encyclopedia nga “neselebra laman i keyana ni Jesus tagga laman ta 243 [C.E.],” maturu tu 100 nga dagun i nappasa kabalin na patay na urian nga apostol.

•   Awan tu ebidensia nga neyana si Jesus ta Disiembre 25; awan ta Biblia i fetcha na keyanana.

•   Kurugammi nga manaki na Dios i Krismas gafu ta pagano nga kostumbre anna tradision i naggafuanna.​—2 Corinto 6:17.

 Aru lagapa i mak-krismas maski nu ammuda nga pagano i naggafuanna anna ari mabba yaw nga nebase ta Biblia. Ngem nonopattam nakuan: Ngatta mawag tu ari mak-krismas i Cristiano ira? Marake kari gapa yatun?

 Kagian nittam na Biblia nga ‘innattam tu mapia nu kurug i ngamin’ nga ganna-gannug. (1 Tesalonica 5:21) Tudduanna ittam nga tagibalorattam i kinakurug. (Juan 4:23, 24) Ikayami gapa nga magustuan nakami na totolay ngem mas kayàmi nga tuttulan i tuttuddu na Biblia maski nu mabbalikkami tu neruma ta tanakuan.

 Maski nu ari kami nga mak-krismas, irespetomi i desision na totolay taw nga gannug. Ari mi nga fugaddan i passelebra tu Krismas na tanakuan.