Tuttuttulammi tu mapia i kagian na Biblia meyannung ta pangiselebra ta “Pamugag na Yafu” nga magalan gapa tu Last Supper anna Memorial na Patay ni Jesus. (1 Corinto 11:20) Ngem ari nga nebase ta Biblia i aru ta kuru-kurugan anna neyugalian na karuan ira nga relihion meyannung ta pangiselebra tatun nga okasion.

 Meselebra i Pamugag na Yafu tapenu daddamman si Jesus anna mepasingan i pappabalo tam ta sakrifisio na para nittam. (Mateo 20:28; 1 Corinto 11:24) Ari nga sakramento onu relihioso nga tradision yatun nga okasion nga mangiyawa tu bendision kagitta na grasia onu pamakoma ta liwi-liwa ira. a Ituttuddu na Biblia nga mapakoma laman i liwi-liwa gukaban na pangurug kani Jesus, ari tu gukaban na relihioso nga ritual.​—Roma 3:​25; 1 Juan 2:​1, 2.

 Zinog ni Jesus i disipulos na nga iselebra da i Pamugag na Yafu ngem awan tu kinagi na nu mamippiga da nga kuan yatun. (Lucas 22:19) Kurugan na karuan nga mawag tu vinulan nga meselebra yatun. Linigguan gapa ta karuan, inaggaw, mamippiga ta tangaggaw, onu kada manono na tadday nga mawag tu meselebra yatun. b Ngem yaw ira i mawag nga mekonsidera.

 Nigafu ni Jesus i Pamugag na Yafu ta fetcha na Paskua na Judio ira, tapus natay gabbalaman yayya tatun nga aggaw. (Mateo 26:​1, 2) Ari tu nekanna laman yatun. Nikumpara na Biblia i tavvung ni Jesus ta kordero na Paskua. (1 Corinto 5:​7, 8) Mittan laman ta tanga-ragun nga meselebra i Paskua. (Exodo 12:​1-6; Levitico 23:5) Mittan laman gapa ta tanga-ragun i pangiselebra na ollu-siglo ira nga Cristiano ta Memorial na patay ni Jesus. c Megafu ta nebase yatun ta Biblia, tuttuttulan yatun na Saksi ira ni Jehova sangawe.

 Makoffun i nipangigafu ni Jesus ta pangiselebra tu Memorial tapenu mammuan i fetcha anna oras na Memorial, ari laman nga tapenu mammuan nu mamippiga nga meselebra yatun. Nigafu na yatun kabalin na pallammag na bilag ta Nisan 14, 33 C.E., base ta lunar nga kalendariu ta tiempo na Biblia. (Mateo 26:18-​20, 26) Kada dagun, itulu-tuloy mi nga iselebra i Memorial tatun nga fetcha kagitta na kiningngua na ollu-siglo ira nga Cristiano. d

 Maski nu Biernes i Nisan 14, 33 C.E., awayya na nga mekanna ta tanakuan nga aggaw i anibersario natun nga fetcha ta kada dagun. Kalkulammi i fetcha nga Nisan 14 ta kada dagun gukaban na metodo nga neyusa ta tiempo ni Jesus. Ari mi nga usan i metodo nga meyusu-usa para ta kalendariu ira na Judio ta maddaggun. e

 Ta bagu nga pangiselebra, nangusa si Jesus tu pan nga awan tu lebadura na anna uzzin nga binarayang (red wine) nga navuna ta pamugag ta Paskua. (Mateo 26:26-​28) Tapenu matuttul yatun nga kingngua na, mangusa kami tu pan nga awan tu lebadura na onu awan tu tanakuan nga kivu na anna puro nga red wine, ari nga daggo na ubas onu wine nga nakivuan tu pampa-ammi onu tanakuan paga.

 Mangusa i karuan nga relihion tu pan nga egga i lebadura na onu yeast. Ngem ta Biblia, maruddu nga meyusa i lebadura bilang simbolo na liwa anna kinadake. (Lucas 12:1; 1 Corinto 5:​6-8; Galacia 5:​7-9) Yari tu i pan laman nga awan tu lebadura na onu awan tu tanakuan nga kivu na i mepappangngo nga mangisimbolo ta baggi ni Cristo nga awan tu liwa na. (1 Pedro 2:​22) I tadday paga nga neyugalian nga ari nga suportan na Biblia ay i pangusa tu grape juice, imbes tu wine. Kukukuan yatun na karuan nga relihion megafu ta pangigamma da ta paginum tu binarayang nga ari mabba nga nebase ta Biblia.​—1 Timoteo 5:​23.

 Emblema onu simbolo laman na pattag anna daga ni Cristo i pan nga awan tu lebadura na anna i uzzin nga binarayang nga metunnag ta Memorial. Ari tu milagro nga nabbalin onu nekivu yatun ira ta literal nga pattag anna daga ni Jesus gitta na abbo na karuan. Ikonsidera i nebase-Biblia nga rason nga mamakurug tatun.

•   Nu nibilin ni Jesus ta disipulos na nga inumadda i daga na, gitta na kakkagian na ngana gapa ta nira nga ari da tuttulan i dob na Dios kontra ta pakkakan tu daga. (Genesis 9:4; Kingngua 15:28, 29) Ngem imposible yatun ta ari vuluvuga nga ibilin ni Jesus ta tanakuan nga ari da tuttulan i dob na Dios meyannung ta kinasagradu na daga.​—Juan 8:​28, 29.

•   Nu literal nga ininum na apostol ira ni Jesus i daga na, ari na nakuan nga kinagi ta nira nga “mevuvvu” i daga na, nga kayà na kagian, mesimmu pagalaman i pangitavvung na ta baggi na.​—Mateo 26:28.

•   Nangitavvung si Jesus “mittan laman adde noka.” (Hebreo 9:​25, 26) Ngem nu literal nga nabbalin tu pattag anna daga ni Jesus i pan anna binarayang ta Pamugag na Yafu, ulitan danuri makiparte tatun yatun nga pangitavvung.

•   Kinagi ni Jesus: “Kuan nu yaw tu panaddamman nu niakan,” ari nga “Kuan nu yaw tu pangitavvung nu niakan.”​—1 Corinto 11:24.

 Mangurug i karuan ta transubstantiation, nga nabbalin kanu tu literal nga baggi anna daga ni Jesus i pan anna binarayang. Nebase da yatun nga tuddu ta termino ira nga neyusa ta karuan nga teksto ta Biblia. Angngarigan na, mabibbig ta aru nga translation na Biblia nga kunnaw i kinagi ni Jesus meyannung ta binarayang: “Yaw i dagà.” (Mateo 26:28) Ngem kunnaw gapa i awayya na tu ke-translate natun: “Kebalinan naw i dagà,” “Irepresenta naw i dagà,” onu “Isimbolo naw i dagà.” f Gitta na kanayun nga kukukuan ni Jesus nu manuddu yayya, nangusa yayya tu pangikumpara (onu, metaphor).​—Mateo 13:34, 35.

 Nu iselebra na Saksi ira ni Jehova i Pamugag na Yafu, baddi laman ta nikami i kuman ta pan anna minum tu binarayang. Ngatta?

 Megafu ta nevuvvu nga daga ni Jesus, nabuu i “bagu nga pakkasinabban” nga nanali ta pakkasinabban ni Jehova nga Dios ta nasion na Israel tagga. (Hebreo 8:​10-​13) Makiparte ta emblema ira ta Memorial danuri parte natun nga bagu nga pakkasinabban. Nelagum tatun ari tu i ngamin nga Cristiano, nu ari, danuri laman “i inagalan na Dios.” (Hebreo 9:​15; Lucas 22:20) Ira danuri makipammaguray noka ta langi kavulu ni Cristo. Kagian na Biblia nga 144,000 laman nga totolay i makalawa ta kunnatun nga pribilehio.​—Lucas 22:28-​30; Nepakannammu 5:​9, 10; 14:​1, 3.

 “Pigi-piga laman” i nagalan nga makipammaguray kani Cristo. Ngem magaru ta nikami i magiddanama nga mabbalin tu parte na “dakal nga ammung” nga mattolay noka tu mannanayun taw ta davvun. (Lucas 12:32; Nepakannammu 7:​9, 10, NW ) Ari nga makiparte ta emblema ira ta Memorial danuri para ta davvun ngem masselebra kami lagapa tapenu mepasingammi i appabalo mi ta sakrifisio nga kingngua ni Jesus para ta nittam.​—1 Juan 2:2.