Ari. Cristiano i Saksi ira ni Jehova, yatutta ibaseda i pangurugda ta Katurakan. Ituddu na karuan nga relihion nga i panoli na Judio ira ta Palestina ay konektadu ta profesiya na Biblia, ngem ari nga kunnatun i pagimamma na Saksi ira ni Jehova. Ariadda kurugan nga yaw nga pulitikal nga nesimmu ay neprofesiya ta Katurakan. Kakuruganna, ari nga ipoppoddu na Katurakan i maski anni nga gobiernu na tolay onu iyatannang i tadday nga etniko nga grupo onu totolay anne ta tanakuan. Manawag i kinagi na The Watchtower, ofisial nga magazina na Saksi ira ni Jehova: “Ari nga suportan na Katurakan i pulitikal nga Zionism.”

 Segun ta Encyclopædia Britannica, i Zionism ay “tadday nga nasionalista nga grupo na Judio nga i gakkagda ay mamataddag anna suportan i tadday nga estado na Judio ta interu nga Palestina.” Naggafu yaw nga grupo ta relihion anna pulitika. Ari nga ituttuddu na Saksi ira ni Jehova i Zionism bilang relihioso nga doktrina anna neutral ira meyannung tatun.

 I Saksi ira ni Jehova ay relihioso nga organisasion anna ariadda ikampania i anni laman nga unnug na pulitika, nelavu ngana i Zionism. Manawag nga ipasingan na rekord nga neutral i Saksi ira ni Jehova meyannung ta pulitika. Ta karuan nga nasion, pinili na Saksi ira i magattam ta grabe nga pameppersigi imbes nga ikompromiso i neutralidadda. Kumbinsido kami nga i nelangitan nga Pappatulan na Dios i makeyawa laman tu mannanayun nga imammo ta mundo; awan tu maski anni nga gobiernu na tolay onu grupo i maketuppal tatun.

 I pamarulo ta dorob na sekular nga gobiernu i tadday ta prinsipio nga tuttuttulan na Saksi ira ni Jehova maski sitaw i lugarda. Ariadda marrebelde kontra ta gobiernu onu makiparte ta gerra.