I abbo na totolay: Ari mangurug i Saksi ira ni Jehova ta doktor, yayya nga ari ira mapporu ta nira.

 I kurug: Ikaya mi i pinakamakasta nga panguru para nikami anna ta familia mi. Nu mataki kami, umay kami ta doktor nga mawayya na i manguru onu magopera nga ari kawagan i pappatubbo tu daga. Appresiammi i papprogreso na teknolohia ta medisina. I kurug, i papporu nga kuan na Saksi ira ay makoffun gapa ta karuan ira nga pasiente. Ta aru nga nasion, malillitan ngana na pasiente ira i marake nga efekto na pappatubbo tu daga kagitta na taki, komplikasion, anna mali nga proseso na pappatubbo tu daga.

 I abbo na totolay: Mangurug i Saksi ira ni Jehova nga mammapia i tadday nu egga i pangurug na.

 I kurug: Ari kami nga mangurug ta faith healing.

 I abbo na totolay: Mas magastu i papporu nu ari ira mappatubbo tu daga.

 I kurug: Mas makatipid ittam ta papporu nu ari ittam mappatubbo tu daga. a

 I abbo na totolay: Kada dagun, aru nga Saksi i matay, nelavu i abbing ira megafu ta ari ira mappatubbo tu daga.

 I kurug: Awan tu basehan natun. Aru nga surgeon i magangngua tu komplikadu ira nga proseso kagitta na heart operation, orthopedic surgery, anna organ transplant nga ari ira mangusa tu daga. b Mas alistu nga nammapia i pasiente ira, nelavu i abbing ira, nga ari nappatubbo tu daga anne ta nappatubbo tu daga. c Ta maski anni nga situasion, awan tu makekagi nga matay i tadday nga pasiente megafu ta ari yayya nappatubbo tu daga onu mattolay yayya megafu ta pappatubbo na.

 Megafu yatun ta relihioso nga pangurug mi. Manawag nga kagian na Old anna New Testament nga lillitattam i daga. (Genesis 9:4; Levitico 17:10; Deuteronomio 12:23; Kingngua 15:28, 29) Imammatan gapa na Dios nga irepresenta na daga i inango. (Levitico 17:14) Ari laman tu panuttul ta Dios i makagafu nu ngatta ari kami mappatubbo tu daga, nu ari megafu ta irespeto mi yayya nga Paggafuan na inango.

 Ibilang tagga na doktor nga pappakamatay i ari nga pappatubbo tu daga, ngem nanguli yatun nga pagimamma ta nappasa ira nga dagun. Angngarigan na, ta 2004, kagian na tadday nga artikulo nga nepublisa meyannung ta medisina nga “aru ta technique nga meyusa ta pasiente nga Saksi ira ni Jehova i meyusa gapa sangawe ta karuan nga pasiente anna ta mappange paga ira nga dagun.” d Tagga ta 2010, kinagi na tadday nga artikulo na journal nga Heart, Lung and Circulation nga “‘i pagopera nga ari meyusa i pappatubbo tu daga’ ay ari laman nakuan tu para ta Saksi ira ni Jehova, nu ari mabbalin tu gagangay nga parte na pagopera.”

 Ta interu mundo, rinivu nga doktor i mangusa tu nadduruma nga technique ta pagopera nga ari kawagan i pappatubbo tu daga. Meyusa ngana i kunnatun nga alternatibo nga pappatubbo tu daga maski ta mariga ira nga nasion anna pilian yatun na aru nga pasiente maski ari ira nga Saksi ni Jehova.