Megafu ta teknolohia, baka ekspektan na boss mu, katrabahum ira, onu kliyentem ira nga awayya daka nga kontakan ta maski anni nga oras onu aggaw. Megafu tatun, baka marigatakka nga balanseyan i trabahu anna i karuan paga nga importante nga responsibilidad mu, gitta na pagatawa nu.

•  Nu anni i mawag nga ammuammu

•  Tips tapenu mabalansem i trabahum ta karuan paga nga responsibilidad mu

•  I kakkagian na sigga-atawan ira

•  I puede nu ira nga pabbidan

•   Megafu ta teknolohia, baka marigatakka nga passinan i oras mu ta trabahum anna i oras mu para nakuan ta atawam. Megafu tatun, baka kada egga i mattawag, ma-email, onu mat-text, maski ari ngana nga oras na trabahu, ay abbo mu tu gitta na emergency nga mawag tu insigida nga tabbagammu.

   “Gitta na imposible ngana sangawe nga kabalin na trabahu, lubbe ka, tapus para ngana gapa ta familiam i oras mu. Kada babbayag gare, egga i email onu tawag ta trabahu, tapus tatun lallagu i fokus mu, imbes tu ta atawam.”—Jeanette.

•   Tapenu mabalansem i oras mu ta trabahu anna oras mu ta familiam, mawag tu egga i kuammu. Nu ari ka nga mapplano, magga mofu na trabahum i oras mu nakuan para ta atawam.

   “I oras mu ta atawam i maruddu nga mesakrifisiom, megafu ta nonopammu, ‘Malippawa nà mabba yari. Magga pakoman nà. Bumawi ngà ’na laman saw nisa.’”—Holly.

•   Prayoridad mu nakuan i pagatawa nu. Kagian na Biblia: ‘Arian na nga awayya tu paggungayan na tolay i pinattadday na Dios.’ (Mateo 19:6) Nu kammu ipamavulu nga “paggungayan” nakamu na duma nga tolay, ngatta ipamavulu mu nga paggungayan nakamu na trabahum?

   “Nonopan na karuan nga kliyente nga puede daka nga tawagan ta maski anni nga oras megafu ta pagaddaka mabba. Ngem megafu ta prayoridad ku i atawà, kagiakku ta nira nga ari ngà puede ta day off ku, anna tawagakku ngana laman ira sonu puede ngà.”—Mark.

   Iyavu mu ta baggim, ‘Ipasingan kari na kukukuakku nga mas tagibalorakku i pagatawa mi anne ta trabahù?’

•   Nu puede, ari mu akseptan i trabahu. Kagian na Biblia: “I ka-uto ay egga ta mapakalinno ira.” (Proverbio 11:2) Nu mapakalinno ka, masingammu nga pammakapianammu nu ari mu nga akseptan i karuan nga trabahu onu puede nga ipatrabahum yatun ta tanakuan.

   “Tuberu ngà. Egga ira i kliyentè nga ma-stress gafu ta mawag da ngana insigida i serbisiù. Nu kakku makangay ta oras nga kawagan nà, i-refer ku yayya ta tanakuan nga tuberu.”—Christopher.

   Iyavu mu ta baggim: ‘Okay kari laman niakan nu ari ku akseptan i karuan nga trabahu tapenu kakku mapagurayan i atawà? Kunnatun kari i nononopan na atawà tu kuakku?’

•   Mangiskediul tu tiempo nga makkavulu kamu na atawam. Kagian na Biblia: “Egga i natullo nga tiempo ta kada gannug.” (Eclesiastes 3:1) Nu napakaru i kuammu ta trabahum, mas ngana nga kawagammu i mangiskediul tu tiempo nga makkavulu kamu na atawam. Siguraduammu nga tuttulammu yatun.

   “Nu sobra i ka-busy mi dua, mangiskediul kami tu tiempo nga sikami laman dua i makkavulu, maski nu simple laman nga dinner onu pallakag ta aggig na bebay.”—Deborah.

   Iyavu mu ta baggim: ‘Egga kari ira i oras nga niyiskediul ku nga nakafokus ngà laman ta atawà? Anni tamma i makagi na atawà tatun?’

•   I-off i gadyet mu. Kagian na Biblia: ‘Siguraduan nu i mas importante nga ganna-gannug.’ (Filipos 1:10, NW ) Awayyam kari nga i-off i gadyet mu nu karuan tapenu ari ka nga maistorbo ta text onu tawag ta trabahu?

   “Ikagumakku nga magimmang nga mattrabahu ta espesipiko nga oras. Mamegafu tatun nga oras, i-off ku i notifications na gadyet ku.”—Jeremy.

   Iyavu mu ta baggim: ‘Mawag kari nga available ngà kanayun tapenu makontak nà na boss ku onu na kliyentè nu kawagaddà? Anni tamma i makagi na atawà tatun?’

•   Mabbalikka tu rasonable. Kagian na Biblia: “Masingan paray na ngamin nga rasonable kamu.” (Filipos 4:5, NW ) Kakurugan na, egga ira i tiempo nga sumingit i trabahu ta oras nga makkavulu kamu na atawam. Angngarigan na, nu i trabahu na atawam ay kawagan na i makontak ta maski anni nga oras. Mabbalikka nakuan tu rasonable ta ikikkiddom ta atawam.

   “Egga i baddi nga negosio na atawà. Megafu tatun, kanayun nga egga i mawag tu insigida nga asikasuan na maski kabalin na oras na trabahu. Nu mittan, mainis ngà. Ngem megafu ta aru mabba i iyayawa na nga oras niakan, okay laman.”—Beverly.

   Iyavu mu ta baggim: ‘Malippawa ku kari i karu na trabahu na atawà, yayya nga ari tu sossobra i ikiddò ta nisa tu atension onu tiempo? Anni tamma i nonopan na atawà tatun?’

 Puede labbi nga pannonopan na kada tadday nikamu yaw ira nga pakkiavu tapus pabbidan nu i tabbag nu ira tatun.

•   Narreklamo ngana kari i atawam megafu ta ilallabbe mu i trabahum? Nu wan, kurug kari i kinagi na?

•   Anni ira i mawag tu uliammu tapenu mabalansem i trabahu anna i pagatawa nu?

•   Egga kari ira i tiempo nga ninono mu nga ilallabbe na atawam i trabahu na? Nu wan, nikanni ira yatun?

•   Para nikaw, anni ira i mawag tu ulian na atawam tapenu mabbalin tu balanse ta trabahu anna pagatawa nu?