“Inaggaw nga mapurueban i pasensia na magatawa. Ari gapa tu dakal nga problema i pasensia nu awan tu atawam, ngem kuruga importante yatun ta magayayya nga pagatawa.”—John.

•  Ngatta kawagan nga ipasingammu i pappasensia?

•  Kunnasi ka nga mappasensia?

•  “Talaga mawag i pasensia”

•   Ta pagatawa, mas masingammu i pakkamalian na atawam.

   “Oras tu nappasa ngana i kasal, mabi mu laman masingan i ari kuruga makasta nga kualidad na atawam. Nu nononopammu yatun, mabi nga mofu i pasensiam.”—Jessena.

•   Nu awan tu pasensiam, gavva-gavva ka nga mabbida.

   “Nasanay ngà nga insigida nga ikagi nu anni i mataga-tageno ku. Nu egga nakuan i pasensià, nonopakku labbi nu mawag ku kari paga kagian yatun onu baka ari ngana.”—Carmen.

   Kagian na Biblia: ‘I aya ay minappasensia anna minaggallallo.’ (1 Corinto 13:4) Siempre, nu makka-aya-aya i dua nga tolay, makkapasa-pasensia ira. Ngem ari tu kunnatun kanayun. Kagian ni John nga nakagi ta gafu, “Kagitta na tanakuan paga nga makasta nga kualidad, mas mabi nga mofu i pasensia anne ta mammungan yatun. Kawagan i pappursigi tapenu umapiddu i pasensia.”

•  Nu egga i gavva nga mesimmu nga mamurueba ta pasensiam.

   Angngariganna: Ari nga makasta i kinagi na atawam niko. I natural nga reaksiommu ay tabbagan gapa yayya tu ari nga makasta.

   Prinsipio na Biblia: “Ari ka insigida nga matakitan, megafu ta i taki na nono i seniales na ulapa ira.”—Eclesiastes 7:9, footnote.

   Nu kunnasi mappasensia: Magimmang tu manganannuan. Nige mu tubbag, kagiammu ta baggim nga ari gapa nga intension na atawam nga takitannan onu insultowan naka ta kinagina. “Maruddu nga i reaksion na karuan nittam ay base ta nakomprendi tam ta kinagi na atawa tam, ari tu ta talaga kayàna nga kagian,” kagian na libru nga Fighting for Your Marriage.

   Maski nu tutturungan naka na atawam, ari nga maggrabe i situasion nu mappasensia ka anna ari ka mangibalo. Kagian na Biblia: “Maddo i afi nu ari maduppangan.”—Proverbio 26:20.

   “Oras tu kalaban ngana i paningammu ta atawam, magimmang anna nonopammu nu ngatta iddeddukammu yayya, anna insigida nga mangngua ka tu mapia nisa.”—Ethan.

   Pannonopan:

  •  Anni i kuammu nu egga i kinagi onu kingngua na atawam nga ari tu makasta?

  •  Kunnasim nga mapapiddu i pasensiam sonu otru uli nga mesimmu yatun?

•   Nu pakatotoli nga mapurueban i pasensiam.

   Angngariganna: Nu kanayun nga ma-late i atawam, mappatu i ulum ta paginnag mu nisa.

   Prinsipio na Biblia: “Makkapasa-pasensia anna makkapaka-pakoma kamu.” —Colosas 3:13.

   Nu kunnasi mappasensia: Ipoppollum nakuan i relasionnu nga magatawa anne ta baggim. Iyavu ta baggim, ‘Nu paddamammi i nesimmu, makoffun kari yatun onu makadaral ta relasiommi?’ Daddamman gapa nga “sittam ngamin ay maruddu nga makaliwa.” (Santiago 3:2) Kayà kagian naw nga maski sikaw gapa egga i mawag nga pakastammu ta ugalim.

   “Nu mittan, mas mapasensiakku i kofukku anne ta atawà. Siguru megafu ta kanayukku nga kavulu i atawà anna masingi-singakku i pakkuranganna ira. Ngem aspeto na aya i pappasensia. Pangipasingan yatun tu respeto, yatutta kawagammi yatun ta relasiommi nga magatawa.”—Nia.

   Pannonopan:

  •  Pasa-pasensiammu kari i pakkakkamalian na atawam?

  •  Kunnasim paga nga mapapiddu i pasensiam?