Siguradu nga duttal i tiempo nga makkamali i ána mu ira. Kunnasim ira moffunan nga arubangan yatun?

•  Nu anni i mawag nga ammuammu

•  Nu anni i makuam

I pakkamali ay parte na pattolay. Kagian na Biblia nga “sittam ngamin ay maruddu nga makaliwa.” (Santiago 3:2) Makaliwa gapa i abbarabbing. Ngem posible nga positibo i efektona nu makkamali i abbing megafu ta moffunan ira nga magigiammu nu kunnasi arubangan i mariga nga situasion. Ari nga neyana i abbing nga egga i kunnatun nga abilidadda ngem magigiammuda yatun. “Naobserbami nga magatawa nga mas makasta nu magigiammu na abbarabbing nga arubangan i pakkadismaya imbes nga magappappe nga ari tu nesimmu yatun,” kagian na yena nga si Laura. “Magigiammuda nu kunnasi i magatta-attam nu ari tu makasta i paddia-paddian.”

Aru nga abbing i ariadda ammu nu anni i kuadda nu makkamali ira. Ari nga nagigiammu na karuan nga abbing nu anni i kuadda nu makkamali ira megafu ta kukkunsintian ira na maganada. Angngariganna, nu mababa i grades na tadday nga abbing, paliwatan na karuan nga magana i mestru. Nu nakiddama gapa i abbing ta kofunna, paliwatadda i kofunna.

Ngem kunnasi nga magigiammu na abbarabbing nga egga i tattabbagadda ta nakkamaliadda ira nu kanayun ngana laman ira nga kunsintian na maganada?

• Ikagim ta ána mu nga egga i tattabbaganna ta kukukuanna.

  Kagian na Biblia: “Nu anni laman i nimula na tolay, yatun gabbalaman i gataban na.”—Galacia 6:7.

  Egga i resulta na ngamin nga kukukuammu. Nu makkamali ka, maperwisiu ka ta marake nga resulta natun. Mawag tu mammuan na abbarabbing nga nu anni i nimulada yari gabbalaman i apitadda anna mawag nga ammuda nga egga i tattabbagadda ta mesimmu. Yatutta ariammu nakuan paliwatan i tanakuan onu kunsintian i ana mu. Imbes tu kunna, pagurayammu nga maekspiriensada i vunga na kingnguada. Ngem mepangngo laman nakuan yatun ta edadda. Mawag gapa nga malippawada nga nesimmu nira yatun megafu ta nakkamali ira.

• Uffunan i ána mu nga magaleg tu solusion.

  Prinsipio na Biblia: “Maski matomba tu mamippitu i matunung, tumaddag lagapa yayya.”—Proverbio 24:16.

  Makadismaya i makkamali ngem ari tu yatun i pinakagrabe nga mesimmu. Uffunan i ana mu nga magaleg tu solusion imbes nga magaleg tu paliwatanna. Angngariganna, nu bimmagsak i ana mu ta exam ta eskuela, uffunan yayya nga matindian nu kunnasi nga makkasta i situasionna nu mallallappo yayya nga maggigiammu. (Proverbio 20:4) Nu nakiddama i ana mu ta kofunna, uffunan yayya nga mammuan nu kunnasi yayya nga magollu nga makippakoma maski nu sinni i nakaliwa.—Roma 12:18; 2 Timoteo 2:24.

• Tudduan i ána mu nga mabbalin tu mapakalinno.

  Prinsipio na Biblia: “Kiddawak-ku ta kataggi-tadday nikamu: arian nu nga ikwenta i baggi nu tu mas atannang anne ta mepangngo.”—Roma 12:3.

  Nu kagiammu ta ana mu nga yayya i “pinakamalalaki,” ari tu realistiko anna ari tu makoffun yatun. Maski danuri abbarabbing nga bright ta eskuela ay ari tu kanayun nga makala tu perfekto nga grades. Maski danuri abbarabbing nga malalaki ta isports ay maffu gapa. Mas mabi nga marubang na abbarabbing i pakkamalian onu pakkadismayada nu mapakalinno i paningadda ta baggida.

  Kagian na Biblia nga mamattuyag nittam i kapurueba ira anna mangiyawa danatun tu pasensia tam nga magattam. (Santiago 1:2-4) Yatutta uffunan i ána mu nga realistiko nakuan i paningadda ta nakkamaliadda ira tapenu ari kuruga ira madismaya.

  Nu tudduammu i ána mu nu anni i kuadda nu mariga i situasion, gittana tuttudduammu ira tu tadday nga skill—kawagan i tiempo anna appursigi tatun. Ngem sulit gapa yatun jebi sonu dumakal ngana ira. “Nu ammu na abbarabbing i kuadda nu makkaproblema ira, mas baddi i tiansa nga mangngua ira tu gannug nga mamappeligro nira,” kagian na libru nga Letting Go With Love and Confidence. “Mas preparadu ira sonu meparubang ira ta bagu onu ari ekspektan ira nga situasion.” Makoffun paga yatun nira adde sonu pagadultoda.

Tip: Daddamman, magigiammu na ana mu nu kunnasi nga arubangan i problema[da] ira nu mangipasingak[ka] tu makasta nga ehemplo.