Ari nga usan na Biblia i uvovug nga “aborsion” tapenu tukuyan i sadya nga pappalsa tu vussi. Ngem aru nga teksto ta Biblia i mangipasingan ta pagimamma na Dios ta inango na tolay, nelagum ngana i abbing nga ari paga neyana.

 Regalu na Dios i inango. (Genesis 9:6; Salmo 36:9) Nabalor nisa i ngamin nga inango, maski i inango na abbing nga egga pagalaman ta san. Yayya nga nu sinadya na tolay nga patayan i abbing nga ari paga neyana, mebilang yatun nga pamapatay.

 Kunnaw i Dob na Dios ta Israelita ira: “Nu egga i mallaban nga dua nga tolay anna madisgrasiada i mavussi nga babay anna mapa-ana nga awan paga ta kaggawanna ngem awan tu natay, mawag tu pagan na nakadisgrasia i danios nga ipapaga sa na atawa na babay; anna mawag tu paganna yatun segun ta nadisidi na hues ira. Ngem nu egga i natay, mawag tu mappaga ka tu inango para ta inango.”—Exodo 21:22, 23. a

•  Kanni nga mamegafu i inango na tolay?

•  Pakoman kari na Dios i tadday nga dati nga nappalsa tu vussi?

•  Puede kari i aborsion nu mappeligro i inango na yena onu na abbing?

 Para ta Dios, mamegafu i inango oras tu mavussi ngana i babay. Ta Biblia, kanayun nga ibilang na Dios nga tolay ngana i ari paga neyana nga abbing. Yaw i karuan ta mamakurug nga para ta Dios, awan tu nadduman na inango na abbing nga egga pagalaman ta san ta inango na abbing nga neyana ngana.

•   Kinagi ni Patul David ta Dios: “Ari ngà paga neyana ay nasingam-mà ngana.” (Salmo 139:16) Maski nu ari paga neyana si David, tolay ngana i paningan nisa na Dios.

•   Ammu ngana na Dios nga egga i espesial nga pangusanna ta profeta nga si Jeremias nige paga yayya nga meyana. Kinagi na Dios nisa: “Ammammu taka ngana nige taka paga nga finorma ta san, anna pinili taka ngana nige ka paga nga neyana. Pinabbalin taka tu profeta na nasa-nasion.”—Jeremias 1:5.

•   Inusa gapa na tadday nga gumattura ta Biblia nga si Lucas, nga tadday nga doktor, i parefu nga Griego nga uvovug tapenu tukuyan i abbing nga ari paga neyana anna i abbing nga keyana pagalaman.—Lucas 1:41; 2:12, 16.

 Awayyana nga pakoman na Dios danuri dati nga nappalsa tu vussi. Nu pariganna ngana sangawe i anningan na Dios ta inango, ari ngana yayya nga mawag tu makonsensia. “I YAFU [nga Jehova] ay minaggallallo anna minangngaya kuruga . . . Nu kunnasi i karayyu na zigattu ta taggappan, kunnatun i kadakal na pamakoma na nittam.” b (Salmo 103:8-12) Pakoman ni Jehova ngamin danuri napafutuan nga mabbabbabawi ta nakaliwatadda ira, nelagum ngana i aborsion.—Salmo 86:5.

 Base ta kakkagian na Biblia meyannung ta inango na abbing nga ari paga neyana, ari nga mepangngo nga mappalsa tu vussi i tadday megafu ta posible nga peligro ta gawa-gawayyan na yena onu na abbing.

 Ngem kunnasi nu egga i emergency ta mismu nga oras na pagana tapus mawag nga mappili nu sinni ta yena onu ta abbing i matolay? Personal nga desision yatun danuri na egga ta kunnatun nga situasion.