Egga Kari i Dios ta Ngamin nga Lugar?

I-PLAY

I tabbag na Biblia

Masingan na Dios i ngamin anna mawayyana nga kuan i kayàna maski sitaw. (Proverbio 15:3; Hebreo 4:13) Ngem ari nga ituddu na Biblia nga i Dios ay egga ta ngamin nga lugar anna gannug. Ituddu na Biblia nga tadday nga persona i Dios anna egga i paddiananna.

Nu anni i Dios: I Dios ay espiritu. (Juan 4:24) Ari yayya masingan na totolay. (Juan 1:18) I nakarekord ta Biblia nga sirmata ira meyannung ta Dios, ipasinganna nga egga i paddianan na Dios. Ari vuluvuga nakagi nga egga ta ngamin nga lugar i Dios.—Isaias 6:1, 2; Nepakannammu 4:2, 3, 8.
I paddianan na Dios: Maddian i Dios ta lugar na espiritu ira. Tanakuan yatun ta paddianan na naparatu ira. Maddian i Dios “ta langi.” (1 Patul Ira 8:30) Kinagi na Biblia nga egga i tiempo nga “siminallung . . . tapenu umarubang kani Jehova” i espiritu ira nga naparatu. a Ipasingan natun nga egga i paddianan na Dios.—Job 1:6.

Moffunannà kari na Dios nu egga laman yayya ta tattadday nga lugar?

Wan. Ikavurungan na Dios i kada tadday nittam. Maski nu egga yayya ta lugar na espiritu ira, masingan na Dios i totolay nga mattuttuppal nisa, anna uffunanna ira. (1 Patul Ira 8:39; 2 Cronicas 16:9) Innan nu kunnasi ipasingan ni Jehova i pangikavurungna ta napafutuan i paddayawda nisa:

Nu makimallo ka: Ginnan naka ni Jehova nu makimallo ka.—2 Cronicas 18:31.
Nu madepres ka: “Aranni i YAFU ta makafi i nono da; arian na nga pagurayan danuri i awan tu iddanama.”—Salmo 34:18.
Nu kawagammu i pangigiya: ‘Tudduan anna tabarangngan’ naka ni Jehova gukaban na Uvovugna, i Biblia.—Salmo 32:8.

I abbo na totolay meyannung ta Dios

I abbo na totolay: I Dios ay egga ta ngamin nga pinaratuna.

I kurug: Ari nga maddian ta davvun onu maski sitaw ta uniberso i Dios. (1 Patul Ira 8:27) Kurug nga i bitun anna i karuan ira nga pinaratu ‘ipamammada i gloria na YAFU.’ (Salmo 19:1) Ngem ari nga maddian i Dios ta pinaratuna, nu kunnasi nga i tadday nga pintor ay ari nga maddian ta painting na. Ngem egga i magigiammu tam meyannung ta pintor nu innattam i painting na. Magigiammu tam gapa i “ari nga masingan” nga kualidad na Namaratu kagitta na pakapangngua, ka-uto, anna aya nu innattam i pinaratuna ira.—Roma 1:20.

I abbo na totolay: Siguradu nga egga i Dios ta ngamin nga lugar megafu ta ammuna i ngamin nga gannug anna Makapangngua-sa-ngamin yayya.

I kurug: Usan-usan na Dios i masanto nga espiritu onu aktibo nga fuersana. Gukaban na masanto nga espiritu na Dios, mawayyana nga ammuan anna kuan i maski anni, ta maski sitaw, anna maski anni nga oras, maski nu awan yayya mismu tatun nga lugar.—Salmo 139:7.

I abbo na totolay: Ituddu na Salmo 139:8 nga egga ta ngamin nga lugar i Dios megafu ta mabibbig tatun: “Nu ta langi i ek-ku angayan, egga ka tari gammabbalaman; nu umay ngà ta dian na natay ira, tari gabbalaman ay egga ka gapa!”

I kurug: Ari nga tukuyan naw nga teksto nu sitaw i paddianan na Dios. Ikakkagina laman nga maski ta karayyuan onu kononaggan nga lugar, mawayya ittam nga uffunan na Dios.

a Jehova i ngagan na Dios nga nepakannammu ta Biblia.