Kanayun makagi ta Biblia nga “Ana na Dios” si Jesus. (Juan 1:49) Ipasingan na uvovug nga “Ana na Dios,” nga i Dios i Namaratu, onu Paggafuan, na ngamin nga inango, nelavu si Jesus. (Salmo 36:9; Nepakannammu 4:11) Ari ituddu na Biblia nga literal nga nakka-ana i Dios nga kagitta na totolay ira.

 Kagian gapa na Biblia nga “ána na kurug nga Dios” i anghel ira. (Job 1:6) Kagian na Biblia nga “ana na Dios” i ollu nga tolay nga si Adan. (Lucas 3:38) Ngem megafu ta si Jesus laman i ollu anna direkta nga pinaratu na Dios, kagian na Biblia nga yayya i pinaka-kaka nga Ana na Dios.

•  Nattolay kari si Jesus ta langi nige na neyana ta davvun?

•  Anni i kingngua ni Jesus nige na minay taw ta davvun?

 Wan. Espiritu nga pinaratu ta langi si Jesus nige na nga neyana tu tolay ta davvun. Kinagi mismu ni Jesus: “Naggafu ngà ta langi.”​—Juan 6:38; 8:23.

 Pinaratu labbi na Dios si Jesus nige na nga pinaratu i ngamin. Meyannung kani Jesus, kagian na Biblia:

•   “Yaya i kaka nga Ana na Dios.”​—Colosas 1:15.

•   “Yaya i naggafuanan na ngamin nga pinaratu na Dios.”​—Nepakannammu 3:14.

 Sinuppal ni Jesus i profesiya “nga i naggafuan na ay ta ollollu paga nga tiempo, ta ollu paga nga aggaggaw.”​—Mikias 5:2; Mateo 2:4-6.

 Atannang i posision na ta langi. Yatun i tukuyan na nga posision turi ta nipakimallo na nga: “Ay sangoye Ama, iddam-mà tu dayaw . . . ta kunna nipangiyawa mu niakan ta dayaw gari ta keggà nikaw nage na nikaparo na mundo.”​—Juan 17:5.

 Inuffunan na i Yama na ta pamaratu ta ngamin paga nga ganna-gannug. Nakipattrabahu si Jesus ta Dios “bilang malalaki nga trabahador.” (Proverbio 8:30) Meyannung kani Jesus, kagian na Biblia: “Ta gafu sa, naparo ngamin i ganna-gannug nga egga ta langi tuange ta utun na davvun.”​—Colosas 1:16.

 Nakipattrabahu i Dios kani Jesus ta pamaratu ta ngamin nga ganna-gannug. Nelavu tatun i anghel anna i pisikal nga uniberso. (Nepakannammu 5:11) Negitta i pakipattrabahu na Dios kani Jesus ta architect anna karpinteru. I architect i mamadday ta disenio; i karpinteru gapa i mamataddag tatun.

 Yayya gapa i Uvovug. Nu meyannung ta pattolay ni Jesus ta davvun, kagian na Biblia nga yayya “i Uvovug.” (Juan 1:1) Kaya na kagian nga inusa na Dios i Ana na tapenu ikagi i informasion anna instruksion ta anghel ira.

 Nabbalin gapa si Jesus ta Pannakasimu na Dios ta totolay ira ta davvun. Awayya na nga niyusa na Dios si Jesus bilang i Uvovug turi ta nangiyawa yayya tu instruksion kani Adan anna Eva ta hardin na Eden. (Genesis 2:16, 17) Awayya na gapa nga si Jesus i anghel nga nangigiya ta Israelita ira ta katanapan anna i anghel nga mawag nga ginnadda.​—Exodo 23:20-23. a