Niprofesiya na Biblia nga ta pangurianan ira nga aggaw, egga ira i epidemia nga mawwara ta aru nga lugar anna magalan gapa tu pandemic. (Lucas 21:11) I kunnatun ira nga pandemic ay ari tu parusa onu panentensia na Dios. I kurug, gukaban na Pappatulan na Dios, arannina ngana nga pawanan i ngamin nga problema ta gawa-gawayyan, nelagum tatun i pandemic ira.

•  Niprofesiya kari na Biblia i pandemic ira?

•  Sinentensian ngana kari na Dios i totolay tu taki tagga?

•  Parusa onu panentensia kari na Dios i pandemic ira sangawe?

•  Mapawan paga kari i pandemic ira?

•  Teksto ira ta Biblia meyannung ta taki

 Ari nga niprofesiya na Biblia i espesipiko ira nga pandemic onu taka-taki kagitta na COVID-19, AIDS, onu Spanish flu. Ngem niprofesiya naw i “tulu-tulagan” onu kappatay ira nga taki. (Lucas 21:11; Nepakannammu 6:8) Yaw ira nga mesimmu ay seniales na “pangurianan ira nga aggaw” nga magalan gapa tu “panuppalan” na sistema na ganna-gannug.​—2 Timoteo 3:1; Mateo 24:3.

 Nerekord ta Biblia nga egga ira i sinentensian na Dios tu taki. Angngariganna, pinallepprosona i karuan. (Numeros 12:1-16; 2 Patul Ira 5:20-27; 2 Cronicas 26:16-21) Ngem ari tu nawwara yaw ta inosente ira nga totolay. Lallagu, espesipiko danaw nga pamanunnu ta totolay nga narrebelde ta Dios.

 Akkan. Kagian na karuan nga usu-usan na Dios i pandemic ira anna i karuan paga nga taki tapenu sentensian i totolay sangawe. Ngem ari tu kunnatun i kagian na Biblia. Ta ngatta?

 Mattaki gapa i karuan ira nga massesserbi ta Dios ta nappasa anna ta maddaggun. Maruddu paga lagu nga mattaki i matalo nga si Timoteo. (1 Timoteo 5:23) Ngem awan tu nakagi ta Biblia nga seniales yaw nga kalussaw yayya na Dios. Kagitta natun, mattaki gapa sangawe i karuan ira nga matalo nga massesserbi ta Dios. Posible nga nekanna laman yatun.​—Eclesiastes 9:11.

 Ituddu paga na Biblia nga ari paga zimittal i tiempo nga sentensian na Dios i marake ira. Mattotolay ittam lallagu ta “aggaw na pamaliag”​—i tiempo nga iimbitan na Dios i ngamin nga totolay nga umaranni ta nisa tapenu mapaliag ira. (2 Corinto 6:2) Iimbitan na Dios i totolay gukaban na interu mundo nga pangilayyagayya ta makakkasta nga mensahe​—i “Mapia nga Dumug na Pammaguray [onu, Pappatulan] na Dios.”​—Mateo 24:14.

 Wan. Niprofesiya na Biblia nga araranni ngana i tiempo nga awan ngana tu mattaki. Sonu mammaguray ngana i Pappatulan na Dios, pammapianna i ngamin nga taki. (Isaias 33:24; 35:5, 6) Pawananna i pazziga-riga, paddaging, anna patay. (Nepakannammu 21:4) Paginnolayanna gapa i natay ira tapenu mattolay ira nga makasta i gawa-gawayyadda taw ta davvun nga perfekto i paddia-paddian.​—Salmo 37:29; Kingngua 24:15, NW.

 Nepakannammu 6:8: “Nasingak-ku i kabayu nga makangila anna egga i agga-takay sa nga mangagan tu Patay, anna tunu-tunuran ni Hades [onu, Attanamman]. Neddan ira ta pakawayya . . . tu papatayad-da i totolay ta . . . tulagan.”

 I kayàna kagian: Ipasingan na profesiya meyannung ta appa nga nakakabayu ta Nepakannammu nga mesimmu i pandemic ira ta tiempo tam.