Ari. Kagian na Biblia nga ta Dios tam laman nakuan nga maddasal, ta ngagan ni Jesus. Kinagi ni Jesus ta disipulosna: “Kunnoye gafu i akkimallo nu: ‘Ama mi nga egga ta langi, marayaw paray i ngagam-mu.’” (Mateo 6:9, I Bagu nga Pakkasinabban Anna Salmo Ira) Awan vuluvuga tu nibilin ni Jesus ta disipulosna nga maddasal ira ta santo ira, anghel ira, onu ta maski sinni fuera ta Dios.

 Kinagi gapa ni Jesus ta tagatuttulna ira: “Sakan i dalan, i kurug, anna inango. Awan tu makangay ta Yama nu ari labbi nga umay niakan.” (Juan 14:6, I Bagu nga Pakkasinabban Anna Salmo Ira) Si Jesus laman i niddan na Dios tu autoridad nga mangipepakimallo para nittam.—Hebreo 7:25.

Puede kari nga maddasal ngà ta Dios tapus maddasal ngà gapa ta santo ira?

 Mabibbig ta tadday ta Mafulu nga Dob na Dios: “Sakan, i YAFU, i Dios mu, ay mangavuvu nga Dios.” (Exodo 20:5, New American Bible) Kunnasi nga “mangavuvu” i Dios? Kagian na footnote na New American Bible nga i Dios ay “mangikiddaw tu napakatadday nga kinamatalo.” Ikikkiddaw na Dios nga ta nisa laman nakuan nga meyawa yatun nga kinamatalo onu paddayaw nelagum ngana i paddasal.—Isaias 48:11.

 Mapalussaw tam i Dios nu maddasal ittam ta maski sinni, maski ta santo ira onu ta masanto ira nga anghel. Turi ta pinurueban ni apostol Juan nga dayawan i tadday nga anghel, finugaddan yayya na anghel nga kunna: “Ariam-mu nga kuan i kunnatun ta doroban ngà nga kagittam, anna kagitta na wawwagim ira nga namakurug ta meyannung kani Jesus. I Dios i daya-rayawam-mu!”—Nepakannammu 19:10, I Bagu nga Pakkasinabban Anna Salmo Ira.