Ari tu i Dios i makagafu ta natural ira nga kalamidad nga mesissimmu, nu ari ikavurungan na danuri totolay nga afektan natun. Pangultimuan na Pappatulan na Dios i ngamin nga makagafu ta pazziga-riga, nelavu tatun i natural ira nga kalamidad. Sangawe, mangiyawa i Dios tu banna-bannay turi ira ta nafektan na natural ira nga kalamidad.​—2 Corinto 1:3.

•  Ngatta makasiguradu ittam nga ari tu maggafu ta Dios i natural ira nga kalamidad?

•  Ipasingan kari na natural ira nga kalamidad nga mattotolay ittam ngana ta pangurianan ira nga aggaw?

•  Kunnasi nga uffunan na Dios i nafektan ira na natural ira nga kalamidad?

•  Makoffun kari i Biblia tapenu makapapprepara ta natural ira nga kalamidad?

•  Teksto ira na Biblia nga mamanna-bannay ta nafektan na natural ira nga kalamidad

 Tanakuan i pinangusa na Dios ta natural ira nga fuersa nga mabbibbig ta Biblia, kumpara ta natural ira nga kalamidad.

•   Awan tu pilian na natural ira nga kalamidad. Ngem mabbibbig ta Biblia nga nu usan na Dios i natural ira nga fuersa, siguraduan na nga danuri laman i marake i daralan na. Angngarigan na, turi ta zinaral na Dios i siudad na Sodoma anna Gomora, nipaliag na i matalo nga si Lot anna i dua nga ana na nga babay. (Genesis 19:29, 30) Turi ta binibbig na Dios i futu na totolay tatun nga tiempo, zinaral na laman danuri marake.​—Genesis 18:23-32; 1 Samuel 16:7.

•   Gavva laman i paddattal na natural ira nga kalamidad. Ngem i Dios, mangiyawa labbi yayya tu abiso ta marake ira nga totolay nige na nga usan i natural ira nga fuersa kontra ta nira. I totolay nga magginna, egga i oportunidad da nga mapaliag.​—Genesis 7:1-5; Mateo 24:38, 39.

•   Nu mittan i totolay i makagafu ta natural ira nga kalamidad. Kunnasi? Megafu ta panaral da ta pallevu anna pappataddag ta lugar ira nga maruddu nga mallunig, mabbaha, anna mabbagiu. (Nepakannammu 11:18) Ari tu i Dios i makalliwa ta marake nga resulta na kingngua na totolay.​—Proverbio 19:3.

 Wan, neprofesiya ta Biblia nga egga noka i mesimmu ira nga kalamidad ta “panuppalan na sistema na ganna-gannug,” onu ta “pangurianan ira nga aggaw.” (Mateo 24:3, NW; 2 Timoteo 3:1) Angngarigan na, kinagi ni Jesus nga ta kaggawattam: “Mabbisin i totolay, anna mallunig ta madduma-ruma nga lugar.” (Mateo 24:7) Ta mappange, alsan noka na Dios i ngamin nga makagafu ta taki anna pazziga-riga nelavu i natural ira nga kalamidad.​—Nepakannammu 21:3, 4.

•   Banna-bannayan na Dios i nafektan ira gukaban na Uvovug na, i Biblia. Ipasiguradu na Biblia nga ikavurungan ittam na Dios anna masingan na i pazziga-riga nga matageno tam. (Isaias 63:9; 1 Pedro 5:6, 7) Mabibbig gapa tatun i promesa na nga duttal noka i tiempo nga awan ngana vuluvuga tu mesimmu nga natural ira nga kalamidad.​—Innan i “ Teksto ira na Biblia nga mamanna-bannay ta nafektan na natural ira nga kalamidad.”

•   Uffunan na Dios i nafektan ira gukaban na aripan na ira. Paparigan na aripan ira na Dios i ehemplo ni Jesus. Neprofesiya nga banna-bannayan ni Jesus danuri nabigaran i futu da anna ngamin nga maraddam. (Isaias 61:1, 2) Ikaguman gapa na aripan ira na Dios nga kuan i kunnatun.​—Juan 13:15.

   Usu-usan gapa na Dios i aripan na ira tapenu mangiyawa tu praktikal nga uffun ta nafektan na natural ira nga kalamidad.​—Kingngua 11:28-30; Galacia 6:10.

 Wan. Maski nu ari nga netura i Biblia tapenu iprepara ittam ta natural ira nga kalamidad, egga ira i prinsipio natun nga makoffun nittam. Angngarigan na:

•   Planowammu i kuammu nu egga i duttal nga kalamidad. Kagian na Biblia: “Masingan na ma-uto i peligro anna mattagu yayya.” (Proverbio 22:3) Mawag nga egga i emergency plan nu. Nelavu tatun i pangiprepara tu emergency kit anna praktisan nu na familiam nu sitaw kamu massirimmu nu egga i mesimmu nga kalamidad.

•   Mas tagibalorammu i inango mu anne ta pakkukuam. Kagian na Biblia: “Ta anni kari i niyangay tam toye ta utun na davvun? Awan! Ay awan gapa tu mevulu tam noka nu matay ittam!” (1 Timoteo 6:7, 8) Mawag nga sigga-paran ittam nga panawan i balay tam anna pakkukua tam tapenu mapaliag ittam ta kalamidad. Kanayuttam nga daddamman nga mas importante i inango tam anne ta maski anni nga material nga gannug.​—Mateo 6:25.