Ari. Ipasingan na dana nga manuskrito ira nga ari nanguli i Biblia maski nu namippiga nga nakopia yatun ta rinivu nga dagun ta materiales nga mabi madaral.

 Rinivu nga dana nga manuskrito na Biblia i nadiskubre. Egga i nadduman na karuan tatun nga mangipasingan nga egga gapa i mali ta pinakkopiada. Ngem simple laman ira yatun nga kamali anna ari nga nanguli i kebalinan na teksto ira. Egga gapa i karuan nga nadiskubre nga sinadyada nga talianan tapenu mauli i mensahe na Biblia. Ikonsidera i dua nga angngarigan:

1.   Kunnaw i transleysion na karuan nga dana ira nga version na Biblia ta 1 Juan 5:7: “ta langi, i Yama, i Uvovug, anna i Espiritu Santo: tattadday laman yaw nga tallu.” Ngem awan yatun ta mapattalakkan ira anna orihinal nga manuskrito. Neyammung laman yatun. a Yatutta ari nga nepay yatun ta mapattalakkan nga moderno nga transleysion na Biblia.

2.   Ta dana nga manuskrito ira na Biblia, rinivu nga beses nga mabibbig i personal nga ngagan na Dios. Ngem sinalian yatun na aru nga transleytor na Biblia ta titulo nga “Yafu” onu “Dios.”

 Sangawe, aru ngana i nadiskubre nga manuskrito. Yatutta alistu ngana laman nga malegan nu egga i kamali. b Kunnasi pakurugan na pangikumpara taw ira nga dokumento nga fustu i mabibbig tam ta Biblia sangawe?

•   Kunnaw i kinagi na iskolar nga si William H. Green ta Hebreo nga Katurakan (gagangay nga magalan tu “Dana nga Pakkasinabban”): “Makagi tam nga awan tu dana nga pabbibbigan nga kunnatun ka-eksakto i nikeyaddena nittam.”

•   Nitura na iskolar na Biblia nga si F. F. Bruce meyannung ta Cristiano nga Griego nga Katurakan, onu “Bagu nga Pakkasinabban”: “Aru nga ebidensia i massuporta nga fustu i Bagu nga Pakkasinabban nga katurakan anne ta nitura na autor ira gari, ngem awan vuluvuga tu nanguestion ta niturada ira.

•   Kinagi ni Sir Frederic Kenyon, tadday nga respetadu nga maggigiammu ta manuskrito na Biblia nga “awayya tammikan na tadday i interu nga Biblia ta limana anna sigga-komfiansa nga ikagina nga egga nisa i kurug nga Uvovug na Dios, ari nanguli yatun maski nepasa yatun ta aru nga henerasion ta unag na rinivu nga dagun.”

•   Nitura lagapa na gumakkopia ira nga Judio anna Cristiano i kamali ira nga kingngua gari na totolay ira na Dios. c (Numeros 20:12; 2 Samuel 11:2-4; Galacia 2:11-14) Niturada gapa i pangondena ta nasion na Judio ira megafu ta ariadda panuttul anna ta pinadda-paddeda ira nga doktrina. (Oseas 4:2; Malakias 2:8, 9; Mateo 23:8, 9; 1 Juan 5:21) Ipasingan na pakkopiada tatun ira nga rekord nga mapammakatalakkan ira anna egga i dakal nga pangirespetoda ta sagradu nga Uvovug na Dios.

•   Rasonable gafu nga nonopan nga nu naggafu ta Dios i mensahe na Biblia, siguradu nga pattalupaddiananna nga fustu yatun. d (Isaias 40:8; 1 Pedro 1:24, 25) Kayàna nga mabenefisiowattam gapa ari laman tu i totolay ira gari. (1 Corinto 10:11) Kakuruganna, “ngamin i egga ta Masanto nga Tura ay netura tapenu matudduan ittam nga magiddanama gafu ta pappasa-pasensia anna kapasikan na nono nga maggafu ta Masanto nga Tura.”​—Roma 15:4.

•   Nu mangikagi si Jesus anna i tagatuttulna ira ta parte na Hebreo nga Katurakan, ari ira mavurung nga baka ari tu fustu yatun nga teksto ira.​—Lucas 4:16-21; Kingngua 17:1-3.