Niyusa Kari na Dios i Ebolusion Tapenu Mamaratu?
I tabbag na Biblia
Ari. Kinagi na Biblia nga pinaratu na Dios i totolay, anna i ngamin nga “klase” na ayam anna mulu-mula. a (Genesis 1:12, 21, 25, 27; Nepakannammu 4:11) Kagianna gapa nga naggafu i ngamin nga totolay kani Adan anni Eva, i ollollu nga magana tam. (Genesis 3:20; 4:1) Ari nga suportan na Biblia i teoria nga niyusa kanu na Dios i ebolusion tapenu mamaratu tu nadduruma nga klase na inango. Ngem ari gapa nga kontran na Biblia i kagian na siensia nga egga i nadduruma nga klase na kada tadday nga pinaratu.
Niyusa kari na Dios i ebolusion?
Nadduruma i kurugan na totolay nu kunnasi niyusa na Dios i ebolusion tapenu mamaratu. Kagian na Encyclopædia Britannica nga kurugan na karuan nga “niyusa na Dios i natural selection ta pamaratu.”
Ituddu gapa na ebolusion yaw ira nga ideya:
Ta gafa-gafuna, tattadday laman i naggafuan na ngamin nga matolay nga organismo.
Mawayya na tadday nga pinaratu i ma-evolve, anna luttuag i tanakuan nga klase na inango.
I Dios i nagangngua tatun ira nga proseso.
Suportan kari na Biblia i ebolusion?
Gittana kakkagian na ebolusion nga ari tu fustu i rekord na Biblia ta Genesis meyannung ta pamaratu. Ngem pinakurug ni Jesus nga fustu i mabibbig ta Genesis. (Genesis 1:26, 27; 2:18-24; Mateo 19:4-6) Kagian na Biblia nga nige minay ni Jesus ta davvun, naddian yayya ta langi kavulu i Dios anna nakipattrabahu yayya ta Dios tapenu maparatu “ngamin i ganna-gannug.” (Juan 1:3) Ari gafu suportan na Biblia i tuddu nga niyusa na Dios i ebolusion tapenu mamaratu tu nadduruma nga klase na inango.
I abilidad kari na mulu-mula anna aya-ayam nga manguli tapenu matolay ay tadday nga angngarigan na ebolusion?
Ari kinagi na Biblia nu kunnasi i karu na klase na tadday nga klase na inango. Ngem arianna gapa kontran i kinakurug nga i nadduruma nga klase na ayam anna mulu-mula nga pinaratu na Dios ay mangulu-uli nu mappa-aru ira onu nu mattolay ira ta bagu nga pallevu. Aru i mangurug nga ebolusion yatun nga panguloli. Ngem kakuruganna, awan tu bagu nga klase na inango i limittuag.
a Niyusa na Biblia i uvovug nga “klase” nga mas alawa i kebalinanna anne ta uvovug nga “species” nga niyusa na sientista ira. Nu mittan, kakkagian na sientista ira nga egga i bagu nga species nga na-evolve. Ngem kakuruganna, tadday laman yatun ta aru nga klase na pinaratu nga nakagi ta Genesis.
Baka Kaya Mu Gapa i
NABALOR IRA NGA TUTTUDDU TA BIBLIA
Naparatu Kari i Uniberso?
Ari nga malippawa na aru nga totolay i kagian na Biblia meyannung ta pamaratu anna kakkagiadda paga lagu nga pinadda-padday laman nga istoria yatun. Kurug kari i kagian na Biblia?
GAGANGAY IRA NGA PAKKIAVU
Mangurug Kari i Saksi ira ni Jehova ta Creationism?
Ammum kari nga mekontra ta Biblia i karuan nga kurugan na creationist ira?
MEYANNUNG NIKAMI
Mar-request tu Egga Mabbisita Nikaw
Pabbidan i tadday nga pakkiavu meyannung ta Biblia, onu mas paga nga ammuan i meyannung ta Saksi ira ni Jehova.