Wan. Ikavurungan na Dios i aripanna ira nga mataki. Kunnaw i kagian na Biblia meyannung tatun: “I YAFU i manguffun sa nu egga i taki na.” (Salmo 41:3) Nu egga i grabe nga taki mu, mabanna-bannayakka nu kuammu i tumunug ira nga suhestion:

1.   Makimallo tapenu egga sikammu nga magattam. Malawa mu i ‘imammo na Dios nga ari malippawa na tolay’ tapenu ari ka kuruga mavurung anna ari makkafi i nono mu.​—Filipos 4:6, 7.

2.   Mabbalikka tu positibo. Kunnaw i kagian na Biblia: “Nu magayayya ka, magawa-gawayyakka. Nu agga-muzzu ka, sisinu ka nga matay.” (Proverbio 17:22, Good News Translation) Gumalo ka anna mappagalo ka gapa tapenu malappawan i panageno mu anna makkasta i gawa-gawayyammu.

3.   Magiddanama ka ta mappange. Makoffun yatun tapenu magayayya ka maski nu egga i grabe nga taka-taki mu. (Roma 12:12) Niprofesiya na Biblia nga “awan noka tu maski sinni nga mangikagi: ‘Mataki ngà.’” (Isaias 33:24) Alsan noka na Dios i grabe nga taka-taki nga ari moruan na moderno nga siensia. Angngariganna, kagian na Biblia nga magabbing anna makkasta noka i gawa-gawayyan na bako anna lakay ira. Kunnaw i kagianna meyannung tatun: “Mas magawa-gawayyan nakuan i pattagna anne turi ta tiempo na kabataanna; manoli i sikanna gitta turi ta kabbinna.”​—Job 33:25.

 Meperaddam: Maski nu mangurug kami nga Saksi ni Jehova ta iyawa na Dios nga uffun, mapporu kami gapa nu egga i grabe nga taki mi. (Marcos 2:17) Ngem ari kami mangirekomenda tu partikular nga klase na papporu megafu ta kada tadday lapa i maddesision meyannung ta gawa-gawayyanna.