Matudduan ittam ta Pakimallo na Yafu nu kunnasi ittam nakuan makimallo anna nu anni i ipakimallo tam. Yatun nga pakimallo i nitabbag ni Jesus taw nga kiddaw na disipulos na ira: “Afu, tudduan nakami bi tu makimallo.” (Lucas 11:1) Ngem ari laman tu i Pakimallo na Yafu, onu i Ama Mi, i pakimallo nga alawatan na Dios. a Niyawa laman yatun ni Jesus nga angngarigan na pakimallo ira nga ginnan na Dios.

Taw nga artikulo

•  Anni kari i mayan na Pakimallo na Yafu?

•  Anni i kayà na kagian na nakagi ira ta Pakimallo na Yafu?

•  I Pakimallo na Yafu laman kari i mepangngo nga dasal?

•  Kunnasi ittam nakuan nga makimallo?

•  I karuan paga nga pakimallo ta Biblia

 Ta karuan nga translation na Biblia, madduruma nga uvovug i pinangi-translate da ta Pakimallo na Yafu nga nerekord ta Mateo 6:9-13. Innattam i dua nga angngarigan.

 New World Translation: “Ama mi nga egga ta langi, mapakasanto paray i ngagammu. Duttal paray i Pappatulammu. Makua paray i urem taw ta davvun nga kagitta na ta langi. Iddan nakami paray tu makan para taw nga aggaw; pakoman nakami ta liwi-liwa mi, ta kunna pamakoma mi ta nakaliwa ira nikami. Arian nakami nga ipamavulun nga matenta, ngem paliaran nakami tari ta marake.”

 I Bagu nga Pakkasinabban na Philippine Bible Society: “Ama mi nga egga ta langi, marayaw paray i ngagam-mu; maparattal paray i Pammagurem. Makua i urem toye ta davvun ta kunne ta langi. Iddan nakami ta kanan nga mawag mi toye nga aggaw; pakoman nakami ta katagaruliam-mi, ta kunna na pamakoma mi ta nakaliwa nikami. Arian nakami nga ipamavulun ta pangakkakka, ngem paliaran nakami ta Marakay.” b

 Konektadu i tuttuddu ira ni Jesus ta karuan paga nga tuttuddu na Biblia. Makaduffun danatun tapenu malippawa tam i kayà na kagian na nakagi ira ta Pakimallo na Yafu.

“Ama mi nga egga ta langi”

 Mepangngo laman nga agalattam i Dios tu “Ama” ta pinaratu na ittam anna niddan na ittam tu inango.—Isaias 64:8.

“Mapakasanto paray i ngagammu”

 Mawag tu medayaw anna mebilang tu masanto, onu sagradu, i ngagan na Dios nga Jehova. Mapakasanto na totolay i ngagan na Dios nu ikagi da ta tanakuan i kualidad na anna i gakkag na ira.—Salmo 83:18, NW; Isaias 6:3.

“Duttal paray i Pappatulammu”

 I Pappatulan na Dios ay tadday nga gobiernu ta langi nga si Jesus i Patul na. Sinudduan ittam ni Jesus nga ipakimallo tam nga mammaguray ngana nakuan ta interu mundo yatun nga gobiernu.—Daniel 2:44; Nepakannammu 11:15.

“Makua paray i urem taw ta davvun nga kagitta na ta langi”

 Awan tu marake onu patay ta langi. Uray gapa na Dios taw ta davvun nga mattolay ittam tu mannanayun nga memammo anna egga i seguridad na.—Salmo 37:11, 29.

“Iddan nakami paray tu makan para taw nga aggaw”

 Ariattam nakuan vuluvuga nga kattaman nga maggafu ta Namaratu nittam i kanattam anna i karuan paga nga pakawagattam tapenu mattolay ittam.—Kingngua 17:24, 25.

“Pakoman nakami ta liwi-liwa mi, ta kunna pamakoma mi ta nakaliwa ira nikami”

 Makaliwa i ngamin nga totolay, yari tu mawag tam i pamakoma. Ngem tapenu pakoman ittam na Dios, mawag tu pakomattam gapa danuri nakaliwa ta nittam.—Mateo 6:14, 15.

“Arian nakami nga ipamavulun nga matenta, ngem paliaran nakami tari ta marake”

 Ari ittam vuluvuga nga tentan ni Jehova nga Dios nga magangngua tu marake. (Santiago 1:13) Ngem tettentan ittam ni Satanas nga Diablo—yayya yari nakagi nga “marake” anna nadeskriba nga “Minannenta.” (1 Juan 5:19, NW; Mateo 4:1-4, NW) Ipakimemallo tam kani Jehova nga duffunan na ittam nga ari nga matenta nga magangngua tu marake.

 Nituddu ni Jesus i Pakimallo na Yafu bilang angngarigan. Ari nakuan tu medasal yatun nga entoto. Kunnaw paga lagu i nitabarang ni Jesus nige na nga nituddu i Pakimallo na Yafu: “Nu makimallo kamu, arian nu nga itotoli i kakkagian nu.” (Mateo 6:7, NW) Turi ta nituddu mana uli ni Jesus nu kunnasi i makimallo, nangusa yayya tu tanakuan ira nga uvovug.—Lucas 11:2-4.

 Nu maddasal ittam gafu, mas makakkasta nu ikagi tam nu anni talaga i mayan na futu tam.—Salmo 62:8.

 Makakkasta nga angngarigan i Pakimallo na Yafu nu kunnasi i maddasal nga ginnan na Dios. Suportan yatun na karuan paga nga teksto ira ta Biblia meyannung ta pakimallo.

•   Ta Dios laman nga makimallo

   Kagian na Biblia: “Ta ngamin nga pakimallo nu nga kanayun nga mavulunan ta pabbala-balo, kiddawan nu ta Dios i mawag nu.”—Filipos 4:6.

   I kayà na kagian: Mawag tu ta Dios ittam nga makimallo—ari tu kani Jesus, kani Maria, onu ta santu ira. Ta Pakimallo na Yafu, nakagi i uvovug ira nga “Ama Mi.” Ituddu nittam natun nga kani Jehova nga Dios ittam laman nga makimallo.

•   Ipakimallo tam i gannug ira nga metuttul ta uray na Dios

   Kagian na Biblia: “Ammu tam tu tangngagan na ittam ta anni laman nga kiddawat-tam sa nga metuttul ta uray na.”—1 Juan 5:14.

   I kayà na kagian: Awayya tam nga ipakimallo i anni laman nga metuttul ta uray na Dios. Nituddu ta nittam ni Jesus nu kunnasi ka-importante i uray na Dios ta nilavu na ta Pakimallo na Yafu i “makua paray i urem.” Nu gigiammuattam i Biblia, mammuattam i uray na Dios para ta davvun anna ta totolay.

•   Ipakimallo tam i pakavurungattam ira

   Kagian na Biblia: “Ipammakatalo mu ta YAFU i vuru-vurung mu ira, ay mala mu i pangiyegu na.”—Salmo 55:22.

   I kayà na kagian: Ikavurungan ittam na Dios. Nilavu ni Jesus ta Pakimallo na Yafu i personal ira nga kiddaw. Kayà na kagian, puede tam gapa nga ipakimallo i inaggaw ira nga pakawagattam, i pangigiya na Dios nu magangngua ittam tu importante ira nga desision, i panguffun na ta mariga ira nga tiempo, anna i pamakoma na ta liwa tam ira. c