Kagian na Biblia nga ikaya na Dios nga ‘arayyuan na totolay i seksual nga imoralidad.’ (1 Tesalonica 4:3, NW) Ta Biblia, nelavu ta termino nga “seksual nga imoralidad” i pakilalaki onu pamabay, homoseksual nga annangngua, anna pas-sex na lalaki anna babay nga ari paga kasal.

•  Ngatta importante ta Dios i pappakasal?

•  Mepangngo kari i pal-live-in na mannobio tapenu makannammuan nu makkasundu ira?

•  Kunnasi mapaladda na magatawa i relasiodda?

•   Naggafu ta Dios i unnug na pagatawa. Nigafuna yatun turi ta pinavvuluna i ollu nga magatawa. (Genesis 2:22-24) Arianna nga ginakkag nga makkavulu i lalaki anna babay nga ari kasal.

•   Ammu na Dios i kapianan para ta totolay. Niyunnugna i pagatawa nga permanente nga pavvulu na lalaki anna babay para ta pammakapianan anna proteksion na ngamin nga miembro na familia. Ikonsidera i simple nga ilustrasion. Makabuu ka tu tadday nga kabinet nu tuttulammu i manual nga naggafu ta manufacturer. Kunnatun gapa ta pagatawa, magayayya i familianu nu tuttulannu i instruksion na Dios. Kanayun nga mammakapia i tumuttul ira ta dorob na Dios.—Isaias 48:17, 18.

•   Egga ira i marake nga resulta na paki-sex nga ari paga kasal. Angngariganna, awayyana nga marresulta yatun ta ari inekspekta nga pavvussi, taka-taki nga meyali ta paki-sex, grabe nga daddam anna pakkakonsensia. a

•   Niddan na Dios i lalaki anna babay tu abilidad nga makka-ana gukaban na pas-sex. Sagradu i pagimamma na Dios ta inango anna nabalor nga regalu i abilidad nga makka-ana. Kayà na Dios nga respetuattam yatun nga regalu gukaban na pangikakua ta unnug na pagatawa.—Hebreo 13:4.

 Ari mawag nga mal-live-in labbi i mannobio tapenu mabbalin nga magayayya i pagatawada. Kakuruganna, mabbayag i relasiodda nu matalo ira ta kataggi-tadday anna makka-uffun ira tapenu masolba i problema ira. b Paladdan na pakkasal i relasiodda.—Mateo 19:6.

 Awan tu perfekto nga pagatawa. Ngem awayyana nga magayayya i pagatawa nu tuttuladda i tabarang na Biblia. Yaw i karuan tatun:

•   Ipoppollum i kawagan na atawam nige na baggim.​—1 Corinto 7:3-5; Filipos 2:3, 4.

•   Ipasingan i aya anna respeto ta kataggi-tadday.​—Efeso 5:25, 33.

•   Magimmugug ka ta paguvovug mu.—Proverbio 12:18.

•   Mabbalikka tu mapasensia anna insigida nga mamakoma.—Colosas 3:13, 14.