Ari nga para-parehu i ngamin nga relihion. Aru nga relihion i nakagi ta Biblia nga ari makapagayayya ta Dios. Egga i dua nga kategoria naw.

Kategoria 1: Paddayaw ta falsu ira nga dios

 Inusa na Biblia i termino nga “awan tu kwenta na,” anna “awan tu serbi na” tapenu ideskriba i paddayaw ta falsu ira nga dios. (Jeremias 10:3-5; 16:19, 20) Nidob ni Jehova a nga Dios ta nasion na Israel gari: “Ari kamu maddayaw ta maski sinni nga tanakuan nga dios fuera niakan.” (Exodo 20:3, 23; 23:24) Turi ta naddayaw i Israelita ira ta tanakuan nga dios, “nakaporay si Jehova.”​—Numeros 25:3; Levitico 20:2; Ukum Ira 2:13, 14.

 Ari nga nanguli i pagimamma na Dios ta paddayaw turi ira ta ‘magalan tu dios.’ (1 Corinto 8:5, 6; Galacia 4:8) Nibilin na turi ira ta maddayaw ta nisa nga iyemmadda i makikavulu turi ira ta falsu i paddayaw da. Kinagi na: “Panawan nu ira ngana anna mesina kamu nira.” (2 Corinto 6:14-17) Ibilin kari yatun na Dios nu para-parehu mabba i ngamin nga relihion anna iyaranni na i totolay ta Dios?

Kategoria 2: Paddayaw ta kurug nga Dios nga ari makapagayayya nisa

 Egga ira i tiempo nga naddayaw i Israelita ta Dios gukaban na pangurug anna annangngua na falsu nga paddayaw. Ngem ari nga inalawa ni Jehova i paddayaw nga nakkivu i kurug anna falsu. (Exodo 32:8; Deuteronomio 12:2-4) Pinanunnutan ni Jesus i lider ira na relihion ta kaggawan na megafu ta kukukuadda nga paddayaw ta Dios; magappappe ira nga relihioso ngem ‘ariadda nga parulattan i mas importante nga tuttuddu na Dob nga kunne ta katunungan, pagallallo, anna kinamatalo.’—Mateo 23:23.

 Kunnatun gapa sangawe. I relihion laman nga nebase ta kinakurug i mangiyaranni ta totolay ta Dios. Malegan yatun nga kinakurug ta Biblia. (Juan 4:24; 17:17; 2 Timoteo 3:16, 17) I relihion nga mekontra ta Biblia i tuttuddu da ay iyarayyu na i totolay ta Dios. Abbo na totolay nga naggafu ta Biblia i aru nga tuttuddu gitta na Trinidad, imortal nga kararua, anna infiernu. Ngem ngamin danaw ay naggafu ta paddayaw ta falsu ira nga dios. “Awan tu serbi” na kunnatun nga paddayaw megafu ta taliadda tu tradisiodda lagapa i paddayaw nga ikiddaw na Dios.​—Marcos 7:7, 8.

 Ikala-kalussaw na Dios i pagappappe na relihion ira. (Tito 1:16) Tapenu moffunan i totolay nga makaranni ta Dios, mawag nga makoffun i relihion ta inaggaw nga pattolay da, ari laman tu basta ritual onu seremonia ira. Angngarigan na, kinagi na Biblia: “I sinni laman nga magabbo tu relihioso yaya ngem arian na nga fugaddan i zila na, ilogo na laman i baggi na anna awan tu kebalinan na relihion na. I kurug anna marenu nga relihion nga ikaya na Dios Ama ay yaw: i panguffun ta ulila tuange ta balu ira nga babbay ta tiempo na pazziga-riga da, anna i pangililli ta baggi ta marakay nga pattolay toye ta mundo.” (Santiago 1:26, 27) Ta King James Version, neyusa gapa i uvovug nga “marenu nga relihion” para ta ari magappappe nga paddayaw.