I tabbag na Biblia

 Si Daniel ay tadday nga nerumu-ruma nga Judio nga profeta nga nattolay tagga ta mekapitu anna meka-annam nga siglo B.C.E. Niddan yayya na Dios tu abilidad nga mepakanawag i tatageno ira, nipasingan na Dios ta nisa i karuan nga mesimmu ta mappange, anna nipatura na ta nisa i libru na Biblia nga nepangagan ta nisa.—Daniel 1:17; 2:19.

Sinni si Daniel?

 Ziminakal si Daniel ta Juda. Egga tatun nga pappatulan i siudad na Jerusalem anna i templo na Judio ira. Ta 617 B.C.E., sinakup ni Nabucodonosor nga patul na Babilonia i Jerusalem. Niyangay na ta Babilonia “i prominente ira nga tolay ta davvun.” (2 Patul Ira 24:15; Daniel 1:1) Kavulu nga neyangay si Daniel nga posible nga tinedyer paga laman tatun nga tiempo.

 Neyangay ta palasio na Babilonia si Daniel anna i karuan paga nga kabataan nga lallaki (kagitta di Sadrac, Mesac, anna Abednego) tapenu makalawa ira tu espesial nga passanay para ta passerbi ta gobiernu. Maski nafeffersa ira nga ikompromiso i pangurug da, matalo lapa si Daniel anna i tallu nga kofun na ta Dios da nga si Jehova. (Daniel 1:3-8) Kabalin na tallu ragun nga pinassanay da ta nira, zinayaw ira ni Patul Nabucodonosor gafu ta ma-uto anna maabilidad ira. Kinagi na nga “mas malalaki ira tu mamimmafulu anne ta ngamin nga salamangkeru nga papari anna majikeru ta interu pappatulan na.” Pinasserbi na si Daniel anna i kokkofun na ta palasio.—Daniel 1:18-20.

 Nappasa i aru nga dekada, turi ta maturu ngana tu 90 si Daniel, nepagal yayya ta palasio. Nikiddaw ni Belsazar, i mammaguray gari ta Babilonia, nga ipakanawag ni Daniel i tura na lima nga misterioso nga limittuag ta pader. Ta uffun na Dios, nipakanawag ni Daniel nga maffu na Imperio na Medo-Persia i Babilonia. Tatun gabbalaman nga gabi, nasakup i Babilonia.—Daniel 5:1, 13-31.

 Ta pammaguray na Medo-Persia, nabbaling si Daniel tu atannang nga ofisial anna ikaya ni Patul Dario nga iyatannang paga i posision ni Daniel. (Daniel 6:1-3) Gafu ta passil, napplano i ofisiales ira nga itabbo da si Daniel ta avvu na leon ira tapenu matay yayya, ngem nipaliag yayya ni Jehova. (Daniel 6:4-23) Tagga ta aranni ngana nga matay si Daniel, egga i anghel nga nappasingan ta nisa anna mamiddua na nga nipasiguradu kani Daniel nga tadday yayya nga “kuruga nabala-balor nga lalaki.”—Daniel 10:11, 19.

 Girawan i dua nga parte nga drama ta Biblia nga Daniel—Matalo ta Interu Pattolena.