Ituddu na Biblia nga ta ngamin nga naparatu ta davvun, limitadu laman i bilang na totolay nga umay ta langi. (Nepakannammu 14:1, 3) Umay ira tari tapenu mabbalin tu patul anna papari kavulu si Jesus. (Lucas 22:28-30; Nepakannammu 5:9, 10) Magaru nga totolay i mapaginnolay ta paraiso nga davvun.​—Salmo 37:11, 29.

 Awan tu nakagi ta Biblia nga umay ta langi i alaga ira nga ayam onu kitu—egga i rason nu ngatta kunnatun. Ari mawayya na ayam ira i makualipika ta “pagagal na Dios.” (Hebreo 3:1) Megafu ta mawag nga egga i pakannammu, pangurug da, anna tuttuladda i Dios. (Mateo 19:17; Juan 3:16; 17:3) I totolay laman i naparatu nga awayya na mattolay tu mannanayun.​—Genesis 2:16, 17; 3:22, 23.

 Tapenu umay ta langi, mawag nga mapaginnolay uli i pinaratu ira ta davvun. (1 Corinto 15:42) Mabibbig ta Biblia i rekord ira na paginnolay. (1 Patul Ira 17:17-24; 2 Patul Ira 4:32-37; 13:20, 21; Lucas 7:11-15; 8:41, 42, 49-56; Juan 11:38-44; Kingngua 9:36-42; 20:7-12) Ngem tolay i ngamin nga napaginnolay, ari tu ayam.

•  Egga kari i kararua na ayam ira?

•  Matay kari i kararua?

•  Makaliwa kari i ayam ira?

•  Mepangngo kari nga abusowattam i ayam ira?

 Awan. Kagian na Biblia nga kararua i ayam anna tolay ira. (Numeros 31:28) Turi ta naparatu i ollu nga lalaki nga si Adan, awan tu neyawa nisa tu kararua nu ari “nabbalin yayya tu sigga-matolay nga pinaratu.” (Genesis 2:7, footnote) Napadday ta dua nga gannug i kararua: i “gavu ta davvun” anna i “inango na pattolay.”

 Wan, ituddu na Biblia nga matay i kararua. (Levitico 21:11, footnote; Ezekiel 18:20) Nu matay i ayam anna tolay, manoli ira ta gavu na davvun. (Eclesiastes 3:19, 20) Kayà na kagian, awan ngana tu inango da. a

 Ari. Makaliwa i tadday nu egga i nonopan, matageno na, onu kuan na nga mekontra ta estandarte na Dios. Tapenu makaliwa, mawag nga mawayya na tadday i maddesision ta moral, awan tu abilidad na ayam ira nga kuan yatun. Maruddu nga magguyu ira segun ta instinct da durante ta limitadu nga pattoleda. (2 Pedro 2:12) Ta ultimu na pattoleda, matay ira, maski nu ari ira makaliwa.

 Ari. Nipamavulun na Dios nga immagurayattam i ayam ira ngem awan tu kepangngattattam nga abusowan ira. (Genesis 1:28; Salmo 8:6-8) Ikavurungan na Dios i ngamin nga ayam—maski i baraddi nga mammanu. (Jonas 4:11; Mateo 10:29) Nidob na ta maddayaw ira nisa nga masippo nga tratuadda i ayam ira.​—Exodo 23:12; Deuteronomio 25:4; Proverbio 12:10.