Maddian i sea cucumber ta datag na bebay anna ta coral reef. Buku-bukul onu egga i tubbu-tubbo na baggi natun nga ayam. Kappabbaw i abilidad na sea cucumber. Ta piga minuto onu segundo laman, puede nga mabbalin tu kitallapo gitta na wax onu kitattagga gitta na batu i baggi na. Megafu tatun, mawayya na nga itallung i baggi na maski ta atazzi ira nga batta na bata-batu tapus pataggatan na i baggi na tapenu ari yayya nga maguggung na maya nga kuman nisa. Kunnasi na makua yatun? Megafu ta tabbi na.

 Nonopan: Puede nga pabbalinan na sea cucumber tu kitattagga, mediu matagga, onu malapo i tabbi na. Tapenu makua na yatun, patturuvvugan onu passirinan naw nga ayam i fiber ira ta tabbi na. Kunnasi? Usan na i mamattagga onu mamallapo ira nga protina.

 Patturuvvugan na mamattagga ira nga protina i fiber ira ta tabbi tapenu mattagga yatun. Passirinan gapa na mamallapo ira nga protina i fiber ira ta tabbi tapenu mallapo yatun. Mawayya paga lagu na sea cucumber nga mapalapo i tabbi na adde ta gitta na malunag ngana yatun.

 Kayà na sientista ira nga parigan i abilidad na tabbi na sea cucumber. Magiggimbento ira tu electrode ira para ta operasion ta uto. Mawag tu matagga danatun nga electrode tapenu mepuestu ta eksakto nga lokasion ta uto tapus mawag gapa nga mallapo gabbalaman. Nu maka-imbento ira tu kunnatun, dakal i posibilidad nga makasta i resulta na operasion.

 Anni i makagim? Resulta kari na ebolusion i kappabbaw nga tabbi na sea cucumber? Onu egga i naddisenio tatun?