Awayya na tu mannobio mannobia kamu ngana, ngem mamegafu ngana nga paddudammu i relasion nu. Ituloy nu paga kari i relasion nu onu mas makasta nu massina kamu ngana laman? Makaduffun niko yaw nga artikulo tapenu makapaddesisiokka.

Taw nga artikulo

•  I kuammu nu madduda ka

•  Maddesision

•  Nu nadesisiommu nga maki-break

 Nu mannobio ngana i bagitolay anna maginganay, baka mammuadda nga dakal balo i naddumadda. Angngarigan na:

•   Kakayà na tadday i mab-beach; i tadday gapa mas kayà na i ma-hiking.

•   Makabibida i tadday; ari kuruga mattattannug i tadday.

•   Malladda-laddug i tadday; kanayun gapa nga makkagi tu kurug i tadday.

 Daddamman nga madduruma i kada tadday tatun nga situasion. Nelavu ta ollu i makkaduma nga interes; nelavu ta mekadua i makkaduma nga ugali; nelavu ta mekatallu i makkaduma nga prinsipio.

 Pannonopan: Sitaw tatun ta tallu nga situasion i karigatan para ta niko nga arubangan sonu magatawa kamu ngana? Sitaw gapa tatun i mawayya nu dua nga makapa-adjust?

 Puede nga madduma i paginteresan onu ugali na lalaki anna na atawa na, ngem magayayya lapa i relasiodda. Ari na mabba kayà kagian nga nu compatible i dua nga tolay eh parehu ngana ira ta ngamin nga gannug. Nu mittan paga lagu, baka magustuadda i hilig na kataggi-tadday onu mammakapia paga lagu ira ta ugali na atawa da. a

 Ngem importante tu parehu kamu tu prinsipio—kasali ngana i pangurug mu ta espiritual, moral, anna nu anni i mapia anna marake. Nu ari kamu parehu tatun ira nga gannug, seniales yatun nga awayyam pannonopan nu mab-break kamu ngana laman.

 Angngarigan na, innattam nu makkaduma i relihion nu. Kagian na libru nga Fighting for Your Marriage: “Kanayun nga ipasingan na research nga nu ari tu parehu i relihion na magatawa, dakal i posibilidad na nga mad-divorce ira.”

 Prinsipio na Biblia: “Ari kamu nga makikavvulu ta ari nga mangurug . . . ta arian na awayya i kunnaw.”​—2 Corinto 6:14.

 Kagian na Biblia nga danuri magatawa “ay matakitan anna maddaddam.” (1 Corinto 7:28, The New English Bible) Ariammu gafu makaddag nu maka-ekspiriensa kamu tu kunnatun habang mannobio kamu.

 Nu egga ira i baddi nga arian nu pakka-intindian, ari na kayà kagian tu ari tu makasta i relasion nu. I pakkiavu ay, Mawayya nu kari nga memammo nga solban yatun? Siguradu nga mawag nu dua yatun nga abilidad sonu magatawa kamu.

 Prinsipio na Biblia: “Makka-alla-allo kamu lallagu, makka-iddu-iddu kamu, anna makkapaka-pakoma kamu.”​—Efeso 4:32.

 Ngem nu kana-kanayun onu serioso ngana ira i ari nu pakka-intindian, posible nga ipasingan natun nga ari kamu dua nga bagay talaga. Nu kunnatun, mas makasta nga sangawe nu nammuan yatun nage nu magatawa anne ta sonu magatawa kamu ngana.

 I kurug: Nu talaga paddudammu i meyannung ta nobiom onu nobiam, onu paddudammu nu talaga ready ka ngana nga mangatawa, ariammu bale-walaan danatun!

 Prinsipio na Biblia: “Masingan na ma-uto i peligro anna mattagu yayya, ngem madderechu lagapa i awan tu ekspiriensa na anna mazziga-riga yayya ta resulta na ira.”​—Proverbio 22:3.

 Mataki nu mab-break kamu. Ngem nu tadday nikamu onu parehas kamu nga ari mawawawan i serioso ira nga padduda nu ta relasion nu, mas makasta nu massina kamu ngana laman.

 Kunnasi nu nga kuan yatun? Nu ipamavulu na situasion, mas makasta nga mab-break kamu ta personal imbes tu ta text onu email laman. Mappili kamu tu mepangngo nga oras anna lugar tapenu pabbidan nu dua yatun nga serioso nga gannug.

 Prinsipio na Biblia: “Makkagi tu kurug ta kataggi-tadday.”​—Zacarias 8:16.

 Nu nab-break kamu, kayà kari kagian natun nga ari tu makasta i nattuppalammu? Ari gapa. Daddamman nga uffunan naka nakuan na tiempo na pannobio tapenu makapaddesision nu atawammu onu ari i nobiam. Maski nassina kamu ngana, awayyam lapa makagigiammu ta ekspiriensa nu.

 Iyavu ta baggim: ‘Anni i nagigiammù meyannung ta baggì ta relasiommi? Egga kari mawag tu uliakku ta baggì? Anni i mawag tu uliakku sonu makinobio ngà ngana uli?’