1-2. (a) Ɔdiya ɛɛ nɛ ācɛ nōo lɛ iyi uwa ɛpɛpɛ a cɛgbá ō gbolo ce Ujehofa a? (Aíjē Kú Ɛ̄gbā 37:3, 4) (b) Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a??

A YƆ i tutu ō lɛ ɔba amāŋ ɔnyā nɛɛ, kɛɛ ku a lɛ ɔba amāŋ ɔnyā ɛpɛpɛ? Ó lɛ a, ó lɛ aafu ŋ, a yɔ i leyice ō jɔɔnyɛ oyeeyi tɔha mla ɔcɛ nɛ a yihɔtu nu nɛhi a. Ó wɛ ɔkwɛyi ku ɔba amāŋ ɔnyā ō lɛ lɛ unwalu ku abɔyinu. Ɔba mla ɔnyā ɛpɛpɛ kē lɛ ōmiya ɛyɛɛyɛyi nōo cɛgbá néē géē ya. Ɔwɛ nɛ aa yɛce unwalu mɛmla ōmiya nɛ aa lɛ a, géē lɛ abɔ kwu eeye ku aa ihayi alɛwa nōo yɔ i wa a. Ɔdaŋ ku a gbolo ce Ujehofa, a géē ya ōmiya ipu ijeeyi, ɛma nōo yɔ ɔtahɛ ku aa ɛplɛɛpa a géē lɔfu iyē tōōtɔ̄ɔ̄, aa kē i gweeye fiyɛ. Amáŋ, ɔdaŋ ku a leyi gwu ɛlá ō gbo ku Ɔwɔico bonu, ó lɛ aafu ŋ aa géē má unwalu nɛ oŋmɛyi ku nu, aa gáā lɛ eeye ipu ō ba tɔha ku aa ŋ.—Jé Aíjē Kú Ɛ̄gbā 37:3, 4.

² Naana nɛ ikpɛyi ɛlā ō klɔcɛ nyā yɔ i kɛla kpaakpa lɛ ācɛ nōo lɛ ɔba amāŋ ɔnyā ɛpɛpɛ a, ó géē kɛla lɛyikwu unwalu nɛ ɛjɛɛji ācɛ nōo lɛ ɔba amāŋ ka ɔnyā lɔfu má a. Ó klla géē kɛla lɛyikwu ɔdā nɛ alɔ géē lɔfu nwu ŋma ɛgiyi acɛnya mla acɛnyilɔ nōo hayi kpaakpa ipu Ubáyíbu a. Aocabɔ nōo ŋma ipu Ubáyíbu nyā géē nwu alɔ, aɛlā nɛ alɔ géē bi le yuklɔ aya ɛyɛɛyɛyi ipu oyeeyi ku alɔ mla ō ba tɔha ku ɔba mla ɔnyā. Alɔ klla géē nwu aɛlā  ɛyɛɛyɛyi ŋma ocabɔ ku ayinɛ alɔ, nōo lɛ ɔba amāŋ ka ɔnyā ɛpleeko ku alɔ icɛ a duu.

3-4. Aunwalu ɛyɛɛyɛyi ōhī nyá nɛ ācɛ nōo lɛ iyi uwa ɛpɛpɛ a lɔfu má a?

³ Ācɛ alɛwa gē ta ācɛ nōo lɛ iyi uwa ɛpɛpɛ a ɔtu kwu ɔtu, kéē lā oyeeyi bɛɛka ɛgɛ nɛ ācɛ alɛwa gē lā icɛ a. Ocabɔ mafu, ācɛ apɔlɛ amāŋ ka aɔkpa ku uwa lɔfu lɛ owu ce uwa ɔtu kéē ma ayi fiyaa. Amāŋ, ācɛ nōo ba nyā lɔfu ta uwa ɔtu kwu ɔtu kéē lɛ ɔlɛ lá klla lɛ aɔdā olɔhi ɛyɛɛyɛyi kpo tu ɔ, o ya ɛɛ kéē jɔɔnyɛ oyeeyi ku uwa.

⁴ Ɔdaŋ ka ɔba mla ɔnyā i lɛ ɛlá kwu ɔ ŋ, é lɔfu ya ōmiya nōo géē ya kéē gā bi ule nɛhi néē gáā má ije gba gla ŋ. Ɛnyā kē lɔfu kwu ɔba mla ɔnyā a kéē nyɔ gáā yuklɔ nɛhi, gbɔbu ɛɛ kóō tɔɔtɛ lɛ uwa ō gba ule a. É kóō géē lɔfu yuklɔ nyā nɛɛnɛhi nōo géē ya kéē lɛ ɛga ō ya oklɔcɛ ku abɔyi uwa, oklɔcɛ ku apɔlɛ amāŋ ō nyɔ gā uklɔ ku ɔna ō ta ɛ gɛ ŋ. Ɛnyā géē ya kéē gbɔɔ ō ci ō wa ōjila ku ujɔ. Ó klla géē ya kéē yuklɔ nwune fiyɛ eko, o ya ɛɛ ka uklɔ néē yɔ i ya a kóō hɛ uwa abɔ ŋ. Ɔdaŋ kéē gbɔɔ ō ya lɛ a, aɔdā alɛwa néē cɛgbá ō ya ipu ɔwa ku Ujehofa nōo géē je eeye lɛ uwa a, ó gáā tɔɔtɛ lɛ uwa ō ya gla gɛ ŋ.

5. Ɔdi nɛ a nwu ŋma ocabɔ ku Klaus mla u Marisa a?

⁵ Aɔdā nɛ ācɛ má ɛ lɛ ɔ teyi peee ka ō lɛ ɔtu ku alɔ kwu ō lɛ aɔdā agbenu nwune, i gáā je eeye lɛ alɔ gboogboo gla ŋ. Leyi yɛ ocabɔ ku ɔdā nɛ u Klaus mla u Marisa nōo wɛ ɔba mla ɔnyā a má a. * Eko néē lɛ iyi uwa ɛpɛpɛ a, uwa ɛplɛɛlpa yuklɔ nwune o ya kéē lɛ aɔdā agbenu nɛhi. Amáŋ, é lɛ eeye ɔkwɛyi néē yɔ i dɔka a ŋ. Klaus kahinii: “Alɔ ka ō le lɛ fiya aɔdā agbenu nɛ alɔ yɔ i cɛgbá a, amáŋ alɔ i lɛ ōmiya duuma ō ya nwune ipu ɛ̄gbā ō gba ku Ujehofa ŋ. Oyeeyi ku alɔ i lɛ ɛyi ŋ klla le mu mla unwalu ɛyɛɛyɛyi.” Ó lɛ aafu ŋ, awɔ abɔyi uwɔ a lɔfu le má duu ɛ, ka ō yɔ i ceyitikwu ku ɔcɛ kóō lɛ agbenu i gē bi eeye ɔkwɛyi gé lɛ ɔcɛ ŋ. Ɔdaŋ kóō ya uwɔ lɛ a, abɔ kóō hii hɛ uwɔ iyē ŋ. Ō leyi yɛ ocabɔ olɔhi ku ācɛ ɔhá géē ta uwɔ abɔ ipu āhɔ̄ nyā. Aflɛyi, alɔ leyi yɛ ɔdā nɛ ɔba mla ɔnyā lɔfu nwu ŋma ocabɔ ku ɔcɛ́ Ujɛhosafati a.

6. Ɛgɛnyá nɛ Ɔcɛ́ Ujɛhosafati bi ukɔ́ ku ijeeyi nōo yɔ ipu ɔkpá ku Aíita 3:5, 6 a, le yuklɔ eko nɛ aicɔɔja alɛwa wa gáā kpo ɔfu kwu anu mla ācɛ ɔlɛ nu a?

⁶ Aɔba, ɔtu gē biya gā uwɔ ekoohi ohigbu auklɔ ɛyɛɛyɛyi nɛ a lɛ ō ya a? Ɔdaŋ kóō lɛ a, a géē lɛ itene ŋma ocabɔ ku Ujɛhosafati nōo wɛ ɔcɛ́ a. Abɔ ó wɛ ɔcɛ́ a, ó lɛ uklɔ ku ō gbo oyeeyi ku ācɛ nɛ ó yɔ i lé ɔcɛ́ ikpɛyi uwa a! Ó lɛ a, ɔdi nɛ ó ya o ya ɛɛ kóō lɛ uklɔ ō cɛgbá nɛhi nyā ya gla a? Ujɛhosafati ceyitikwu ya ɔdā duuma nɛ ó ya gla a, o ya ɛɛ kóō lɛ ācɛ a gbotu. Ó lɛ ainɔda olɔfu alɛwa kpo gwo tu Ujuda klla lɛ aicɔɔja nōo fiyɛ umiliyɔn éyi ce utajan ofu ahata (1,160,000) kpo fu kwaajɛ. (2 Úklɔ́ 17:12-19) Igbihaajɛ, Ujɛhosafati gáā lɛ unwalu  nɛhi éyi lɛ. Aicɔɔja ku ācɛ Amɔn, Umowabu, mɛmla ācɛ Useyɛ nōo lɛwa nɛhi a, gáā gbɔɔ ō kpo ɔfu kwu ɔ, ācɛ apɔlɛ ku nu mɛmla ācɛ ɔlɛ nu duu. (2 Úklɔ́ 20:1, 2) Ɔdi nɛ Ujehosafati ya a? Ó gbɔɔkɔ lɛ Ujehofa kóō ta ɔ abɔ klla je ɔfu nɛ ó cɛgbá a lɛ ɔ. Ɛnyā kē cɛ mla ukɔ́ ku ijeeyi nōo yɔ ipu ɔkpá ku Aíita 3:5, 6 a. (Jé.) Ɔkɔ nɛ Ujɛhosafati ta iyi nu waajɛ gba, néē ta ipu ɔkpá ku 2 Úklɔ́ kú Aɔ́cɛ́ 20:5-12 a, mafu kóō gbolo ce Ujehofa nɛhi. Ɛgɛnyá nɛ Ujehofa cila ohi ku ɔkɔ ō gba ku Ujɛhosafati a?

7. Ɛgɛnyá nɛ Ujehofa bi le cila ohi ku ɔkɔ ō gba ku Ujɛho­safati a??

⁷ Ujehofa lɛ ohi ta Ujɛhosafati ō bu ipu ɔcɛ Ulifayi éyi néē i hi ka Ujahasiyɛlu a. Ujehofa da ɔ kahinii: “Ákú aá lé ka, aá má kwū ajɛ ɛfú, cɛ́ɛ́ kú aá gbēyī. Aá gēe má Óndú ā abɔ̄ ó géē yá kú aá lɛ ɛfú nyā yálé ā.” (2 Úklɔ́ 20:13-17) Ku ɛlā ɔkwɛyi a, ɛnyā i wɛ ɔwɛ okpaakpa ō bi le kpo ɛfu ŋ! Amáŋ, ó wɛ ɛgiyi ɔlɛɛcɛ nɛ ukɔ́ nyā wa ŋma ŋ, ɛgiyi Ujehofa nɛ. Abɔ Ujɛhosafati kē gbolo ce Ujehofa a, ó lɛ ɔdā nɛ ó da ɔ a ya. Eko néē yɔ i nyɔ gáā kpɛfu tu aicɔɔja nōo lɛwa nɛhi nyā a, ó kpo aicɔɔja nōo lɔfu fiyɛ duu a ba iyɔbu ŋ, amáŋ ācɛ ō gwiije. Ujehofa kē lɛ okonu nɛ ó ce mla Ujɛhosafati a tu, ó cɛ lɛ ɔ lɛ aicɔɔja a yale.—2 Úklɔ́ 20:18-23.

8. Ɔdi nɛ aɔba lɔfu nwu ŋma ocabɔ ku Ujɛhosafati a?

⁸ Aɔba, aa lɔfu nwu ɛnɛɛnɛ ɛlā ŋma ocabɔ ku Ujɛhosafati. Uklɔ ku ɔba wɛ ō leyi kwu apɔlɛ ku nu. Ohigbu ɛnyā, ceyitikwu lɔfu lɔfu ku a gbo apɔlɛ ku uwɔ klla je otabɔ lɛ uwa. Eko nɛ a yɔ i má unwalu, ó lɔfu ya uwɔ bɛɛka a géē ya unwalu ɔɔma abɔyi uwɔ gla a. Amáŋ, a hii gbolo ce ɔfu ku uwɔ gboogboo ŋ. Ikɔkɔ ɔɔma, gbɔɔkɔ lɛ Ujehofa kóō ta uwɔ abɔ eko nɛ a yɔ foofu uwɔ. O ka tu ɔ kpɔ, gbɔɔkɔ ŋma ɔtu lɔɔlɔhi mla ɔnyā uwɔ. Klɔcɛ ku Ubáyíbu ku a má aɔwɛ nɛ a géē yɛce a, ku a klla klɔcɛ ku aɔkpá ɛyɛɛyɛyi nɛ ɔwa ku Ujehofa ya a, cɛɛ ku a bi aukɔ́ nɛ a má a le yuklɔ. Ɔkwɛyi, ācɛ alɛwa i gáā cɛ mla ōmiya nɛ a ya ŋma ipu Ubáyíbu a ŋ, é ka ō lɔfu ca uwɔ ɛca gla duu. É lɔfu da uwɔ ka ije mla aɔdā nɛ ije lɔfu lá gla a gáā je ogbotu lɛ apɔlɛ ku uwɔ a. Amáŋ, blakwu ocabɔ ku Ujɛhosafati. Ó gbolo ce Ujehofa klla ma ɔ fu ipu ɔdā nɛ ó je ō ya a. Ujehofa i habɔ ta ohigbu ɛyi nɛ ó le taajɛ lɛ ɔ a ŋ, ó kē gáā habɔ uwɔ ta ŋ duu. (Aíjē 37:28; Uhíb. 13:5) Ɔdā ɔhá nyá nɛ ɔba mla ɔnyā lɔfu ya o ya ɛɛ kéē lɛ eeye ipu ō ba tɔha ku uwa a?

9. Ɔdi nɛ alɔ lɔfu ka lɛyikwu Ayisaya nōo wɛ ɔcomɛɛbɛ mlā ɔnyā nu a?

⁹ Ɔdā nōo cɛgbá lɛ Ayisaya mla ɔnyā nu fiyɛ duu a, wɛ ō yɔ i gba Ujehofa ɛ̄gbā. Ayisaya wɛ ɔcomɛɛbɛ, á jé ŋ ɔnyā nu kē wɛ ɔcɛ ō yuklɔ ku ɔcomɛɛbɛ duu, ohigbu kéē hi ɔ ka “ɔ́comɛ́ɛbɛ.” (Ayis. 8:1-4) Abɔ é wa ɔba mla ɔnyā a, Ayisaya mla ɔnyā nu kwu ɛ̄gbā ō gba ku Ujehofa i ta aflɛyi ipu oyeeyi ku uwa. Ɛnyā kē wɛ ɛnɛɛnɛ ocabɔ lɛ ɔba mla ɔnyā icɛ!

10. Ɛgɛnyá nɛ ō klɔcɛ ku aakacɛ nōo yɔ ipu Ubáyíbu a gáā ta ɔba mla ɔnyā abɔ ō lɛ ɔtu caca ō ya ɔdā duuma néē ya gla a lɛ Ujehofa a?

¹⁰ Ɔba mla ɔnyā icɛ cɛgbá ō yɛce ocabɔ ku Ayisaya mla ɔnyā nu, ŋma lɛ ō ya ɔdā duuma néē ya gla ipu ɛ̄gbā ō gba ku Ujehofa a. É cɛgbá ō lɛ ɔfu tu ɔtu okpoce ku uwa ŋma lɛ ō klɔcɛ lɛyikwu aakacɛ nōo yɔ ipu Ubáyíbu a klla má ɛgɛ néē ya jila kpɛmm a. * (Utáyítɔ̄si 1:2) É kē lɔfu gbɛla lɛyikwu ɔdā néē kē lɔfu ya o ya ɛɛ ku aakacɛ ōhī kóō ya jila duu a. Ocabɔ  mafu, é lɔfu je otabɔ o ya ɛɛ ku akacɛ ku Ujisɔsi nōo kéē géē tɔɔna ku ɔkoolɔhi a ipu oduudu ɛcɛ gbɔbu ku eko nɛ ɛcɛ i mɛ a kóō le ya. (Umát. 24:14) Ɔdaŋ ka ɔba mla ɔnyā le jé kpɔcii ka aakacɛ nōo yɔ ipu Ubáyíbu a yɔ i ya jila ɔkwɔɔkwɛyi, ó géē ta uwa abɔ lɛ ɔtu caca ō ya ɔdā duuma néē ya gla a lɛ Ujehofa.

11. Ɔdi nɛ Akwila mla Uprisila ya a, ɔdi kē ya a?

¹¹ Ɔba mla ɔnyā ɛpɛpɛ lɔfu nwu ɛlā ŋma ocabɔ ku Uprisila mla Akwila nōo wɛ ācɛ Ujiyu nōo lā ipu igeli ku Urom a. É lɛ ɔkoolɔhi lɛyikwu Ujisɔsi a po klla kwu piya Ācɛ O Yɛce Ukraist. Ó lɛ aafu ŋ, oyeeyi néē yɔ i lā eko ɔɔma a he uwa ɔtu. Amáŋ, oyeeyi ku uwa kwu piyabɔ acigili eko nɛ igbomina néē i hi ka Uklɔdiyɔsi a da ɛjɛɛji ācɛ Ujiyu kéē ŋma éwo ku Urom a. Ɔdaŋ ku a leyi yɛ āhɔ̄ nyā, a géē jé ka o gáā tɔɔtɛ lɛ Akwila mla Uprisila fluflu ŋ. É cɛgbá ō habɔ ɛga néē lā a ta, dɔka ɔlɛ ɛpɛpɛ klla dɔka ɛga ɛpɛpɛ néē géē gbɔɔ uklɔ ku ɔklɔkpɛ ku uwa ō ya. Āhɔ̄ olɔnɔ ɛyɛɛyɛyi kpɛmm néē ba a, géē ci uwa ŋma ō ya ɛjɛɛji ɔfu ku uwa lɛ Ujehofa a? N jé ku a jé ohi nyā. Abɔ é le yɛ gā ɔlɛ ɛpɛpɛ ku uwa Ukɔrinti a, Akwila mla Uprisila yɛce Upɔlu je ɔtu ō tu kwu ɔtu lɛ ayinɛ nōo yɔ Ukɔrinti a. Igbihaajɛ, é klla le yɛ gā ujɔ ɔhá nōo cɛgbá ācɛ ō tɔɔna ɛlā Ɔwɔico a. (Ācot. 18:18-21; Uróm 16:3-5) Ɔkwɛyi, é yuklɔ alɛwa ipu oyeeyi ku uwa, amáŋ é lɛ eeye nɛhi!

12. Ɔdiya ɛɛ nɛ ɔba mla ɔnyā cɛgbá ō ya ōmiya nōo géē ta uwa abɔ gba Ujehofa ɛ̄gbā a?

¹² Ɔba mla ɔnyā icɛ lɔfu yɛce ocabɔ ku Akwila mla Uprisila ŋma lɛ ō je Ajɔɔcɛ ku Ɔwɔico ta aflɛyi ipu oyeeyi ku uwa. Eko olɔhi fiyɛ duu nɛ ɔba mla ɔnyā cɛgbá ō ya ōmiya ɛgɛ néē géē lā oyeeyi ku uwa a wɛ eko nōo yɔ gbɔbu ɛɛ kéē lɛ iyi uwa a. Ɔdaŋ ka ɔba mla ɔnyā lɛ ōmiya ya kéē gba Ujehofa ɛ̄gbā mla ɛjɛɛji oyeeyi ku uwa, néē kē ceyitikwu kéē lɛ ɔdā néē miya ɔɔma ya, é géē lɛ ɛnɛɛnɛ ɛga ō má ɛgɛ nɛ Ujehofa géē ta uwa abɔ ipu oyeeyi ku uwa a. (Ɔ̄cok. 4:9, 12) Alɔ leyi yɛ ocabɔ ku Russell mla Elizabeth. Russell kahinii: “Gbɔbu ɛɛ ku alɔ lɛ iyi alɔ a, alɔ lɛ ɔdā nɛ alɔ géē dɔka ō ya lɛ Ujehofa a miya taajɛ gbɔbu.” Elizabeth kahinii: “Alɔ kɛla lɛyikwu ɛlā nyā o ya ɛɛ ku ōmiya duuma nɛ alɔ géē ya ɛcɔbu a kóō hii ci alɔ ŋma ō ya ɔdā nɛ alɔ miya ō ya a ŋ.” Ɛnyā ya ka  āhɔ̄ ku Russell mla Elizabeth kóō le tɔɔtɛ lɛ uwa ō yɛ gā éwo ku Micronesia nōo cɛgbá ācɛ ō tɔɔna ɛlā Ɔwɔico a.

13. Ɛgɛ nɛ ɔkpá ku Aíjē Kú Ɛ̄gbā 28:7 ka a, itene nyá nɛ alɔ gáā lɛ ɔdaŋ ku alɔ lɛ ɔtu kpoce Ujehofa lɔfu lɔfu a?

¹³ Bɛɛka u Russell mla Elizabeth a, ɔba mla ɔnyā alɛwa icɛ lɛ oyeeyi ku uwa ya tɔɔtɛ. É klla le miya ka uwa i gáā lɛ abɔ ipu ɔdā alɛwa ŋ, o ya ɛɛ kóō tɔɔtɛ lɛ uwa ō yuklɔ ku ɔna ō ta mla ō nwu ācɛ ɛlā. Ɔdaŋ ka ɔba mla ɔnyā lɛ ōmiya o ya ɛɛ kéē ya nwune ipu ɛ̄gbā ō gba ku Ujehofa klla ceyitikwu o ya ɛɛ kéē lɛ ɔdā néē miya a ya, ohi olɔhi gē bɛɛcɛ ŋma anu. É géē má ɛgɛ nɛ Ujehofa géē leyi kwu uwa lɔɔlɔhi a, ɔtu okpoce néē lɛ lɛ Ujehofa a klla géē lɔfu tōōtɔ̄ɔ̄. Ɛnyā kē géē ya kéē lɛ eeye ɔkwɔɔkwɛyi.—Jé Aíjē Kú Ɛ̄gbā 28:7.

14. Ɛgɛnyá nɛ ɔyikpo Upita mla ɔnyā nu mafu kéē kpɔtuce okonu ō ce ku Ujehofa nōo yɔ ipu ɔkpá ku Umátiyu 6:25, 31-34 a?

¹⁴ Ɔba mla ɔnyā icɛ kē lɔfu nwu ɛlā ŋma ocabɔ ku ɔyikpo Upita mla ɔnyā nu duu. Bɛɛka ɔya ɛhili nɛ ɔyikpo Upita má Ujisɔsi eko aflɛyi a, ŋma eko ɔɔma ó cɛgbá ō ya ōmiya nōo cɛgbá nɛhi. Uklɔ ku ebeenyi ō kwu nɛ Upita gē ya kóō leyi kwu iyi nu mla ācɛ apɔlɛ ku nu a. Ohigbu ɛnyā eko nɛ Ujisɔsi da Upita kóō bi ɛjɛɛji oyeeyi ku nu gáā yɛce ɔ a, Upita cɛgbá ō gbɛla kwu ɔnyā nu gbɔbu ɛɛ kóō ya ōmiya duuma. (Ulúku 5:1-11) Upita kē cɛ lɛ ōmiya ya kóō nyɔ gáā tɔɔna tɔha mla Ujisɔsi. Ōmiya olɔhi a nɛ Upita ya a! Alɔ kē kpɔtuce lɔɔlɔhi ka ɔnyā ku Upita ta ɔ abɔ ipu ōmiya nɛ ó ya ɔɔma. Ubáyíbu da alɔ ka igbihi néē kwu Ujisɔsi i heyi ŋma ɔlekwu a, ɔnyā ku Upita yɛ tɔha mla Upita ekoohi duu. (1 Ukɔ́r. 9:5) Ó lɛ aafu ŋ, abɔ ó wɛ ɔnyā nōo gē yɛce Ukraist ɔkwɛyi a, ɔɔma ya ɛɛ nōó tɔɔtɛ lɛ Upita ō kɛla ŋma ɔtu eko nɛ ó je ukɔ́ lɛ aɔba mla aɔnyā nōo wɛ Ācɛ O Yɛce Ukraist a. (1 Upít. 3:1-7) Upita mla ɔnyā nu kpɔtuce okonu ō ce ku Ujehofa ka ó géē leyi kwu aa, ɔdaŋ kéē kwu Ajɔɔcɛ a u ta aflɛyi ipu oyeeyi ku uwa.—Jé Umátiyu 6:25, 31-34.

15. Ɔdi nɛ alɔ nwu ŋma ɔ̄kā ku Tiago mla Esther a?

¹⁵ Ɔdaŋ kóō gboji nɛ a lɛ ɔba amāŋ ka ɔnyā ɛ, ɛgɛnyá nɛ a gáā lɛ ɔtu caca kpɔ ō ya nwune ipu ɛ̄gbā ō gba ku Ujehofa a? Ɔwɛ éyi wɛ ō nwu ɛlā ŋma ocabɔ ku ɔba mla ɔnyā ɛyɛɛyɛyi. Ocabɔ mafu, aɔdā ō ta ɔtu kwu ɔtu ɛgɛnyā yɔ ipu ɔkpá ku alɔ. Ɔ̄kā ɛgɛnyā ta ɔba mla ɔnyā éyi nōo ŋma éwo ku Brazil néē i hi ka u Tiago mla Esther a abɔ, kéē lɛ ɔtu caca ō nyɔ gáā yuklɔ ɛga nɛ ɛgbá ku ācɛ ō tɔɔna ɛlā Ɔwɔico yɔ a. Tiago kahinii: “Abɔ alɔ lɛ aɔ̄kā ɛyɛɛyɛyi jé lɛyikwu ɛgɛ nɛ Ujehofa ta ācɛ nōo gē gba ɔ ɛ̄gbā a abɔ icɛ a, ó lɛ abɔ kwu alɔ ɔtu ku alɔ lɛ ōmiya ya, ku alɔ má ɛgɛ nɛ Ujehofa géē gbo alɔ klla leyi kwu alɔ duu a.” Ɛnyā ya kéē le yɛ gā éwo ku Paraguay, ɛga néē yɔ i tɔɔna ipu uce ku Portuguese ŋmiifi ihayi ku 2014. Esther kahinii: “Ɛga ku Ubáyíbu nōo gē he alɔ ɔtu ō jé eko doodu a wɛ ɔkpá ku Ācɛ Ɛ́fēsɔsi 3:20. Ɛlā nōo yɔ ɛga ku Ubáyíbu ɔɔma le ya cɛ ɔkwɛyi ipu uklɔ nɛ alɔ yɔ i ya lɛ Ujehofa a.” Eko nɛ Upɔlu yɔ i ta ɔkpá ɔɔma gē lɛ Ācɛ Ɛfesɔsi a, ó da uwa ka Ondu a ka ō lɛ ɔdā ɛgbá ku uwa ya lɛ uwa fiyɛ ɛgɛ néē kóō gbɛla a. Ɛlā nyā kē le ya ɔkwɔɔkwɛyi ipu āhɔ̄ ku alɔ!

16. Eko nɛ ɔba mla ɔnyā ɛpɛpɛ yɔ i leyi yɛ ɔdā néē miya ō ya ipu oyeeyi ku uwa a, anyɛ néē lɔfu gā ɛgiyi uwa kéē tu uwa ukɔ́ a?

¹⁶ Ācɛ nōo lɛ iyi uwa ɛpɛpɛ a lɔfu lɛ itene, oŋma ɛgɛ nɛ ācɛ nōo lɛ iyi uwa gboji ɛ ma gbolo ce Ujehofa lɛ a. Ɔba mla ɔnyā ōhī lɔfu ya ihayi alɛwa ipu uklɔ ō ya lɛ Ujehofa eko doodu ɛ. Aa lɔfu gā ɛgiyi uwa kéē tu aa ukɔ́ ɔdaŋ ku aa cɛgbá ō leyi yɛ ōmiya ku aa kpɔ. Ɛnyā kē wɛ ɔwɛ ɔhá nɛ a lɔfu mafu ku a yɔ i kpɔtuce Ujehofa. (Aíit. 22:17, 19) Anyakwɔcɛ ku ujɔ klla lɔfu je otabɔ lɛ ācɛ nōo lɛ iyi uwa ɛpɛpɛ a, cɛɛ kéē le yɛ fu ajɛ ɔdā néē miya ō ya ipu ɛ̄gbā ō gba ku Ujehofa a.

17. Ɔdi ya da u Klaus mla u Marisa a, ɔdi nɛ alɔ kē lɔfu nwu ŋma anu a?

¹⁷ Ekoohi, ó lɛ ɔwɛ nɛ alɔ dɔka ō gba Ujehofa ɛ̄gbā tōōtɔ̄ɔ̄ fiyɛ, amáŋ Ujehofa lɔfu mafu ɔwɛ ɔhá lɛ alɔ. Ɔdā ekponu nyā ya da u Klaus mla u Marisa nɛ alɔ kɛla lɛyikwu uwa gbɔbu a. Abɔ é lɛ iyi uwa lɛ nɛ ihayi ɛta gáā le yɛ a, é gáā nyɛɛ ŋma ɔlɛ uwa kwu iyi uwa i tɛɛcɛ ō yuklɔ ku ɔlɛ ō gwo ipu abɔ ku ɛga ō yuklɔ ku Finland. Amáŋ, é gáā le má kéē gáā jɛga lɛ uwa kéē yɔ ipu éwo ɔɔma fiyɛ ɔya ɛhilii ŋ. Aflɛyi a, ɛnyā lɛ uwa ɔtu biya. Amáŋ ɛgɛ nɛ ɛlā gáā yɛ lɛ igbihaajɛ a, ó gboji ŋ é gáā lɛ uwa higwu kéē gáā nwu uce ku Arabic, babanya é yɔ i yuklɔ mla eeye ipu éwo ɔhá ɛga nɛ ācɛ i ka uce ku Arabic. Eko duuma nɛ Marisa gbɛla lɛyikwu ɔdā nōo ya a, ó gē kahinii: “Eko ɔɔma ufi ya um nɛhi ohigbu kóō wɛ ɔdā nɛ um ya jeeje ɛ ŋ, n kē cɛgbá ō gbolo ce Ujehofa duudu. Amáŋ, n gáā le má ka Ujehofa gē ta alɔ abɔ eko doodu ɔwɛ nɛ alɔ i kóō leyice ŋ. Igbihi nɛ um lɛ ɛnyā má a, ɔtu nɛ um kpoce Ujehofa a kwu lɔfu fiyɛ otɛtɛ.” Ɛgɛ nɛ ocabɔ nyā mafu a, le jé kpɔcii ka Ujehofa géē hɔha ce uwɔ ɔdaŋ ku a lɛ ɔtu kpoce ɔ duudu.

18. Ɔdi nɛ aɔba mla ɔnyā lɔfu ya o ya ɛɛ kéē yɔ i kpɔtuce Ujehofa a?

¹⁸ Ɔba mla ɔnyā ō lɛ wɛ ɛhi ŋma ɛgiyi Ujehofa. (Umát. 19:5, 6) Ó kē dɔka ka ɔba mla ɔnyā kéē jɔɔnyɛ ɛhi ɔɔma. (Aíit. 5:18) Ɔba mla ɔnyā ɛpɛpɛ, aa gbɛla ka ō leyi yɛ ɔdā nɛ aa bi oyeeyi ku aa yɔ i le ya a géē lɔhi ŋ? A yɔ i ya ɛjɛɛji ɔfu ku uwɔ ō mafu lɛ Ujehofa ka ɛjɛɛji ɛhi nɛ ó yɔ i ya uwɔ a jɛ uwɔ eyī? Kɛla lɛ Ujehofa ipu ɔkɔ ō gba. Jila ɛlā ku nu nōo wɛ Ubáyíbu a má ku a má ukɔ́ nōo lɔfu tɛɛma kwu āhɔ̄ ku uwɔ. Cɛɛ ku a kē bi ukɔ́ nɛ Ujehofa géē ta uwɔ a le yuklɔ. Ɔdaŋ ku aa bi oyeeyi ku aa le gba Ujehofa ɛ̄gbā, ó lɛ aafu aa géē gweeye klla miyɛ ɔhā alɛwa ipu oyeeyi!