1. Ɔka nyá nɛ alɔ lɔfu da iyi alɔ a?

EKOOHI a gē lɛ ɔtu oplico klla gē je unwalu lɛ iyi uwɔ, ohigbu aɔdā nōo géē ya nōó gboji gɛ ŋ ma a. Aodee bɛɛka o cataajɛ ku ɛ̄gbā ō gba ɛkɛmgbɛ, ɛfú nɛ Ugɔgu mla Umagɔgu géē kpo, mɛmla ɛfú ku Amagɛdɔn a? A da iyi uwɔ ɔka nyā jejee ɛɛ, ‘Eko nɛ aɔdā ō tuufi nyā gáā yɔ i ya a, ó géē ta um ɔtɛ ō hayi kpaakpa gla?’ Ɔdaŋ ku a gbɛla lɛyikwu aɔka nyā jejee ɛɛ, ɔka nɛ alɔ gáā ka lɛyikwu ɛlā nɛ Ujisɔsi ka, ipu ɛga ku Ubáyíbu néē je ikpɛyi ɛlā nyā ŋma a géē ta uwɔ abɔ. Ujisɔsi da ayikpo ku nu kahinii: “Ɔtū kú aá kóō lɛ unwalu ŋ́, aá lɔtūce.” (Ujɔ́n. 14:1) Ɔtu okpoce olɔfu géē ya ku alɔ lɔtu klla lɛ ɛbɔ ku ɔtu lɛyikwu ɔdā duuma nōo géē ya ɛcɔbu a.

2. Ɛgɛnyá nɛ alɔ lɔfu ya ku ɔtu okpoce ku alɔ kóō lɔfu a, ɔdi nɛ alɔ kē gáā kɛla lɛyikwu ɔ ipu ikpɛyi ɛlā nyā a?

² Alɔ lɔfu ya ku ɔtu okpoce ku alɔ kóō le lɔfu ō lɔtu ojama ku ɛcɔbu, oŋma lɛ ō leyi yɛ ɛgɛ nɛ alɔ gē ya lɛ babanya eko duuma nɛ alɔ lɛ ojama má. Ɔdaŋ ka alɔ gbɛla tu ɔɔma lɔɔlɔhi, alɔ géē má aya nɛ alɔ cika ō ya cɛɛ ku ɔtu okpoce ku alɔ kóō le lɔfu a. Ojama duuma nɛ alɔ gē lɔtu nu a, gē ya ku ɔtu okpoce ku alɔ kóō lɔfu fiyɛ. Ɛnyā géē ta alɔ abɔ lɔtu ku aojama nōo géē wa ɛcɔbu a. Ipu ikpɛyi ɛlā nyā, alɔ géē leyi yɛ āhɔ̄ ɛnɛ nɛ ayikpo ku Ujisɔsi yɔ anu, nōo mafu ka é cɛgbá ɔtu okpoce olɔfu a. Cɛɛ alɔ géē kɛla lɛyikwu ɛgɛ nɛ alɔ lɔfu má aunwalu nyā icɛ, mla ɛgɛ nōó lɔfu ta alɔ tu lɛyikwu ɛcɔbu a.

3. Ɛgɛ nɛ ɔkpá ku Umátiyu 6:30, 33 ka a, ɛlā okpɔcii nyá lɛyikwu ɔtu okpoce nɛ Ujisɔsi je teyi peee a?

³ Ó wɛ ɔdā ɔlamu ku otrɛyi ku apɔlɛ kóō dɔka ku apɔlɛ ku nu kóō lɛ ɔdā ō lé, ili mla ɛga néē géē lā. Amáŋ ɛnyā i kē wɛ ɔdā o  tɔɔtɛ ɛpleeko olɔnɔ nɛhi nyā ŋ. Ó lɛ ayinɛ alɔ ōhī nɛ uklɔ ku uwa mɛ, é kē ceyitikwu o ya ɛɛ kéē dɔka uklɔ ɛpɛpɛ amáŋ é má ŋ. Ōhī ku uwa kē ta uklɔ, nɛ Ācɛ O Yɛce Ukraist i cika ō ya ŋ. Eko duu nɛ odee ɛgɛnyā lɛ ya a, alɔ cɛgbá ɔtu okpoce olɔfu ka Ujehofa géē ya ɛgbá ku apɔlɛ ku alɔ lɛ alɔ. Ujisɔsi kwu ɛnyā i ta ayikpo ku nu eyī peee, ipu ɔkoolɔhi nɛ ó ka Ɛyi Ɛfu a. (Jé Umátiyu 6:30, 33.) Eko duuma nɛ alɔ le jé kpɔcii ka Ujehofa i gáā habɔ alɔ ta ŋ, ɔɔma géē ta alɔ abɔ lɛ ɔtu kwu ō gba Ujehofa ɛ̄gbā. Abɔɔ alɔ kē má ka Ujehofa yɔ i ya ɛgbá ku ɔdā ō lé, ili mla ɛga ō lā lɛ alɔ a, alɔ géē pi bla ɔ ajaajɛ fiyɛ. Ɛnyā kē i ya ku ɔtu okpoce ku alɔ kóō yɔ i lɛ ɔfu.

4-5. Ɔdi ta apɔlɛ éyi abɔ kéē lɛ ɔtu oplico ku uwa yale, abɔɔ ó le lɔnɔ tu uwa ō ya ɛgbá ku uwa a?

⁴ Leyi yɛ ɛgɛ nɛ apɔlɛ éyi ipu éwo ku Venezuela má otabɔ ku Ujehofa a. Ɛnyā wɛ eko néē yɔ i lɛ ɔtu oplico lɛyikwu aɔdā néē cɛgbá, o ya ɛɛ kē yɔ i lā oyeeyi gɔbu. Gbɔbu a apɔlɛ nyā nōo wɛ apɔlɛ ku Castro a, gē lɛ ije mɛmla aɔdā néē cɛgbá a, oŋma lɛ ɛhɔ ku abɔyi uwa néē gē hi a. Anɔɔ igbekponu aígwu obɔbi éyi nōo lɛ egbe gáā miyɛ uwa ajɛ abɔfu a. Otrɛyi ku apɔlɛ a nɛ iyē nu lé ka u Miguel a kahinii: “Babanya alɔ gē gbolo ce ɔdā nɛ alɔ má ŋma ajɛ ligii, nɛ alɔ gē hɛhɔ anu nɛ ācɛ je lɛ alɔ a. Ɔcɔɔci doodu, n gē gbɔɔkɔ lɛ Ujehofa kóō lɛ ɔdā nɛ alɔ cɛgbá ɛ̄cī ɔɔma a je lɛ alɔ.” Oyeeyi lɔnɔ lɛ apɔlɛ nyā nɛhi, amáŋ é lɛ ɛjɛɛji ɔtu ku uwa kpoce Ujehofa. É kpɔtuce ɔfu nɛ Adā alɔ nōo yihɔtu alɔ a lɛ, ō bi le ya ɛgbá ku ɛ̄cī doodu ku uwa lɛ uwa a. Ohigbu ɛnyā ikɔkɔ nɛ aunwalu a géē pi uwa gā igbihi a, é yɔ i gɔbu yɔ i gā ōjila ku ujɔ klla yɔ i yuklɔ ku ɔna ō ta a eko doodu. É yɔ i lɛ ɛlā ku Ajɔɔcɛ a ta aflɛyi ipu oyeeyi ku uwa, Ujehofa kē yɔ i ya ɛgbá ku uwa lɛ uwa.

⁵ Ɛpleeko néē yɔ i má unwalu nɛhi nyā a, Miguel mla ɔnyā nu Yurai lɛ ɔtu ku uwa kwu ɛgɛ nɛ Ujehofa yɔ i lɛ ɛlá wu uwa a. Ekoōhī, Ujehofa bi ayinɛ ipu ujɔ le je ɔdā néē cɛgbá a lɛ uwa, klla je otabɔ lɛ u Miguel kóō lɛ uklɔ olɔhi má. Ó kē lɛ eko ɛyɛɛyɛyi ɔhá nɛ Ujehofa bi abɔ ku ɛga o yuklɔ a, le ya ɛgbá ku uwa ōhī lɛ uwa. Ujehofa i habɔ uwa ta ŋ. Ohigbu ɛnyā ɔtu okpoce nɛ apɔlɛ a lɛ a yɔ i nwune tōōtɔ̄ɔ̄. Igbihi nɛ u Yoselin ɔyi uwa nɔnya nōo jikoko fiyɛ duu a, lɛ ocabɔ ku eko éyi nɛ Ujehofa ta uwa abɔ ka a, ó kahinii: “Ó gē lɛ abɔ kwu ɔcɛ ɔtu ō má peee ɔwɛ nɛ Ujehofa gē ta ɔcɛ abɔ a. N gē má Ujehofa ka ó wɛ ɔya nɛ um gē gbolo ce gla, o ya ɛɛ ku um lā oyeeyi.” Ó klla kahinii: “Ojama nɛ alɔ má abɔɔ alɔ wɛ apɔlɛ a, lɛ alɔ tutu lɛyikwu ojama olɔnɔ fiyɛ nɛ alɔ géē má ɛcɔbu a.”

6. Eko duuma nɛ a lɛ ije jɛ ō ya ɛgbá ku uwɔ ŋ, ɔdi nɛ a lɔfu ya ku ɔtu okpoce ku uwɔ kóō lɔfu tōōtɔ̄ɔ̄ a?

⁶ Ó yɔ i lɔnɔ ta uwɔ ō ya ɛgbá ku uwɔ? Ayika āhɔ̄ olɔnɔ nɛ a yɔ anu a. Naana nɛ āhɔ̄ a lɔfu lɔnɔ nɛhi a, a bi eko a le ya ku ɔtu okpoce ku uwɔ kóō lɔfu gla. Jé ɛlā nɛ Ujisɔsi ka nōo yɔ ipu ɔkpá ku Umátiyu 6:25-34 a, cɛɛ ku a klla gbɛla tu ɔ. Leyi yɛ ocabɔ ŋma ɛpleeko ku alɔ nyā, nōo mafu ka Ujehofa gē lɛ ɛlá wu ācɛ nōo yɔ i ceyitikwu ipu ɛ̄gbā ō gba ku nu a. (1 Ukɔ́r. 15:58) Ō ya ɛnyā géē ta uwɔ abɔ ku a le jé kpɔcii klla kpɔtuce lɔfu lɔfu, ka Adā uwɔ nōo  yɔ ɔkpanco a géē ta uwɔ abɔ, ɛgɛ nɛ ó gē ya lɛ ācɛ ɔhá a. Ó jé ɔdā nɛ a cɛgbá nu a, ó kē jé ɛgɛ nɛ ó géē ya ɛgbá ɔɔma gā uwɔ a. Abɔɔ a yɔ i má otabɔ ku Ujehofa a, ɔtu okpoce ku uwɔ géē lɔfu tōōtɔ̄ɔ̄, ɛnyā géē ta uwɔ abɔ ku a lɔtu ku aojama nōo nwune fiyɛ ɛcɔbu.​—Uháb. 3:17, 18.

7. Ɛgɛ nɛ ɔkpá ku Umátiyu 8:23-26 ka a, ɛgɛnyá nɛ owu nɛhi éyi je ɔtu okpoce ku ayikpo ku Ujisɔsi ma a?

⁷ Eko éyi nɛ Ujisɔsi mla ayikpo ku nu yɔ ipu ɔkɔ a, igbekponu owu nɛhi gbɔɔ ō ta eyī isu a. Ujisɔsi bi ɔdā nōo ya otu ɔɔma a le ta ayikpo ku nu abɔɔ kéē jé, ka é cɛgbá ō ya ku ɔtu okpoce ku uwa kóō le lɔfu tōōtɔ̄ɔ̄ (Jé Umátiyu 8:23-26.) Owu nōo yɔ i ta nɛɛnɛhi a lɛ eŋkpɔ kpo tu ipu ɔkɔ a oŋma lɛ ugbagwu ku isu a, amáŋ Ujisɔsi yɔ i gbiyɔla i klla jé ɔdā nōo yɔ i ya a ŋ. Ufi lɛ ayikpo a kwu nɛɛnɛhi anɔɔ é lɛ Ujisɔsi heyi da ɔ kóō lɛ uwa hɛta a. Anɔɔ Ujisɔsi da uwa ɔwɛ ogbonɛnɛ kahinii: “Ɔdí yá nɛ̄ aá gē yúúfi āa? Aá wɛ ācɛ nēe kpɔ́tūce Ɔwɔicō nwuné ŋ́.” Ayikpo nōo yɔ i yuufi a cika ō jé ka Ujehofa lɔfu ō gbo Ujisɔsi tu mla ācɛ nōo yɔ mɛmla ɔ a. Ɔdi nɛ alɔ nwu ŋma ɛnyā a? Ɔtu okpoce olɔfu ta alɔ abɔ ku alɔ lɔtu ku aunwalu nɛhi gla, ɔdaŋ néē kóō nwune bɛɛka owu nɛhi nōo gē ta ɛyi isu a.

8-9. Ɛgɛnyá nɛ Anel má ojama lɛyikwu ɔtu okpoce ku nu a, ɔdi kē ta ɔ abɔ a?

⁸ Leyi yɛ ocabɔ ku ɔyinɛ alɔ nɔnya Anel nɛ ó lɛ ɔba ŋ, nōo ŋma éwo ku Puerto Rico a. Ó lɔtu ku ojama éyi nōo ya ku ɔtu okpoce ku nu kóō kwu lɔfu iyē fiyɛ. Ojama ku nu wɛ owu nōo ta ɔkwɔɔkwɛyi. Ojama ku nu gbɔɔ ipu ihayi ku 2017, eko nɛ owu nɛhi néē hi ka u Hurricane Maria a je ɔlɛ ku Anel cataajɛ a. Owu nɛhi nōo biya ɔdā alɛwa nyā klla ya ó lɛ uklɔ gɛ ŋ. Anel kahinii: “Ɛpleeko ɔɔma wɛ eko olɔnɔ ku oyeeyi ku um, n gē lɛ ɔtu oplico igbalɛwa. Amáŋ n gáā le nwu ō kpɔtuce Ujehofa o bu ipu ɔkɔ ō gba, cɛɛ ku ɔtu oplico kóō je um yale ŋ.”

⁹ Anel ka ɛyi ō le taajɛ ta anuɔ abɔ ku anuɔ lɔtu ku ojama a. Ó klla kahinii: “Ō yɛce ukɔ́ ku ɔwa ku Ujehofa ta um abɔ ku um lɛ ɛbɔ ku ɔtu. Ujehofa bi ayinɛ ipu ujɔ le ta um abɔ, é ta um ɔtu kwu ɔtu klla je aɔdā nɛ um cɛgbá o ya ɛɛ ku um le wi a gā um. Ujehofa le ya gā um caba caba fiyɛ ɔdā nɛ um kóō gē yɛ i ba ɔ ɛba ku nu a, ɛnyā kē ya ku ɔtu okpoce ku um kóō le lɔfu nɛhi.”

10. Ɔdi nɛ a lɔfu ya ɔdaŋ ka yɔ i má unwalu nɛhi éyi a?

¹⁰ Owu nɛhi duuma yɔ i ta ipu oyeeyi ku uwɔ babanya nɛɛ? Ó lɔfu lɛ ō ya mla owe nɛ a yɔ i má ohigbu amiya. Amāŋ ó kē lɔfu lɛ ō ya mla ōcē nōo gē biya uwɔ ɔtu, nɛ á klla gē jé ɔdā ō ya ŋ. Ó wɛ ɔkwɛyi ka lɔfu lɛ ɔtu oplico ekoōhī, amáŋ a hii cɛ lɛ ɔɔma cɛ gā uwɔ ma ō kpɔtuce Ujehofa ŋ. Pi bla Ujehofa ajaajɛ ipu ɔkɔ ō gba. Ya ku ɔtu okpoce ku uwɔ kóō lɔfu tōōtɔ̄ɔ̄, oŋma lɛ ō gbɛla tu eko ɛyɛɛyɛyi nōo gáā yɛ nɛ Ujehofa ta uwɔ abɔ ɛ ma. (Aíjē 77:11, 12) A lɛ ɔtu ku uwɔ ya ekponu gla, ka Ujehofa i gáā habɔ uwɔ ta ŋ, ó gáā ya lɛ a babanya ŋ, ó kē gáā ya lɛ a gboogboo gla ŋ.

11. Ɔdiya nɛ alɔ cika ō lɛ ɔtu ku alɔ ya ekponu o yɔ i lɛyitaajɛ lɛ ōmiya duuma nɛ ɔwa ku alɔ ya a?

 ¹¹ Ɔdi ɔhá lɔfu ta uwɔ abɔ ku a lɔtu ku ojama a? Ɛgɛ nɛ Anel ka gbɔbu a, ɛyi ō le taajɛ nɛ. Nwu ō kpɔtuce ācɛ nɛ Ujehofa mla Ujisɔsi kpɔtuce uwa a. Ekoōhī ācɛ nɛ Ujehofa fu kéē ma ɔwɛ fu lɛ alɔ a, lɔfu da alɔ ku alɔ ya ɔdā nōó lɛyi tu alɔ ŋ duudu. Naana nɛ ó lɛ a, Ujehofa gē hɔhā ce ɛyi ō le taajɛ. Alɔ le má ŋma ɛlā ku nu ɛ mla aɔdā ɛyɛɛyɛyi nɛ ācɛ nōo hayi kpaakpa má ɛ ma, ka ɛyi ō le taajɛ gē gbo oyeeyi ku ɔcɛ tu. (Oyɛb. 14:1-4; 2 Úklɔ́ 20:17) Gbɛla tu aocabɔ ɛgɛnyā lipu lipu. Ō ya ɛnyā géē ya ku ɔtu nɛ a le ya ekponu a kóō lɔfu tōōtɔ̄ɔ̄, lɛyikwu ō bi ɔwɛ nɛ ɔwa ku Ujehofa gē mafu lɛ alɔ a le yuklɔ babanya mɛmla ɛcɔbu. (Uhíb. 13:17) Ohigbu ɛnyā, a kē gáā yuufi eko ku owe nōó gáā gboji ō wa gɛ ŋ ma ŋ.​—Aíit. 3:25.

12. Ɛgɛnyá nɛ ɔkpá ku Ulúku 18:1-8 mafu ɛgɛ nɛ ō lɛ ɔtu okpoce mla ō lɔtu ku oyaŋmo tɛɛma kwu iyi uwa a?

¹² Ujisɔsi jé ka oyaŋmo géē ya ku ayikpo ku nu kéē má ojama ku ɔtu okpoce ku uwa. O ya ɛɛ kóō ta uwa abɔ lɔtu ku nu a, ó da uwa aciije éyi néē ta taajɛ ipu ɔkpá ku Ulúku a. Ujisɔsi ka uwa ɔ̄kā ku ɔnyā okwū éyi nōo gē jikwu gē gbɔɔkɔ eko doodu, lɛ ɔcɛ ohɛpɔ obɔbiipu éyi cɛɛ kóō lɛ ɛpɔhi hɛ lɛ ɔ. Ɔnyā okwū a jé kpɔcii, ka ɔdaŋ ka ɛ̄jɛ̄ i jɛ ɔ ō yɔ i ba ɔcɛ ohɛpɔ a ɛba ŋ, ó géē ta ɔ abɔ. Igbihaajɛ, ɔcɛ ohɛpɔ a gā jahɔ ta ɔ lɛ ɛpɔhi hɛ lɛ ɔ. Ɔdi wɛ ɛlā ō nwu nōo yɔ anu a? Alɔ jé ka Ujehofa i bɔbiipu ŋ. Anɔɔ Ujisɔsi gā da uwa kahinii: “Ó lɛ ā, Ɔwɔicō í gáā hɛ́pɔ̄hi lɛ ācɛ nēe wɛ ákú nū nēe gē jikwū otú mɛ́mla ɛnɔ tū ɔ̄ kóō tá uwā abɔ̄ ā ŋ́ nɛɛ?” (Jé Ulúku 18:1-8.) Anɔɔ Ujisɔsi klla ka kpɔ kahinii: ‘Amáŋ Ɔyinɔnyilɔ ku Ɔcɛ a géē má ācɛ nēe lɔtuce Ɔwɔico ɛgɛnyā gla?’ Eko duuma nɛ alɔ yɔ i má unwalu amáŋ oyaŋmo, alɔ cɛgbá ō gbeyicii klla yɔ i ceyitikwu mafu, ka alɔ lɛ ɔtu okpoce olɔfu bɛɛka aku ɔnyā okwū ɔɔma a. Oŋma lɛ ō lɛ ɛdɔ ɔtu okpoce ɛgɛnyā, alɔ géē jé kpɔcii ka eko kpii nōo yɔ i wa a amāŋ eko ɔhá ɛcɔbu, Ujehofa géē ya odee o ya ɛɛ kóō ta alɔ abɔ. Alɔ klla cika ō kpɔtuce ka ɔkɔ ō gba lɔfu iye nɛhi. Ekoōhī, ohi ku ɔkɔ ō gba ku alɔ lɔfu wa ɔwɛ nɛ alɔ i kóō leyice ŋ.

13. Ɛgɛnyá nɛ ɔkɔ ō gba wɛ otabɔ lɛ apɔlɛ éyi nōo yɔ i má oyaŋmo a?

¹³ Leyi yɛ ocabɔ ku ɔyinɛ alɔ nɔnya éyi nɛ iyē nu lé ka u Vero, nōo lā ipu éwo ku Congo a. Vero, mla ɔba nu nɛ ó wɛ Ɔcɛ Ocijali ku Ujehofa ŋ, mla ɔyi uwa nɔnya nōo wɛ ihayi 15 a le kwu ŋma ipɔlɛ ku uwa, ohigbu ku ígwu ku aicɔɔja éyi gáā gbɔɔ ō kpɛfu tu uwa. Abɔɔ é yɔ i nyɔ ɔwɛ a, é gā ɛga nɛ aicɔɔja a lɛ ɔwɛ ŋmo, é lɛ uwa kpo kwu anɔɔ é ka aa géē je uwa kpo ŋmo a. Abɔɔ u Vero gbɔɔ ō jikwu a, ɔyi nu a ceyitikwu o ya kóō ta ɔ ɔtu waajɛ. Ó gbɔɔkɔ tɛɛcɛ gbomgbom, ó klla hi iyē ku Ujehofa igbalɛwa abɔɔ ó yɔ i gbɔɔkɔ a. Eko nɛ ó lɛ ɔkɔ gba mɛ a, otrɛyi ku ígwu ku aicɔɔja a lɛ ɔka da ɔ kahinii, “Ɔyinɔnya, ɔnyɛ nwu uwɔ ɛgɛ nɛ a géē gbɔɔkɔ a?” Anɔɔ ó toohi kahinii, “Ɛ́nɛ́ um nwu um a, ó ya ɛnyā ŋma ocabɔ ku ɛ̄nɛ̄ ō yɔ  ipu ɔkpá ku Umátiyu 6:9-13 a.” Anɔɔ otrɛyi ku aicɔɔja a da ɔ kahinii, “Ɔyinɔnya, awɔ mɛmla ɛ́nɛ́ uwɔ mla adā uwɔ aa nyɔ ɛbɔ, Ujehofa Ɔwɔico ku aa kóō kē lɛ aa gbotu!”

14. Ɔdi lɔfu je ɔtu okpoce ku alɔ má a, ɔdi kē gáā ta alɔ abɔ lɔtu a?

¹⁴ Aocabɔ ɛgɛnyā gē nwu alɔ ku alɔ jama jama, je mlanyi ɛgɛ nɛ ɔkɔ ō gba cɛgbá lɛ a ŋ. Amāŋ ɔdaŋ ku alɔ i miyɛ ohi ku ɔkɔ ō gba ku alɔ boobu amáŋ ɔwɛ nōo teyi peee ŋ bɛ? Bɛɛka ɔnyā okwū ipu aciije ku Ujisɔsi a, gɔbu ku a yɔ i gbɔɔkɔ, ku a klla lɛ ɔtuce ka Ujehofa i gáā habɔ uwɔ ta ŋ. Eko duuma nɛ eko a le ya, ó géē bi ɔwɛ éyi amáŋ ɔhá le cila ɔkɔ ō gba ku uwɔ. Gɔbu ku a yɔ i ba Ujehofa kóō je alelekwu ihɔ ku nu gā uwɔ. (Ufíl. 4:13) Bla ka ó gboji gɛ ŋ, Ujehofa géē hɔha ce uwɔ nɛhi nɛ a kóō géē je mlanyi owe duuma nɛ a má ɛ ma. Abɔɔ a mahayi kpaakpa yɔ i lɔtu ku ojama babanya oŋma lɛ otabɔ ku Ujehofa a, ó géē yɔ i lɛ ɔfu tu uwɔ iyē tōōtɔ̄ɔ̄ ō lɔtu ku ojama nōo yɔ i wa ɛcɔbu a.​—1 Upít. 1:6, 7.

15. Ɛgɛ nɛ ɔkpá ku Umátiyu 17:19, 20 mafu a, unwalu nyá nɛ ayikpo ku Ujisɔsi má a?

¹⁵ Ujisɔsi nwu ayikpo ku nu ka ɔtu okpoce géē ta uwa abɔ lɛ āhɔ̄ olɔnɔ yale. (Jé Umátiyu 17:19, 20.) Ó lɛ eko éyi néē nu alelekwu obɔbi bɛɛcɛ ŋma iyē ku ɔcɛ éyi gla ŋ, naana néē humayi nu uwa bɛɛcɛ gbɔbu ɛɛ ma. Ɔdiya ɛɛ néē nu alelekwu obɔbi nyā bɛɛcɛ gla ŋ ma? Ujisɔsi kwu ɔ ta uwa eyī peee ka é cɛgbá ɔtu okpoce nōo nwune fiyɛ ɛ̄nɛ̄ é lɛ ɛpleeko ɔɔma a. Ó klla da uwa ka ɔdaŋ ka é lɛ ɔtu okopce nōo nwune nɛhi, ɛ̄jɛ̄ i gáā jɛ uwa ŋ, ɔdaŋ ka é kóō yɔ ipu āhɔ̄ olɔnɔ. Ɔdaŋ ka unwalu a kóō nwune bɛɛka ɛfu a naana, é géē ya ɔ lé! Icɛ duu, alɔ lɔfu yɔ ipu āhɔ̄ olɔnɔ nɛhi nōo lɔfu ya alɔ bɛɛka alɔ i gɔbu yɔ i lɔtu gla gɛ ŋ ma.

16. Ɛgɛnyá nɛ ɔtu okpoce ta u Geydi abɔ kóō lɔtu igbihi néē lɛ ɔba nu ŋmo a?

¹⁶ Gbɛla tu ocabɔ ku Geydi, nōo wɛ ɔyinɛ alɔ nɔnya ŋma Guatemala a. É lɛ ɔba nu Edi ŋmo, ɛ̄cī éyi néē yɔ i cigbihi wa ɔlɛ ŋma ōjila ku ujɔ a. Ɛgɛnyá nɛ ɔtu okpoce ku Geydi humayi ta ɔ abɔ kóō lɔtu ku ɔtu nobi nɛhi nyā a? Ó kahinii: “Ɔkɔ ō gba gē ya ku um je iyo nɛhi ku um ta lɛ Ujehofa, ɛnyā kē i ya ku um lɛ ɛbɔ ku ɔtu. N gē má ɛgɛ nɛ Ujehofa lɛ ɛlá wu um a, o bu ipu apɔlɛ ku um mla aɔya ku um ipu ujɔ. Ō lɛ ɔdā alɛwa o ya ipu ɛ̄gbā ō gba Ujehofa gē ya ku ɔnɔ nɛ um yɔ i má a kóō bēē tu waajɛ. Ó klla gē ta um abɔ ku um yɔ i lā oyeeyi ku um ɛ̄cī doodu ɛmɛɛma, cɛɛ ku um lɛ ɔtu oplico lɛyikwu ooci ŋ. Oŋma lɛ āhɔ̄ olɔnɔ nɛhi nyā nɛ um gā ipu nu klla bɛɛcɛ a, n gā le má ɛ, ka ɛdɔ ku ojama duuma nɛ um géē má ɛcɔbu a, n géē lɔtu klla mahayi gla oŋma lɛ otabɔ ku Ujehofa, Ujisɔsi mɛmla ɔwa ku Ujehofa.”

17. Ɔdaŋ ku alɔ lɛ unwalu nɛhi nōo lɛbɛɛka ɛfu a má, ɔdi nɛ alɔ lɔfu ya a?

¹⁷ Ɔcɛ nɛ a yihɔtu ku nu nɛhi gekwu, nɛ a yɔ i yekwu ku nu? Lɛ eko taajɛ ku a ya ku ɔtu nɛ a kpoce oheyi ŋma ɔlekwu a kóō le lɔfu nɛɛnɛhi. Jé aɔka ku Ubáyíbu nōo lɛ ō ya mla eko néē hɛ ācɛ éyi ŋma ɔlekwu. A yɔ i lɛ ɔtu nobi ohigbu ɔcɛ éyi ŋma apɔlɛ ku uwɔ néē je baajɛ ŋma ipu  ujɔ? Ó lɛ a, lɛ eko taajɛ cɛɛ ku a klɔcɛ o ya ɛɛ ku a jé kpɔcii ka ɔwɛ nɛ Ujehofa gē pi alɔ āhɔ̄ a lɔhi fiyɛ duu a. Unwalu amāŋ āhɔ̄ olɔnɔ duuma nɛ a yɔ anu a, má ɔ ka ó wɛ ɛnɛnɛ ɛga gā uwɔ o ya cɛɛ ku ɔtu okpoce ku uwɔ kóō le lɔfu tōōtɔ̄ɔ̄. Da Ujehofa ɛgɛ nɛ ɔtu yɔ i ya uwɔ lɛ yiili a. A hii yɔ ofoofu uwɔ klla kwu iyi uwɔ ŋma ɛgiyi ācɛ ŋ. Tubla ayinɛ ipu ujɔ ajaajɛ. (Aíit. 18:1) Ya aɔdā nōo géē ta uwɔ abɔ lɔtu, ɔdaŋ ku a kóō yɔ i jikwu eko duuma nɛ ɛlá ku uwɔ gā kwu āhɔ̄ nɛ a yɔ ipu nu a naana. (Aíjē 126:5, 6) Gɔbu ku a yɔ i gā ōjila ku ujɔ, yuklɔ ku ɔna ō ta klla jé Ubáyíbu eko doodu. Cɛɛ ku a lɛ ɔtu ku uwɔ kwu aɛnɛnɛ ɔhā nɛ Ujehofa le tu yɔ i gbeyi uwɔ ɛcɔbu a. Abɔɔ a géē yɔ i má ɛgɛ nɛ Ujehofa yɔ i ta uwɔ abɔ lɛ a, ɔtu nɛ a kpoce ɔ a géē yɔ i lɔfu tōōtɔ̄ɔ̄.

18. Ɔdaŋ ku a lɛ aya nɛ ɔtu okpoce ku uwɔ i lɔfu iye ŋ ma jé, ɔdi nɛ a lɔfu ya a?

¹⁸ Ɔdaŋ ku aojama nɛ a má gbɔbu amāŋ yɔ i má baabanya a, lɛ aya nɛ ɔtu okpoce ku uwɔ i lɔfu ŋ mafu, abɔ kóō hii hɛ uwɔ iye ŋ. Má ɛnyā ka ó wɛ ɛga ō ya ku ɔtu okpoce ku uwɔ kóō lɔfu iye tōōtɔ̄ɔ̄. Lɛ ɛba ekponu nɛ ayikpo ku Ujisɔsi ba a ba duu, eko néē da Ujisɔsi kahinii: “Le yá kú alɔ lɔtūce Ɔwɔicō nwuné fíyɛ́.” (Ulúk. 17:5) Klla gbɛla tu aocabɔ nɛ alɔ kɛla lɛyikwu ɔ ipu ikpɛyi ɛlā nyā a. Bɛɛka u Miguel mla Yurai a, blatu ɛjɛɛji eko nɛ Ujehofa je otabɔ gā uwɔ a. Bɛɛka Anel mla ɔyinɔnya ku Vero a, gbɔɔkɔ ŋma ipu ɔtu ku uwɔ lɛ Ujeofa, ofluflu eko nɛ a yɔ i má unwalu nɛhi. Cɛɛ, bɛɛka u Geydi a, le jé cɛɛ ku a klla miyɛ cɛ ka Ujeohfa lɔfu je otabɔ nɛ a cɛgbá a gā uwɔ ō bu ipu apɔlɛ ku uwɔ mɛmla aɔya ku uwɔ. Ɔdaŋ ku a je ɛga lɛ Ujehofa kóō ta uwɔ abɔ, ku a lɔtu ku aojama nɛ a yɔ i má baabanya a, ɛnyā géē ya ku a jé kpɔcii klla kpɔtuce lɔfu lɔfu fiyɛ otɛtɛ, ka Ujehofa géē ta uwɔ abɔ lɔtu ku aojama nɛ a lɔfu má ɛcɔbu a. 

19. Ɔdi nɛ Ujisɔsi jé kpɔcii a, ɔdi nɛ a kē lɔfu jé kpɔcii a?

¹⁹ Ujisɔsi ta ayikpo ku nu abɔ kéē jé ɛga néē cɛgbá ɔtu okpoce tōōtɔ̄ɔ̄ a, naana a, ó lɛ ɔtu ō bɛɛpa lɛyikwu uwa ŋ. Ó jé ka oŋma lɛ otabɔ ku Ujehofa, é géē hayi kpaakpa lɔtu ku aojama néē géē má ɛcɔbu a. (Ujɔ́n. 14:1; 16:33) Ó klla jé kpɔcii ka ɔtu okpoce olɔfu géē ta ɛwa nɛhi ku ācɛ a abɔ, o ya ɛɛ kéē le wi o bu ipu eko ku owe nɛhi nōo yɔ i wa ɛcɔbu a. (Mafú 7:9, 14) A géē wɛ ipu uwa a? Oŋma lɛ otabɔ ku Ujehofa a géē wɛ, ɔdaŋ ku a bi eko nɛ a lɛ baabanya a le bi ɔtu okpoce ku uwɔ jɛ kóō klla le lɔfu fiyɛ otɛtɛ!​—Uhíb. 10:39.