Ujehofa dɔka ku ācɛ ɛpa nōo tine kéē lɛ iyi uwa lɛ a, kéē lɛ ɛma olɔhi nōo géē yɔ ɔtahɛ ku uwa piyoo. (Umát. 19:4-6) Ɔdaŋ ku a dɔka ō lɛ ɔnyā amāŋ ka ɔba, ɛgɛnyá nɛ a gáā dɔka ɔba amāŋ ka ɔnyā olɔhi a? Ohigbu ku Ujehofa ya alɔ a, ó jé ɔdā nɛ alɔ cɛgbá ō ya, o ya ɛɛ ku alɔ lɛ apɔlɛ olɔhi. Ohigbu ɛnyā, ɔdaŋ ku a bi aukɔ́ nɛ ó je lɛ alɔ a le yuklɔ, alɔ géē lɛ eeye ɔkwɔɔkwɛyi. Ku alɔ leyi yɛ aukɔ́ ōhī nyā.

Aflɛyi, alɔ cɛgbá ō bi ɛga ku Ubáyíbu nyā ɔtu. Ó kahinii: “Ɔtū kú ɔ̄cɛ ge plá ɔ̄cɛ fíyɛ́ ɔdā dóódu á.” (Ujɛr. 17: 9) Ɔdaŋ ku a ācɛ ɛpa nōo dɔka ō lɛ iyi uwa, lɛ iyi uwa má eko aflɛyi klla gbɔɔ ō taha ku iyi uwa, ihɔtu néē gē lɛ lɛ iyi uwa ɛpleeko ɔɔma a gē nwune nɛhi. Amáŋ ɔdaŋ ku ācɛ ɛpa le miya ō kwu iyi uwa lɛ ohigbu ɛgɛ nɛ ɔtu gē ya uwa lɛyikwu iyi uwa a, ó lɔfu ya ku unwalu kóō wa igbihaajɛ gla. (Aíit. 28:26) Ɔɔma ya ɛɛ nóō wa ɔdā ijeeyi ku ācɛ ɛpa nōo miya ō lɛ iyi uwa a, kéē hii da iyi uwa ɛgɛ nɛ ɔtu ya lɛ lɛyikwu kwu iyi uwa gbɔbu ɛɛ kéē je iyi uwa lɔɔlɔhi ŋ ma.

Aíita 22:3 kahinii: “Ojéeyī lɛ unwalu má yɔ̄ ī wā, ó gē kwu ŋmá ɛgiyí nū, amáŋ olíla ā gē nyɔ̄ cuúcuú gaá wu ɔdōbɔ̄bí ɔ́ɔmā abɔ̄, cɛ́ɛ́ ó gbɔɔ́ ō hīíjémā igbīhāajɛ.” Ɔdi lɔfu wɛ unwalu nɛhi ɔhá nōo ya, nɛ ō bi ɛga o dɔka ɔba amāŋ ka ɔnyā ipu itanɛti le yuklɔ i lɔhi ma? Ó wɛ ɔdā ō kwiiye nɛhi ohigbu ka ācɛ ōhī nōo má ācɛ ipu intanɛti klla ō gbɔɔ ō taha ku iyi uwa a, gáā le jé igbihaajɛ ka ɛkɛmgbɛ nɛ ɔcɛ néē yɔ i taha ku nu a ka lɛ uwa a. Ācɛ obɔbi alɛwa klla gē bi ifoto mla iyē ku ɛga ɛyɛɛyɛyi le pla ācɛ, o ya ɛɛ kéē wi uwa uwi. Ekoohi, ōhī ku uwa gē ka ku a wɛ Ācɛ Ocijali Ku Ujehofa.

Leyi yɛ unwalu ɔhá kpɔ. Ɛga nɛ ācɛ gē bi le dɔka ɔba amāŋ ka ɔnyā ipu itanɛti a, é gē bi ɔdā ō le gbaaluka cɛɛ kē le miyɛ ɛdɔ ācɛ nōo cika ō taha iyi uwa a. Amáŋ, ó lɛ ɛga duuma nōo ka ɛdɔ odee ɛgɛnyā gē yuklɔ ŋ. Ó wɛ ɔdā ijeeyi ku alɔ kpɔtuce ucumputa nɛ ācɛ bi abɔ ya a, le ya ōmiya o cɛgbá nɛhi kóō ba tɔha ku ɔba mla ɔnyā ŋ. Aɛlā nōo yɔ ipu ucumputa i gáā je otabɔ duuma lɛ alɔ, bɛɛka aukɔ́ nōo yɔ ipu Ubáyíbu a ŋ.​—Aíit. 1:7; 3:5-7.

Ukɔ́ éyi nōo yɔ ipu ɔkpá ku Aíita 14:15 a kahinii: “Olía gē cɛ̄ ɔdā dóódu nɛ̄ ó pó ā, amáŋ ɔ̄cɛ olohílípū ā gē leyī yɛ ikpó nēé gē fu ā.” Ohigbu ɛnyā gbɔbu ɛɛ ku a miya ka ɔcɛ nyā wɛ ɔcɛ okpaakpa nɛ anuɔ gáā lɛ a, a cɛgbá ō lɛ ɔcɛ ɔɔma jé lɔɔlɔhi. Amáŋ ó gáā tɔɔtɛ ku a ya ɛnyā  gla ŋ, ɔdaŋ ka ipu itanɛti nɛ awɔ mɛmla ɔcɛ ɔɔma gē má foofunu a. Ɔdaŋ ku awɔ mɛmla ɔcɛ a gē tu ifoto ku iyi a ɛhɔ fu iyi amāŋ ku aa gē bi eko alɛwa le tu umɛsseji fu iyi, a géē ka ku anuɔ jé ɔcɛ ɔɔma ɔkwɔɔkwɛyi? Ācɛ alɛwa nōo gbɛla ku aa lɛ ɔcɛ ihɔtu ku aa má ɔkwɔɔkwɛyi ɛ ma, gē hidaago nɛhi ohigbu ɔdā nēe gē gáā má eko néē lɛ ɔcɛ ɔɔma má piii a.

Ɔcɛ ogwiije Udefidi kahinii: “Ń gē klá ɛga éyi tɔ̄há mla ācɛ o hɛ́ ācɛ lé ŋ́, ɛ́ɛ́ nɛ̄ n gē yɛ mla ācɛ ō yá obɔ̄bí mɛ́mla aóleyɛpa ŋ́.” (Aíjē 26: 4) Ācɛ alɛwa gbɛla ka ó wɛ ɔdā obɔbi ō kɛmgbɛ kéē je ifoto ku ācɛ ɔhá ta ipu ɛga nɛ ācɛ gē dɔka ɔba amāŋ ka ɔnyā ipu itanɛti a ŋ, ohigbu ka é dɔka ku ācɛ kéē má uwa ka é lɔhi nɛ. É gē je uce obɔbi ku uwa tayinu, uce obɔbi ku uwa i kéē mafu eko néē gē ta umɛseji ipu itanɛti a ŋ. Ó lɔhi ku alɔ gbɛla tu aɔka nōo ba nyā nɛhi. Naana nɛ ācɛ ōhī ku uwa ku aa wɛ Ācɛ Ocijali Ku Ujehofa a, a cɛ ɔkwɔɔkwɛyi ka é lɛ ubatisim ya ɛ? É lɛ ɛma olɔhi mla Ujehofa a? É lɛ ɛma ku abɔyi uwa mla Ujehofa a? É wɛ ācɛ néē gē lɛ ojilima ce uwa ipu ujɔ? Kɛɛ ka é gē ya uce obɔbi amāŋ “ācɛ nēe [gē] yá ucē obɔ̄bí”? (1 Ukɔ́r. 15:33; 2 Utím. 2:20, 21) É lɔfu lɛ ɔnyā amāŋ ɔba gla ɛgɛ nɛ Ubáyíbu ka a? A cɛgbá ō lɛ ohi ku aɔka nyā jé. Amáŋ ó géē lɔfu lɔnɔ ō jé ohi nyā, ɔdaŋ ku a kɛla tɔha mla ɔcɛ Ocijali duuma nōo jé ɔcɛ ɔɔma lɔɔlɔhi ŋ. (Aíit. 15:22) Alɔ kē jé ka ó lɛ ɔcɛ o gba Ujehofa ɛ̄gbā ɔkwɔɔkwɛyi duuma, nōo géē cɛ ō lɛ ɔcɛ nɛ ó gē gba Ujehofa amāŋ “cɛ̄lā Ohɔ́nyɛtá ŋ́ mā ŋ́.”​—2 Ukɔ́r. 6:14; 1 Ukɔ́r. 7: 39.

Abɔɔ alɔ gáā le jé ka ó wɛ ɔdā ijeeyi ō bi ɛga nɛ ācɛ gē le dɔka ɔba amāŋ ka ɔnyā ipu itanɛti a le yuklɔ gɛ ŋ ma, ó lɛ ɔwɛ olɔhi ɔhá nɛ alɔ lɔfu bi le dɔka ɔcɛ okpaakpa nɛ alɔ lɔfu lɛ gla. Imi nɛ a lɔfu má ɔcɛ okpaakpka nɛ a lɔfu lɛ gla? Eko nɛ alɔ gē jila tɔha wɛ eko nɛ alɔ lɔfu jé iyi alɔ gla. Ocabɔ mafu, eko nɛ alɔ yɔ ipu ōjila ku ujɔ, eko ku ojileyi nɛ̄ŋcɛ́ mla ojileyi nɛhi amāŋ ka ipu ojila ɛyɛɛyɛyi ɔhá nɛ Ācɛ Ocijali Ku Ujehofa gē lɛ a. 

Amáŋ eko nɛ ōjila tɔha i kē tɔɔtɛ ŋ, bɛɛka ɛpleeko ku ōcē ku COVID-19 nōo yɔ ipu oduudu ɛcɛ icɛ a bɛɛ? Alɔ gē bi ɔdā ō le gwo uwaya mla aucumputa ku alɔ gē gā ōjila, ɔwɛ ɛgɛnyā alɔ lɔfu má Ācɛ Ocijali nɛ ó lɛ ɔba amāŋ ka ɔnyā ɛ ŋ. A lɔfu má ɛgɛ néē gē ya ɛlā ō ka tɛɛcɛ amāŋ ka ɛgɛ néē gē ta ohi ŋma ɔtu a. (1 Utím. 6:11, 12) Igbihi nɛ aa le ya mɛ ŋma ōjila, aa lɔfu ka ɛlā mla iyi aa ɛga néē hi ka u breakout room a ɔdaŋ ku ujɔ ku uwɔ lɛ. O ŋma lɛ ō jila tɔha ɔwɛ ɛyɛɛyɛyi mla Ācɛ Ocijali ɛgɛnyā, a lɔfu leyi taajɛ ku a má ɛgɛ nɛ ó gē ya ɛlā mla ācɛ ɔhá a. O bu ɔwɛ ɛgɛnyā, a géē má ɛdɔ uce nɛ ɔcɛ ɔɔma lɛ a. (1 Upít. 3: 4) Abɔɔ eko yɔ i nyɔ nɛ aa kē yɔ i jé iyi aa lɔɔlɔhi a, a lɔfu dɔka ɔdaŋ ku aa ɛplɛɛpa lɛ ōmiya ekponu, bɛɛka ɔdaŋ ku aa ɛplɛɛpa lɔfu wɛ ɔba mɛmla ɔnyā olɔhi gla.

Ɔdaŋ ku ācɛ nōo yɔ i dɔka ɔba amāŋ ku ɔnyā a yɛce aukɔ́ ku Ubáyíbu, ó géē ya kéē lɛ eeye ɔkwɔɔkwɛyi ipu ō ba tɔha ku uwa. Ó géē lɛbɛɛka ɛlā nɛ ɔcɛ o ta Ubáyíbu éyi ka a, ó kahinii: “Ɔ̄cɛ dúúmā nōo lɛ ɔnyā [amāŋ ku ɔba lɛ] ɛɛ́, le ɔdā olɔhi yá ɛɛ́. Ó mafú gā uwɔ ka Óndú ā le ɔdā olɔhi yá gā uwɔ ɛɛ́.”​—Aíit. 18: 22.