Upɔlu ta ɔkpá kahinii: “Ɛ́gɛ́nɛ̄ ɔ̄cɛ ī kɛlā ā gekwú, íne ā í nā um tɔ́ɔwɛ glá gɛ ŋ́, íne ā yá um lɛ ā á, cɛ́ɛ́ ká n̄ yēeyī ká n̄ yúklɔ́ lɛ Ɔwɔicō.”​—Ugal. 2:19.

Ɛlā nɛ Upɔlu ta a tɛɛma kwu ɛlā okpɔcii éyi nɛ ó dɔka ō le teyi peee lɛ ujɔ ɛyɛɛyɛyi nōo yɔ Urom ipu ajɛ ku Ugalesiya a. Ó lɛ Ācɛ O Yɛce Ukraist ōhī nɛ aɛlā ō nwu ɛkɛmgbɛ a yɔ i lɛ abɔ kwu uwa iyē ɔwɛ obɔbi. Acɛnyilɔ ōhī yɔ i nwu ka gbɔbu ɛɛ ku ɔcɛ kóō lɛ onyata, ó géē cɛgbá ku ɔcɛ a kóō lɛyitaajɛ lɛ ɔdā nɛ íne ku Umosisi ka a, ofiyɛ duu lɛyikwu api ō hɛ. Amáŋ upɔlu jé ku Ɔwɔico i cɛgbá ku ācɛ nōo kpɔtuce ɔ a kóō hɛ api gɛ ŋ. Ó gbojuju mla uwa ɔwɛ nɛ ɛlā a géē ta uwa eyī peee, klla mafu ku aɛlā ō nwu nyā wɛ ɛkɛmgbɛ. Ó klla ya ku ɔtu okpoce ku ayinɛ a lɛyikwu ɛya nɛ Ujisɔsi Ukraist gwo a kóō lɔfu iyē tōōtɔ̄ɔ̄.​—Ugal. 2:4; 5:2.

Ubáyíbu le ka peee ku ɔdaŋ ku ɔcɛ gekwu, ó jé ɔdā duuma ɛɛ nɛ ɔdā duuma ɔhá gē junwalu lɛ ɔ gɛ ŋ. (Ɔ̄cok. 9:5) Ɛyi ɛlā ku Upɔlu eko nɛ ó kahinii: “Ɛ́gɛ́nɛ̄ ɔ̄cɛ ī kɛlā ā gekwú, íne ā í nā um tɔ́ɔwɛ glá gɛ ŋ́” ma, wɛ ka íne ku Umosisi i gáā lɛ abɔ kwu oyeeyi ku nu gla gɛ ŋ. Ikɔkɔ ɔɔma, Upɔlu jé kpɔcii ka ó ŋma lɛ ɔtu okpoce ku nu lɛ ɛya nɛ Ujisɔsi gwo a, ó “yēeyī cɛɛ kóō yúklɔ́ lɛ Ɔwɔicō.”

Íne a ya ku āhɔ̄ ku Upɔlu kóō le piyabɔ. Ɛgɛnyá a? Ó gboji lɛ a ŋ, ó ka ka “Ɔwɔicō gē hɛ́pɔ̄hi lɛ ācɛ ŋmá lɛ ɔtōkpóce Ujísɔ̄si Ohɔ́nyɛtá, ó wɛ o ŋmá lɛ o yá ɔdā nēé tá ipú íne ka ɔ̄cɛ kóō yá ā ŋ́.” (Ugal. 2:16) Ó teyi peee, ka íne a lɛ ɔdā ocɛgbá nɛhi éyi ya jila. Upɔlu ka lɛ Ācɛ Ugalesiya a kahinii: “É le íne ā katū ɛka ā o yá ɛ́ɛ́ kóō mafú lɛ ācɛ ka ɔdōbɔ̄bí nēé bá ī yá ā wɛ íne nēé bá ī bīya ɔkwɛ̄yi á. Ɔwɔicō yá íne ā o yá ɛ́ɛ́ kóō ī tīile jāā gbéeko nɛ̄ ɔyí kú Ébrahām ɔ́ɔmā nɛ̄ Ɔwɔicō cokónu lɛ ɔ́ ā gā.” (Ugal. 3:19) Ii, íne a ya kóō teyi peee ka alɛɛcɛ nōó jila iyē ŋ ma i yɛce íne a mɛɛlɛ gla ŋ, ka é klla cɛgbá ɛya ō gwo amoomɛ nōó lɛ ɛnyá duuma ŋ. Ohigbu ɛnyā, íne a ta ācɛ abɔ kéē jé peee ku Ujisɔsi wɛ “ɔyí” a. Ŋma lɛ ō kpɔtuce Ujisɔsi Ukraist, Ɔwɔico géē hɛpɔhi lɛ ɔcɛ ɔɔma. (Ugal. 3:24) Upɔlu wa oŋmɛyi ku ɛlā ɔɔma ohigbu ka ó bu ipu íne a, ó gā miyɛ klla kpɔtuce Ujisɔsi. Ohigbu ɛnyā, Upɔlu “gekwú íne ā í ke na ɔ tɔ́ɔwɛ glá gɛ ŋ́” ó klla gā “yēeyī cɛɛ kóō yúklɔ́ lɛ Ɔwɔicō.” Íne a i lɛ abɔ kwu oyeeyi ku nu gla gɛ ŋ, amáŋ Ɔwɔico foofunu mɛɛnɛ.

Upɔlu ka ɔdā ekponu ɔɔma ipu uleta nɛ ó ta gē lɛ Ācɛ Urom a. Ó kahinii: “Ɛ́gɔ́ɔmā nōó lɛ lɛ aá dúú á ayínɛ́ um nɔ̄nyā mɛ́mla ayínɛ́ um nɔ̄nyīlɔ. Ɛjī kwɛjī lɛ íne ā nɛɛ, ɛ́gɛ́nɛ ɔ̄cɛ ī kɛla, aá gekwú dúú ohígbū ka aá wɛ ābɔ̄ kú ɔkpíyē kú Ohɔ́nyɛtá ā . . . É lɛ alɔ hɛ́tá ŋmá íne ā ɛ́ɛ́, ohígbū ka alɔ gekwú ɛgiyí ɔdā nōo tɛtɛ tū alɔ agbá ā.” (Uróm 7:4, 6) Ipu ɛga ku Ubáyíbu nyā mla ɔkpá ku Ācɛ Ugalésīya 2:19 mafu ka Upɔlu i yɔ i kɛla lɛyikwu ō kwū bɛɛka ɔcɛ ō biye íne ɛhaajɛ íne a ŋ. Ikɔkɔ ɔɔma, ó yɔ i kɛla lɛyikwu ohɛta ŋma íne a. Íne a i gáā lɛ abɔ kwu oyeeyi ku nu mla ācɛ bɛɛka anu a gɛ ŋ. É le hɛta ŋma lɛ ō kpɔtuce ɛya nɛ Ujisɔsi gwo a.