1. Ɛgɛnyá nɛ Ɔyinɛ alɔ nɔnyilɔ Urussell mla ígwu ku nu gē bi le ya oklɔcɛ a, ɔdiya nɛ ɔwɛ ɔɔma kē lɔhi a?

ODEE nōo fiyɛ ihayi ofu ce ɛhɔ nōo gáā yɛ a, Ɔyinɛ alɔ nɔnyilɔ C. T. Urussell mla aoklobiya ku nu nōo wɛ ígwu nɛ́ŋcɛ̄ ku ācɛ nōo gē klɔcɛ ku Ubáyíbu a, gbɔɔ ō jila tɔha. É dɔka ō má ɔ, ɔdaŋ ka é géē nwu ɔdā nɛ Ubáyíbu ka ɔkwɔɔkwɛyi lɛyikwu Ujehofa, Ujisɔsi Ukraist, āhɔ̄ ku ācɛ nōo kwū, mla ikwū ku Ujisɔsi a. Ɛgɛ néē gē ya oklɔcɛ a i lɔnɔ ŋ. Ɔcɛ éyi géē dɔka éyi, cɛɛ, ɛjɛɛji uwa géē leyi yɛ aɛga ku Ubáyíbu nōo kɛla lɛyikwu ɛlā ɔɔma. Oŋmɛyi ku nu, é géē lɛ ɔdā néē nwu ŋma ɔdā néē jila má a ta taajɛ. Ujehofa ta acɛnyilɔ nyā abɔ kéē jɛyi ku ɔkwɛyi alɛwa ŋma Ubáyíbu nōo cɛgbá nɛhi. Aɔkwɛyi a kē cɛgbá nɛhi lɛ alɔ icɛ kpɔ ɛ.

2. Ekoohi nɛ alɔ dɔka ō jɛyi ku akacɛ ku Ubáyíbu, ɔdi lɔfu ya ku alɔ kóō hii jɛyi nu ɔwɛ okpaakpa ŋ ma?

² Igbihaajɛ a, ācɛ nōo ba nyā gbɔɔ ō má, ka ō jɛyi ku akacɛ ku Ubáyíbu lɔnɔ nɛhi fiyɛ ō jɛyi ku aɛlā okpɔcii nōo yɔ ipu Ubáyíbu a. Ɔdiya nōó lɛ a? Ɔdā éyi nōo ya a wɛ kahinii, igbalɛwa ɛyi ku akacɛ ku Ubáyíbu gē jé teyi peee fiyɛ, ɔdaŋ ka ó gbɔɔ ō ya jila, amāŋ igbihi nōó kwu ya jila. Ɔdā ɔhá kpɔ, ɔdaŋ ku alɔ dɔka ō jɛyi ku akacɛ éyi lɔɔlɔhi, alɔ cika ō leyi yɛ ɛjɛɛji akacɛ a. Ɔdaŋ ka alɔ leyi yɛ aya éyi foofunu, klla leyi gwu aya ohile bonu, alɔ i gáā lɔfu jɛyi nu ɔwɛ okpaakpa ŋ. Ó lɛbɛɛka ɔdā ɛgɛnyā ya mla akacɛ éyi nōo yɔ ipu ɔkpá ku Ujowɛlu á. Babanya, alɔ géē leyi yɛ akacɛ ɔɔma kpɔ, ku alɔ má ɔdā nōo ya nɛ alɔ cika ō lɛ ɔwɛ nɛ alɔ jɛyi nu gbɔbu a piyabɔ a.

3-4. Gbɔbu lɛ obabanya, ɛgɛnyá nɛ alɔ jɛyi ku akacɛ nōo yɔ ipu ɔkpá ku Ujówɛ̄lu 2:7-9 a?

³ Jé Ujówɛ̄lu 2:7-9. Ujowɛlu ka taajɛ ku aefuma géē je  éwo ku Isrɛlu cataajɛ. Aefuma nyā géē bi ayinu ku uwa nōo lule bɛɛka aku agaba a, le lé ɛjɛɛji aɔcí mla aepu nōo ba ipu ajɛ ku Isrɛlu a! (Ujów. 1:4, 6) Ŋmiifi ihayi alɛwa, alɔ jɛyi ku akacɛ nyā, ka ó yɔ i kɛla lɛyikwu ɛgɛ nɛ ācɛ ɔlɛ Ujehofa géē yɔ i tɔɔna, bɛɛka ɔwa ku efuma nɛ ɔdā duuma i gáā ci uwa gla ŋ ma. Alɔ klla jé ka uklɔ ɔɔma géē bi ifi wa ipu “ajɛ” a, amāŋ lɛ ācɛ nōo yɔ ɛhaajɛ íkwu ku aotrɛyi ku aɔwɛ ō gba ɛ̄gbā a. *

⁴ Ɔdaŋ ku alɔ jé Ujówɛ̄lu 2:7-9 foofunu, ó géē ya alɔ bɛɛka ɛyi nu kpaakpa lɛ a. Amáŋ, ɔdaŋ ku alɔ leyi yɛ ɛjɛɛji ɔdā nɛ akacɛ ɔɔma ka a lɔɔlɔhi, alɔ géē má, ka ó cɛgbá ku alɔ jɛyi nu ɔwɛ ɛyɛɛyi. Alɔ leyi yɛ ɔdā ɛnɛ nōo ya nɛ alɔ ka lɛ a.

5-6. Ɔka nyá wa ipu ɔtu ku alɔ, abɔ alɔ leyi yɛ ɔkpá ku (a) Ujówɛ̄lu 2:20 a? (b) Ujówɛ̄lu 2:25 a?

⁵ Aflɛyi a, Ujehofa cokonu ku anuɔ géē nu aefuma a gā ɛga ‘oligbó.’ (Ujów. 2:20) Ɔdaŋ ku aefuma a kwɛyi Ācɛ Ocijali Ku Ujehofa nōo gē lɛyitaajɛ lɛ ɔ́da ku Ujisɔsi, ō nyɔ i tɔɔna klla lɛ ācɛ piya ayikpo ku nu, ɔdiya ɛɛ nɛ Ujehofa géē cokonu ku anuɔ géē nu uwa gā ɛga oligbo a? (Isík. 33:7-9; Umát. 28:19, 20) Ó teyi peee ka ó wɛ ācɛ ɔlɛ nu nɛ Ujehofa gáā nu a ŋ, amáŋ odee amāŋ ɔcɛ éyi nōo wɛ olɛla ku ācɛ ɔlɛ nu a nɛ.

⁶ Ɔdā ɔmpa, gbɛla tu ɛlā ku Ujówɛ̄lu 2:25 ɛ. Abɔɔ Ujehofa kahinii: “N géē kpó ɛjɛ̄ɛ̄jī ɔdā nēe cɛ̄ aá úfu kpɛ́m, ipú iháyí nɛ̄ ɛdɔ ɛyɛ́ɛyɛ́yí kú aéfūma, kpó aɔ́dɛ̄hɔ̄ kú aá lé ā, cīgbīhi lɛ aá. Ami tū aéfūma, o tómbli, aóbīya ɔdā mɛ́mla aóhɛ́ ɔdā lé, nēe wɛ aícɔ́ɔja nɛ̄hi kú um a ɛhɔ̄ wā ɔlɛ́ aá á.” A má ɔ ka Ujehofa cokonu ō kpo ɛjɛɛji ɔdā nɛ aefuma a biya a “cīgbīhi” kpɔ? Ɔdaŋ ka aefuma a kwɛyi ācɛ ɔlɛ Ujehofa nōo gē tɔɔna a, ɛnyā géē yɔ i mafu ka olɛhɔ néē i tɔɔna a géē cɛ lɛ ācɛ má owe. Ó lɛ a ŋ? Amáŋ, olɛhɔ ku alɔ a kē i nya oyeeyi ta, ó klla lɔfu lɛ abɔ kwu ɔcɛ ō ya ɔdobɔbi ɔtu kóō piyabɔ. (Isík. 33:8, 19) Ɛnyā kē wɛ ɔhā nɛhi lɛ ācɛ nōo cɛ ō piyabɔ a!

7. Ipu ɔkpá ku Ujówɛ̄lu 2:28, 29 a, ɔdi nɛ ɛlā nōo kahinii, “igbīhāajɛ a” ta alɔ abɔ jé a?

⁷ Jé Ujówɛ̄lu 2:28, 29. Ɔdā ɔmɛta a lɛ ō ya mla ɛgɛ nɛ aɔdā nōo ya ipu akacɛ a ya ɔgbɔɔgba a. Ujehofa kahinii: “Igbīhāajɛ a, n géē cē Alelékwū kú um.” Ɔɔma le ka Ujehofa géē ya ɔɔma igbihi nɛ aefuma a kwu uklɔ ku uwa i ya mɛ. A má ɔ lɛ a ŋ? Ɔdaŋ ka aefuma a wɛ ācɛ ō tɔɔna lɛyikwu Ajɔɔcɛ ku Ɔwɔico, ɔdiya ɛɛ nɛ Ujehofa ce Alelekwu ku nu kla uwa, igbihi néē kwu uklɔ ku ɔna ō ta ku uwa i ya mɛ a? Ɔkwɛyi a wɛ kahinii, ɔdaŋ ka ó wɛ ɛgɛ nɛ Ujehofa yɔ i bi Alelekwu Ihɔ ku nu nōo lɔfu nɛhi a le ta uwa abɔ ŋ nɛɛ, abɔ é yɔ i ya uwa ŋmo klla yɔ i je uklɔ ku uwa ci a, ɛ̄jɛ̄ ō tɔɔna géē yɛ i kwu jɛ uwa ɛ.

8. Anyɛ nɛ aefuma nōo yɔ ipu ɔkpá ku Ɔdā Nēé Mafú Lɛ Ujɔ́ni 9:1-11 kwɛyi uwa a? (Má ifoto nōo yɔ iyɔbu ku Ɔda Ō Gbaajɛ nyā a.)

⁸ Jé Ɔdā Nēé Mafú Lɛ Ujɔ́ni 9:1-11. Babanya, alɔ leyi yɛ ɔdā ɔmɛnɛ a. Gbɔbu a, alɔ ka ku ɔdā nɛ aefuma a ya a nɛ Ujowɛlu kɛla lɛyikwu ɔ a, kwɛyi uklɔ ku ɔna ō ta ku alɔ. Alɔ kē ka lɛ a, ohigbu akacɛ éyi ipu ɔkpá ku Ɔdā Nēé Mafú Lɛ Ujɔ́ni nōo gbla aku Ujowɛlu nyā a. Ɔɔma kɛla lɛyikwu aefuma nɛ eyī ku uwa lɛbɛɛka aku ɔlɛɛcɛ a, nɛ “ɔdā nōo lɛbɛ̄ɛka  ukata kú ugóolu ā” klla kwu ɛyi ku uwa a. (Mafú 9:7) Aefuma nyā ya “ācɛ [aolɛla ku Ɔwɔico] nēe fukɔ̄ lɛ Ɔwɔicō udɔ̄bū ŋ́ mā” owe olɔnɔ nɛhi ɔya ɛhɔ. Ɔya ɛhɔ nɛ aefuma kē lɔfu lā oyeeyi ku uwa gáā kwu gla a. (Mafú 9:4, 5) Ɛnyā yɔ i kɛla peee lɛyikwu ācɛ nɛ Ujehofa lɛ anɔ tu uwa ɛyi a. É gē tɔɔna lɛyikwu ɛpɔ nɛ Ɔwɔico gáā ka tu ɛcɛ obɔbi nyā mla ɔtu ō lɛ. Ohigbu ɛnyā a, ācɛ nōo lɛ abɔ ipu ɛlā ɛcɛ nyā i lɛ ɛbɔ ŋ.

9. Ɔdi wɛ ɛyɛɛyɛyi ku aefuma nɛ Ujowɛlu má a mla ɛ̄nɛ̄ Ujɔni kɛla lɛyikwu ɔ a?

⁹ Ó lɛ aafu ŋ, ó lɛ aɔdā ōhī ipu akacɛ ku Ujowɛlu mla aku Ɔdā Nēé Mafú Lɛ Ujɔ́ni nōo gbla iyi uwa a. Naana a, ó lɛ ɔdā ɛyɛɛyi ipu uwa nōo cɛgbá nɛhi. Leyi yɛ ɔ ɛ: Ipu akacɛ ku Ujowɛlu, aefuma a kwu epu, ací mla ɔcí a i kpo yiifi ŋma ajɛ. (Ujów. 1:4, 6, 7) Amáŋ ipu ɛbɛ nɛ Ujɔni má a, é da aefuma a “kéē hiii yā ácí ámāŋ ēpū ɛ̄mɛ̄ɛ̄mɛ̄ ámāŋ ka ɔcí dúúmā ɔdā dúú ŋ́.” (Mafú 9:4) Ɛ̄nɛ̄ Ujowɛlu má a wa ŋma ɛhico. (Ujów. 2:20) Ɛ̄nɛ̄ Ujɔni kē má a wa ŋma ɔgɔ nōó lɛ oŋmɛyi ŋ ma. (Mafú 9:2, 3 NW ) É lɛ aefuma nɛ Ujowɛlu kɛla lɛyikwu uwa a nu gā ɛga oligbo. Amáŋ é nu aɛ̄nɛ̄ ō yɔ ipu ɔkpá ku Ɔdā Nēé Mafú Lɛ Ujɔ́ni a ŋ, é jɛga lɛ uwa kéē lɛ uklɔ ku uwa ya mɛ. Ó kē lɛ ɔdā duuma ipu Ubáyíbu nōo mafu ka Ujehofa i gweeye mla uwa ŋ.—Má ikpati nōo kahinii: “ Aakacɛ Lɛyikwu Aefuma A Gbla Iyi Uwa Amáŋ É Wɛ Ɛyɛɛyi.”

10. Ocabɔ ɔhá nyá ipu Ubáyíbu mafu ka aefuma nɛ Ujowɛlu mla Ujɔni kɛla lɛyikwu ɔ a lɔfu kwɛyi ɔdā ɛyɛɛyɛyi a?

 ¹⁰ Ɛyɛɛyɛyi nōo yɔ ipu akacɛ ɛpa nyā, ta alɔ abɔ ku alɔ wa i jé peee ka é tɛɛma kwu iyi uwa ŋ. Gbeyi ɛ o, ɔɔma le ka alɔ yɔ i ka ku efuma nɛ Ujowɛlu kɛla lɛyikwu ɔ a wɛ ɛyɛɛyi gwu efuma nōo yɔ ipu Ɔdā Nēé Mafú Lɛ Ujɔ́ni a ta a? Ii. Ekoohi ipu Ubáyíbu, odee ekponu lɔfu lɛ ɛyi ɛyɛɛyɛyi, ɔdaŋ ka é bi ɔ le yuklɔ ɔwɛ ɛyɛɛyɛyi. Ocabɔ mafu, ipu Ɔdā Nēé Mafú Lɛ Ujɔ́ni 5:5, é hi Ujisɔsi ka “Ágábá nōo ŋmá ipɔ́ɔma kú Ujúda,” amáŋ ipu ɔkpá ku 1 Upíta 5:8 a, abɔɔ kɛla lɛyikwu Ebilii ka ó yɔ i “tōoji bɛ̄ɛka ágábá” a. Aɔdā ɛnɛ nyā nɛ alɔ kɛla lɛyikwu uwa ɛ ma, mafu ka ó cɛgbá ku alɔ je akacɛ ku Ujowɛlu nyā teyi peee ɔwɛ ɔhá. Ɔwɛ nyā mɛ?

11. Ɛgɛnyá nɛ Ujówɛ̄lu 1:6 mla 2:1, 8, 11 ta alɔ abɔ ku alɔ jé ɔdā nɛ aefuma a kwɛyi nu a?

¹¹ Ɔdaŋ ku alɔ leyi yɛ aɔgba ɔhá nōo yɔ ipu akacɛ ku Ujowɛlu ɔɔma, alɔ géē má ka ɔcomɛɛbɛ a yɔ i kɛla lɛyikwu ɛfú nɛ aicɔɔja géē wa i kpo a. (Ujów. 1:6; 2:1, 8, 11) Ujehofa ka ka anuɔ géē bi “aícɔ́ɔja nɛ̄hi” (aicɔɔja ku Ubabilɔn) ku nu le ya ācɛ Isrɛlu nōo gē ya ikpɛyi olɔfu tu ɔ a itala. (Ujów. 2:25) Ó kpaakpa ɛgɛ néē hi aicɔɔja nōo géē wa i kpo ɛfú a ka “ācɛ nēe ŋmá ɛhícō ā,” ohigbu ka aicɔɔja ku Ubabilɔn a géē wa ŋma ɛhico wa i kpo ɛfú ta ācɛ Isrɛlu. (Ujów. 2:20) É lɛ aicɔɔja nyā gbla aefuma nōo gē ya ɛjɛɛji odee tɔha. Ujowɛlu kɛla lɛyikwu uwa kahinii: “Ɔnyɔɔnyɛ [icɔɔja] jé ɔwɛ kú nū. . . . É kwu lɛyíkwu ipú igelī nɛ̄hi ā. É bá í tómbli gla ɛyí igá ā, é tīicō ga ipú aínu ā, klla ī yɛ bū uwíndo bɛ̄ɛka aúwī ā.” (Ujów. 2:8, 9) A lɔfu gbɛla tu ɛgɛ nōó yɔ i ya ipu ɔtu ku uwɔ gla a? Aicɔɔja ba ɛbɛɛbɛ. Ɛga duuma i yɔ nɛ ɔcɛ gē kwu tayinu ŋ. Ɔcɛ duuma i kwu ŋma ɛgiyi aicɔɔja ku Ubabilɔn a gla ŋ!

12. Ɛgɛnyá nɛ akacɛ ku Ujowɛlu lɛyikwu aefuma a bi le ya jila a?

¹² Bɛɛka aefuma a, aicɔɔja ku Ubabilɔn lɛ igeli ku Ujerusalɛm cataajɛ ipu ihayi ku 607 gbɔbu lɛ eko ku Ukraist a. Ubáyíbu kahinii: “Ɔcɛ́ kú Ubábīlɔn . . . le odúúdú ayípɔ̄klóbīya kú Ujúda ā kpó ŋmó, . . . É ményīnyi ɔ̄cɛ dúúmā kú ācɛ Ujúda ŋ́, kwú anyākwɔ́cɛ, kwú ayípɛ̄, kwu ācɛnyīlɔ mɛ́mla ācɛnyā, kwu ācɛ o doōcē mɛ́mla ācɛ nēé doōcē ŋ́. Óndú ā kwú odúúdú uwā ú kpó lɛ ācɛ kú Ubábīlɔn, anɔ́ɔ é lɛ uwá kpó ŋmó, klla le aóhíle kú uwā kpó ɔfiyɛ. Ó kwú Agblīihɔ-nɛ̄hi kú Óndú ā, mɛ́mla igelī nɛ̄hi kú Ujerúsalɛm ú tɔ̄lá kwú ɔ̄ ú wúla tāajɛ. Ó kwú agblɔ̄cɛ́ kú Ujúda ā ú yɔlá tāajɛ klla kwú aíyó ocɛgbá kú igelī nɛ̄hi kú Ujerúsālɛm ú wúla tāajɛ.” (2 Úklɔ́ 36:17, 19) Abɔ ācɛ Ubabilɔn kwu igeli a u cataajɛ a, ɔdā nɛ ācɛ lɔfu ka foofunu a wɛ kahinii: ‘Ācɛ Ubábīlon kwú ajɛ nyā yíífi, nōo gáā tá alácɛ bɛ̄ɛka ipú ígbíli nɛ̄ ɔ̄cɛ ámāŋ ɛbɛ́ í lā ŋ́ mā.’—Ujɛr. 32:43.

13. Ɔdi wɛ ɛyi ku Ujɛrɛmíya 16:16, 18 a?

¹³ Ihayi ofu igwo (200) igbihi ku akacɛ ku Ujowɛlu a, Ujehofa bi Ujɛrɛmiya lɛ odee ka taajɛ lɛyikwu ɛfú ō kpo nyā kpɔ. Ujehofa ka aicɔɔja géē tine ācɛ Isrɛlu nōo gē ya uce obɔbi a, cɛɛ é lɛ ɛjɛɛji uwa kpo kwu. Ujehofa kahinii: “N géē tū ācɛ okwuébényi alɛwa ɛhɔ̄ wā ka e lɛ ācɛ a kpó. N klá i tū aófitɛ́ alɛwa ɛhɔ̄ wā kéē tá ɔtɛ́ ācɛ nēe ba ɛyí ɛfu mɛ́mla ipú ɔ̄gɔ̄ ɛcɔ̄ dóódu a. . . . N géē yá kéē cílá ulé kú íne nēé bīya mɛ́mla óbíipú nēé bī ā ɔ́klá ɛpa.” Ācɛ Isrɛlu nōó cɛ ō piyabɔ ŋ ma, i gáā tayinu ŋma ɛgiyi ācɛ Ubabilɔn gla ŋ.—Ujɛr. 16:16, 18.

14. Eko nyá nɛ ɛlā nōo yɔ ipu ɔkpá ku Ujówɛ̄lu 2:28, 29 a ya jila a?

¹⁴ Ujowɛlu klla lɛ ɔkoolɔhi ō ka, ó ka ajɛ a géē ya ɔdɛhɔ lɔɔlɔhi kpɔ ɛ. (Ujów. 2:23-26) Cɛɛ eko éyi ɛcɔbu, ɛlā ɔkwɛyi a géē yɔ lɛ ācɛ alɛwa. Ujehofa kahinii: “N géē cē Alelékwū kú um klá ācɛ dóódu. Anɔ́ɔ ayínɔ̄nyīlɔ mɛ́mla ayínɔ̄nyā kú aá géē kɛlā kú um tɛ́ɛcɛ, . . . Eko ɔ́ɔmā n géē cē owu kú Alelékwū kú um klá ācocɛ̄hɔ̄ nɔ̄nyīlɔ mɛ́mla ācocɛ̄hɔ̄ nɔnyā kú um.” (Ujów. 2:28, 29) Ujehofa i ya ɛnyā lɛ ācɛ Isrɛlu boobu néē cigbihi wa ɔlɛ ŋma ajɛ ku Ubabilɔn a ŋ. Amáŋ ɛ̄cī ku Upɛntikɔsi 33 eko ku Ukraist, nōo wɛ igbihi ku ihayi alɛwa a nōó ya ɔ a. Ɛgɛnyá nɛ alɔ bi le jé a?

15. Oŋma ɛlā nōo yɔ ipu Úklɔ́ kú Ācotɛ̄hɔ̄ 2:16, 17 a, opiyabɔ nyá nɛ Upita ya lɛyikwu ɛlā nōo yɔ ipu ɔkpá ku Ujówɛ̄lu 2:28 a, ɔdi nɛ ɔɔma kē mafu a?

¹⁵ Eko nɛ ɔcocɛhɔ Upita le mu mla alelekwu ihɔ a, ó ka ku ɛlā nōo yɔ ipu ɔkpá ku Ujówɛ̄lu 2: 28, 29 a ya jila, eko nɛ ɔdā ɛnɛɛnɛ éyi ya ɛ̄cī ku Upɛntikɔsi a. Ɛpla oje ahaanɛ ku ɔcɔɔci a, Ɔwɔico le Alelekwu Ihɔ ku nu ce kla ācɛ, anɔɔ ācɛ a gbɔɔ ō kɛla lɛyikwu “úklɔ́ idáagó nɛ̄ Ɔwɔicō yá ā” á. (Ācot. 2:11) Eko nɛ Upita le mu mla Alelekwu Ihɔ, nōó yɔ i kɛla lɛyikwu akacɛ nōo yɔ ipu ɔkpá ku Ujowɛlu a, ó bi ɛlā nōo wɛ ɛyɛɛyi ligii le yuklɔ. A má ɛlā ɛyɛɛyi nɛ ó bi le yuklɔ a? (Jé Úklɔ́ kú Ācotɛ̄hɔ̄ 2:16, 17.) Upita i bi ɛlā nōo kahinii, “igbīhāajɛ ā” le yuklɔ ɛgɛ nōó yɔ ipu akacɛ ku Ujowɛlu a ŋ. Amáŋ ó kahinii: “Ipú ɛ̄cī ámōōmɛ ā.” Ɔɔma ke lɛ ō ya mla eko gbɔbu ɛɛ kéē je Ujerusalɛm mla Agblihɔ a cataajɛ a. Ɛpleeko ɔɔma a, Ɔwɔico géē ce Alelekwu ku nu “klá ācɛ dóódu a.” Ɛnyā mafu ka ihayi alɛwa le yɛ, gbɔbu ɛɛ nɛ akacɛ ku Ujowɛlu ya jila a.

16. Ɛgɛnyá nɛ Alelekwu Ihɔ ku Ɔwɔico lɛ abɔ kwu uklɔ ku ɔna ō ta a ɛpleeko ku eko aflɛyi a, eko ku alɔ icɛ bɛ?

 ¹⁶ Abɔ Ɔwɔico gáā lɛ Alelekwu Ihɔ ku nu ce kla Ācɛ O Yɛce Ukraist ɛpleeko ku eko aflɛyi a, é gbɔɔ ō yuklɔ ku ɔna ō ta nōo géē yɛ gā ipu oduudu ɛcɛ a. Eko nɛ Upɔlu ta ɔkpá fu Ācɛ Ukolosi ɛpla ihayi ku 61 eko ku Ukraist a, ó da uwa ka ɔkoolɔhi a le faajɛ “éwo dóódu kú ipú ɛcɛ ā” ɛ. (Ukól. 1:23) Ɛpleeko ku alɔ nyā a, mla otabɔ ku alelekwu ihɔ ku Ujehofa nōo lɔfu nɛhi a, uklɔ ku ɔna ō ta a le nyila nwune fiyɛ gā “odúúdú ācɛ kú ɛcɛ” ɛ!—Ācot. 13:47; má ikpati nōo kahinii: “ N Géē Ce Alelékwū Kú Um.”

17. Ɔdi wɛ ɛyi ku akacɛ ku Ujowɛlu lɛyikwu aefuma a babanya a?

¹⁷ Babanya a, alɔ lɛyi ku akacɛ ku Ujówɛ̄lu 2:7-9 a jé ɔwɛ okpaakpa ɛ. Ó teyi peee ka aɔgba a, i yɔ i kɛla lɛyikwu uklɔ ku ɔna ō ta ku alɔ nɛ alɔ yɔ i ya mla ɔtu caca a ŋ. Amáŋ ó yɔ i kɛla lɛyikwu ɔdā nɛ aicɔɔja ku Ubabilɔn nōo je Ujerusalɛm cataajɛ ipu ihayi ku 607 gbɔbu lɛ eko ku Ukraist a ya a.

18. Ɔdi i piyabɔ lɛyikwu ācɛ ku Ujehofa ŋ ma?

¹⁸ Ó wɛ ɔkwɛyi ku ɛgɛ nɛ alɔ jɛyi akacɛ ku Ujówɛ̄lu 2:7-9 a le piyabɔ ɛ, amáŋ ɔtu caca nɛ alɔ lɛ lɛ uklɔ ku ɔna ō ta a i piyabɔ ŋ. Ācɛ ɔlɛ Ujehofa yɔ i tɔɔna ku ɔkoolɔhi a gā ɛga doodu kpɔ, é kē yɔ i bi ɔwɛ duuma nōo tɔɔtɛ a le ya ɔ. (Umát. 24:14) Ó lɛ íne duuma nɛ igɔmɛnti géē le kwaajɛ nōo géē ci alɔ ŋma ō yuklɔ ku ɔna ō ta nɛ Ujisɔsi ka alɔ kóō ya a ŋ. Abɔ Ujehofa kē yɔ i hɔha ce uklɔ a, alɔ yɔ i bi ɔtu caca fiyɛ mla ɔtu ō lɛ le tɔɔna ku ɔkoolɔhi a! Alɔ géē yɔ i gbolo ce Ujehofa kóō yɔ i je ɛyi ku akacɛ ku Ubáyíbu ta alɔ eyī peee. Ohigbu ku alɔ kpɔtuce ka ó géē bi alɔ “ga ipú ɛlā ɔkwɛ̄yi dóódu” eko nɛ eko okpaakpa a le ya!—Ujɔ́n. 16:13.