Ɔdiya nɛ Ujisɔsi ka aɛlā ku Udefidi nōo yɔ ipu ɔkpá ku Aíjē 22:1 gbɔbu ɛɛ kóō kwū a?

Gbubu ɛɛ ku Ujisɔsi kóō kwū a, ó ka aɛlā nōo yɔ ipu ɔkpá ku Umátiyu 27:46 nōo kahinii: “Ɔwɔicō kú um, Ɔwɔicō kú um, ɔdíya nɛ̄ a habɔ̄ um tá ōfōofū um ā?” Abɔ Ujisɔsi kɛla nyā a, ó lɛ aɛlā ku Udefidi ɔcɛ nōo ta ɔkpá ku Aíjē 22:1 a ya jila. (Umák. 15:34) Ó gáā kpaakpa ō lɛ ɛlā ŋmɛyi ku Ujisɔsi kɛla nyā ohigbu ka Ujehofa lɛ ɔ abɔ gaajɛ, amāŋ ka ó kwu ɔtu okpoce ku nu i tonu eko kpii ŋ. Ó ta Ujisɔsi eyī peee ɔdā nōo ya ɛɛ nɛ ó cika ō kwū a, ó kē le tutu ō kwū. (Umát. 16:21; 20:28) Ó klla jé ku eko ikwū ku nu, Ujehofa géē lɛ abɔ ci ō gbo ɔ. (Ujób. 1:10) Ujehofa lɛ abɔ ci ō gbo Ujisɔsi, o ya ɛɛ ku Ujisɔsi kóō lɔfu mafu ō hayi kpaakpa ku nu lɛ Ujehofa, ɛgɛ duuma nɛ ikwū ku nu géē lɔnɔ lɛ a.—Umák. 14:35, 36.

Ó lɛ a, ɔdiya nɛ Ujisɔsi ka aɛlā nōo yɔ ipu ɔkpá ku Aíjē nyā a? Naana nɛ alɔ i jé ɔdā nōo ya pii ŋ ma, alɔ géē kɛla lɛyikwu aɔdā ōhī nōo lɔfu ya a. *

Abɔ Ujisɔsi ka aɛlā nyā, ó yɔ i ka ku Ujehofa i gáā ta ɔ abɔ eko ikwū ku nu ŋ nɛɛ? Ujisɔsi cika ō fula alɔ nōo gáā cɛgbá otabɔ ku Ujehofa ŋ. Ó wɛ ɔlɛɛcɛ klla cika ō kwū, o ya ɛɛ “kóō gekwú ohígbū ɛjɛ̄ɛ̄jī ācɛ.”—Uhíb. 2:9.

Abɔ Ujisɔsi ka aɛlā ligii ŋma ipu ɔkpá ku Aíjē ɔɔma, ó dɔka ku ācɛ ɔhá kéē gbɛla lɛyikwu ɛjɛɛji aɛlā nōo yɔ ipu ɔkpá ku Aíjē ɔɔma nɛɛ? Ó wɛ ɔdā nōo kpɔ eko ɔɔma ku ācɛ Ujiyu kéē jé  ɛga alɛwa ku ɔkpá ku Aíjē tɛyi. Ɔdaŋ kē lɛ uwa ɛlá ta kwu ɛga éyi ŋma ipu ɔkpá ku Aíjē, é géē gbɔɔ ō gbɛla lɛyikwu ɛjɛɛji ɔgba a abɔyi uwa. Ɔdaŋ ku ɛlā nyā wɛ ɔdā nɛ Ujisɔsi dɔka ō ya nɛ, ó géē yɛ i ta ācɛ Ujiyu nōo gē yɛce ɔ a abɔ kéē gbɛla lɛyikwu alɛwa ku aakacɛ nōo yɔ ipu ɔkpá ku Aíjē nyā, lɛyikwu ɔdā nōo géē ya nōo yɛ jila ikwū ku nu ta a. (Aíjē 22:7, 8, 15, 16, 18, 24) Aɔgba amoomɛ ku ɔkpá ku Aíjē a je owoofu lɛ Ujehofa, klla mafu ka ó wɛ Ɔcɛ́ ikpɛyi oduudu ɛcɛ.—Aíjē 22:27-31.

Abɔ Ujisɔsi kɛla ku Udefidi nyā a, ó yɔ i ka ku anuɔ i ya ɔdobɔbi duuma ŋ nɛɛ? Gbɔbu ɛɛ kē ŋmo a, Ujisɔsi cɛgbá ō lɔtu ku ɛpɔ obɔbi néē ka tu ɔ ka ó wɛ ɔcɛ nōo gē ka obɔbi ku Ɔwɔico a. (Umát. 26:65, 66) É jila tɔha ɔtahɛ ɔtu ɛɛ néē ka ɛpɔ uji nyā ta Ujisɔsi a, ɛnyā i kē wɛ ɔwɛ okpaakpa ō bi le ka ɛpɔ ŋ. (Umát. 26:59; Umák. 14:56-59) Eko nɛ Ujisɔsi da ɔka nōo kahinii: “Ɔwɔicō kú um, Ɔwɔicō kú um, ɔdíya nɛ̄ a habɔ̄ um tá ōfōofū um ā?” ó lɔfu yɔ i dɔka ku ācɛ a kéē jé ka ó ya ɔdobɔbi duuma, amāŋ lɛ ɔdā duuma ō lɛ abɔ bi ɔ ɔdā nōo ya ɛɛ néē dɔka ō ŋmo ɔ a ŋ.

Ujisɔsi klla yɔ i ta ācɛ ɔhá ɛlá kwu ɔ ku naana néē jɛga lɛ Udefidi nōo wɛ ɔcɛ nōo ta ɔkpá ku Aíjē nyā kóō má owe a, ɛnyā wɛ ku ɛlā ku nu i he Ujehofa ɔtu gɛ ŋ? Ɔka nɛ Udefidi da i wɛ ka ó kpɔtuce Ɔwɔico gɛ ŋ nóó. Igbihi nɛ ó lɛ ɔka nyā da a, ó ka ka anuɔ kpɔtuce ku Ɔwɔico lɔfu nya ācɛ ɔlɛ nu ta, Ujehofa kē gɔbu yɔ i he ɔ̄hā ce ɔ. (Aíjē 22:23, 24, 27) Ɔwɛ ekponu ɔɔma, naana nɛ Ujisɔsi “Ɔyinɔnyilɔ ku Udefidi” yɔ i má owe ɛyi ɔcí ka owɛ a, ɛnyā i wɛ ku ɛlā ku Ujisɔsi i he Ujehofa ɔtu gɛ ŋ.—Umát. 21:9.

Ujisɔsi yɔ i mafu ɛgɛ nɛ ɔtu biya lɛ ɔ nɛɛnɛhi ohigbu ku Ujehofa i je ogbotu lɛ ɔ ŋ, o ya ɛɛ kóō lɔfu mafu ō hayi kpaakpa ku nu gā ajaajɛ? Ó wɛ ococɛ ku Ujehofa ku Ɔyinɔnyilɔ ku nu kóō má owe klla kwū ŋ. Ɔɔma gáā cɛgbá igbihi nɛ Adam mla Iifu lɛ ikpɛyi olɔfu ya a. Ujisɔsi i ya ɔdobɔbi duuma ŋ, amáŋ ó cika ō má owe klla kwū o ya ɛɛ kóō lɛ ɔka ocɛgbá nɛhi éyi néē Ebilii bi waajɛ a cila, mla ō je ofula nōo cika kóō lá ɔdā nōo hɛ ɔlɛɛcɛ abɔ a cigbihi. (Umák. 8:31; 1 Upít. 2:21-24) Ɛnyā géē lɔfu ya jila ɔdaŋ ku eko aflɛyi ipu oyeeyi ku Ujisɔsi, Ujehofa i je ogbotu lɛ ɔ eko kpii ŋ.

Ujisɔsi yɔ i ceyitikwu kóō ta ācɛ nōo gē yɛce ɔ a abɔ, kéē gbɛla lɛyikwu ɔdā nōo ya ɛɛ nɛ Ujehofa jɛga lɛ ɔ kóō kwū ɛyi ɔcí ka owe a nɛɛ? * Ujisɔsi jé ku ɛdɔ ikwū nɛ ó gáā kwū bɛɛka uwi a géē hɛ ācɛ alɛwa gwonu. (1 Ukɔ́r. 1:23) Ɔdaŋ ku ācɛ nōo gē yɛce ɔ a lɛ ɔtu ku uwa kwu ɔkwɛyi ku ɔdā nōo ya ɛɛ nɛ ó kwū a, é géē wa gáā jé ɔkwɛyi ku ɛlā a peee. (Ugal. 3:13, 14) Cɛɛ é géē wa gáā jé ku Ohɔnyɛta ku uwa nɛ ó wɛ a, ó wɛ uwi ŋ.

Ɔdaŋ ku Ujisɔsi kóō lɛ ɔdā nōo ya ɛɛ nɛ ó ka aɛlā nyā, ó jé ka ikwu nɛ ó gáā kwū ɛyi ɔcí ka owe a wɛ ococɛ ku Ujehofa nɛ ó yɔ i ya jila a. Eko kpii igbihi nɛ Ujisɔsi lɛ ɛlā nōo yɔ ɔkpá ku Aíjē nyā ka, ó kahinii: “Ó mɛ ɛɛ́.” (Ujɔ́n. 19:30; Ulúk. 22:37) Ii, ohigbu ka Ujehofa lɛ abɔ ci ō ta Ujisɔsi abɔ eko kpii a, ɛnyā jɛga lɛ Ujisɔsi kóō lɛ ɛjɛɛji ɔdā nōo ya ɛɛ néē ta ɔ ɛhɔ wa ipu ɛcɛ nyā a ya jila. Ó klla jɛga lɛ ɔ kóō lɛ ɛjɛɛji aɛlā néē ta lɛyikwu ɔ “ipú ɔkpá íne kú Umósīsi mɛ́mla ipú ɔkpa kú ācomɛ́ɛbɛ mɛ́mla ipú ɔkpá kú Aíjē olɔhi ā” ya jila.—Ulúk. 24:44.