EKO nɛ Adam ɔcɛnyilɔ nōó lɛ ɛnya duuma ŋ ma lɛ íne biya a, ɛnɛɛnɛ ɛga ō lā oyeeyi opiyoo a hɛ ɔ abɔ. Ó wɛ iyi nu foofunu ŋ, amāŋ aku ayi nɛ ó géē lɛ a duu. Ó lɛ ɛpɔ duuma nɛ Adam gáā ka ku ɔdā nɛ ó ya ɔɔma ŋ. Ó kweyigeede lɛ íne biya. Amáŋ ayi nu i kē ya ɔdobɔbi duuma ŋ, é kē kwu Adam abɔfu kóō nyɔ i biya íne ŋ. (Uróm 5:12, 14) Adam cika ō kwū ku ɔdā nɛ ó ya a. Amáŋ ó lɛ ɔdā duuma nɛ Ujehofa ya gla, o ya ɛɛ ku ayi ku Adam kéē lɔfu lā oyeeyi opiyoo? Ii gbo! Eko kpii igbihi nɛ Adam lɛ íne biya a, Ujehofa gbɔɔ ō mafu ɛgɛ nɛ ó gē nya alɛwa ku ayi ku Adam ta ŋma íne ō biya mla ikwū a. (Ohút. 3:15) Eko nɛ eko nɛ ó bi ɔtu a le ya, Ujehofa géē ta Ɔyinɔnyilɔ ku nu ɛhɔ ŋma ɔkpanco “cɛ́ɛ́ ó gekwú, o yá ɛ́ɛ́ kóō lɛ ācɛ alɛwa nyatá.”—Umák. 10:45; Ujɔ́n. 6:51.

1-2. Ɔdi wɛ ō fula a, ɔdiya nɛ alɔ kē cɛgbá nu a?

² Ɔdi wɛ ō fula a? Ɛgɛ néē kɛla lɛyikwu ɔ ipu Ɛka Ɛyipɛ a, ō fula a wɛ oyeeyi ku Ujisɔsi nɛ ó le gwɛɛya o ya ɛɛ kóō lɛ ɔdā nɛ ó hɛ Adam abɔ a lá cigbihi a nɛ. (1 Ukɔ́r. 15:22) Ɔdiya ɛɛ nɛ ɛnyā kē cɛgbá a? Ohigbu ku ɛgɛ nɛ Ujehofa dɔka ku alɔ yɛce íne okpaakpa a, ó cɛgbá ku oyeeyi kóō kwɛyi oyeeyi. (Oyɛb. 21:23, 24) Adam kwu oyeeyi ku nu nōó lɛ ɛnya duuma ŋ ma i tonu. O ya ɛɛ ku odee kóō nyɔ ɔwɛ okpaakpa ɛgɛ nɛ Ɔwɔico dɔka a, Ujisɔsi kwu oyeeyi ku ɔlɛɛcɛ ku nu nōó lɛ ɛnya duuma ŋ ma i gwɛɛya. (Uróm 5:17) Ó bu ɔwɛ nyā, ó kwu piya “Adā nōo gē yɔ̄ piyóó” lɛ ɛjɛɛji ācɛ nōo kpɔtuce ikwū nɛ ó kwū a.—Ayis. 9:6; Uróm 3:23, 24.

3. Oŋma ɛlā nōo yɔ ipu ɔkpá ku Ujɔ́ni 14:31 mla 15:13 a, ɔdiya ɛɛ nɛ Ujisɔsi le tutu ō je oyeeyi ku ɔlɛɛcɛ ku nu nōó lɛ ɛnya duuma ŋ ma gwɛɛya a?

³ Ujisɔsi le tutu ō je oyeeyi ku nu gwɛɛya, ohigbu ihɔtu nɛhi nɛ ó lɛ lɛ Adā nu nōo yɔ ɔkpanco mla alɔ a. (Jé Ujɔ́ni 14:31;  15:13.) Ohigbu ku Ujisɔsi yihɔtu ku Ujehofa mla alɔ nɛɛnɛhi a, ó lɛ ɔtu ku nu ya ekponu ō hayi kpaakpa jaa gā oŋmɛyi ka oyeeyi ku nu. Ohigbu ɔdā nɛ ó ya a, ɔdā nōo wɛ ococɛ ku Ujehofa lɛ alɛɛcɛ mla ɛcɛ nyā a géē ya jila. Ipu ikpɛyi ɛlā nyā, alɔ géē kɛla lɛyikwu ɔdā nōo ya ɛɛ nɛ Ɔwɔico jɛga ku Ujisɔsi kóō má owe nɛɛnɛhi gbɔbu ɛ kóō kwū a. Alɔ klla géē bi eko ligii leyi yɛ ocabɔ ku ɔcɛ éyi nōo ta Ubáyíbu nɛ ikwū amāŋ ofula a jɛ ɔ eyī nɛhi a. Amoomɛ, alɔ géē kɛla lɛyikwu ɛgɛ nɛ alɔ lɔfu mafu tōōtɔ̄ɔ̄ ka ofula a, mla ɛya nɛ Ujehofa mla Ujisɔsi ya tɔɔtɛ lɛ alɔ a jɛ alɔ eyī nɛhi a.

4. Ɛgɛnyá nɛ Ujisɔsi kwū a.

⁴ Gbɛla lɛyikwu ɔdā nōo ya ɛpleeko ku ɛ̄cī amoomɛ gbɔbu ɛɛ kē ŋmo Ujisɔsi a. Ujisɔsi lɔfu hi aalelekwu otɛhɔ igwu kē wa i ta ɔ abɔ gla, amáŋ ó ya lɛ a ŋ. Ikɔkɔ ɔɔma, ó jɛga lɛ aicɔɔja a kéē lɛ ɔ kwu kē klla gɔ bɔbi bɔbi. (Umát. 26:52-54; Ujɔ́n. 18:3; 19:1) É gɔ mla itali nōo ya ɔ agbe nɛɛnɛhi. Igbihaajɛ, é klla ya kóō je ogblo ku ɔcí nōo gbɛnu nɛhi a ce igbihi ku nu nōo yɔ i pɛ oyi a. Ujisɔsi ceyitikwu nɛɛnɛhi kóō je ɔcí a gā ɛga néē géē ŋmo ɔ a. Amáŋ eko kpii, aicɔɔja a lɛ ɔ́da je lɛ ɔcɛnyilɔ ɔhá kóō ta ɔ abɔ je ɔ. (Umát. 27:32) Eko nɛ Ujisɔsi faajɛ ɛga nɛ ó gáā kwū a, aicɔɔja a le ikpusa hɛ wu ɔ abɔ mla ikpo playi ɛyi ɔcí a. Ɛgɛ nɛ Ujisɔsi colo nɛhi lɛ a cɛ ku ikpusa a kóō hila anu abɔ. Aɔya ku nu yekwu, ɛ́nɛ́ nu jikwu, amáŋ aotrɛyi ku ācɛ Ujiyu a ŋmo ɔ okonu. (Ulúk. 23:32-38; Ujɔ́n. 19:25) Ujisɔsi má owe ɛyi ɔcí ka owe ɔɔma awa alɛwa. Ohigbu ɛgɛ nɛ ɔkpiye ku nu playi lɛ a, odo ku nu mla ufɔ cɛgbá ō yuklɔ lɔfu lɔfu, ɛnyā kē ya kóō lɔnɔ tu ɔ ō fu owu lɔɔlɔhi. Ujisɔsi jé ku anuɔ humayi hayi kpaakpa ɛ, amáŋ gbɔbu ɛɛ kóō kwū a, ó lɛ ɔkɔ gba lɛ Ujehofa igbo amoomɛ a. Ó gáā kwu ɛyi piya kla ajɛ, anu ó ma owu a. (Umák. 15:37; Ulúk. 23:46; Ujɔ́n. 10:17, 18; 19:30) Ku ɛlā ɔkwɛyi a ba, Ujisɔsi kwū ɛmɛɛma, je ɔnɔ nɛɛnɛhi, klla kwū ɔwɛ nōo ta uweyi nɛhi!

5. Ɔdi kwu Ujisɔsi iyē nɛɛnɛhi fiyɛ ɔwɛ néē ŋmo a?

⁵ Ó wɛ ɔwɛ néē ŋmo Ujisɔsi a wɛ ɔdā nōo kwu ɔ iyē fiyɛ duu a ŋ. Ɔdā nōo kwu ɔ iyē fiyɛ duu a, wɛ ɔdā nɛ ācɛ yɔ i ka kóō wɛ ɔdā nōo ya ɛɛ néē ŋmo a nɛ. É ce ije ba ɔ kóō wɛ ɔcɛ nōo gē ka obɔbi ku Ɔwɔico, ɔcɛ nōó lɛ ojilima ce Ɔwɔico amāŋ iyē ku nu ŋ. (Umát. 26:64-66) Ije nɛ ācɛ a ce ba Ujisɔsi nyā kwu ɔ iyē nɛɛnɛhi, ó kē lɔtuce ku Adā nu i gáā cɛ kéē je uweyi lɛ ɔ ɔwɛ ɛgɛnyā ŋ. (Umát. 26:38, 39, 42) Ɔdiya nɛ Ujehofa cɛ ku Ɔyinɔnyilɔ ku nu nɛ ó yihɔtu nu nɛɛnɛhi a kóō má owe klla kwū a? Alɔ leyi yɛ aɔdā ɛta nōo ya a.

6. Ɔdiya ɛɛ néē cika ō lɛ Ujisɔsi playi ɛyi ɔcí ka owe a?

⁶ Aflɛyi, é lɛ Ujisɔsi playi ɛyi ɔcí o ya ɛɛ kóō lɛ ācɛ Ujiyu a hɛta ŋma okonu ō ta éyi. (Ugal. 3:10, 13) É lɛ okonu ō ta nyā ohigbu ku uwa cokonu ka é géē lɛyitaajɛ lɛ íne ku Ɔwɔico, amáŋ é kē ya lɛ a ŋ. Ohigbu ɛnyā, é cika ō kwū ohigbu kē wɛ ayi ku Adam, amáŋ okonu ō ta nyā kē ce uwa ɛyi kpɔ. (Uróm 5:12) Íne nɛ Ɔwɔico je lɛ ācɛ Isrɛlu a ka ku ɔcɛnyilɔ nōo lɛ íne biya nōo cika kéē lɛ ɔ ŋmo, kéē lɛ ɔ ŋmo. Oŋma ɔɔma, é géē je okwū ku nu playi ɛyi ɔcí. * (Obla. 21:22, 23; 27:26) Ohigbu kē lɛ Ujisɔsi playi ɛyi ɔcí a, ācɛ Ujiyu a lɔfu lɛ ohɛta ŋma okonu ō ta nyā, ɛya nɛ ó kē gwo a kē lɔfu ta uwa abɔ, naana néē ta Ujisɔsi a.

7. Ɔdi wɛ ɔdā ɔmpa nōo ya ɛɛ nɛ Ɔwɔico jɛga ku Ɔyinɔnyilɔ ku nu kóō má owe a?

⁷ Má ɔdā ɔmpa nōo ya ɛɛ nɛ Ujehofa jɛga  ku Ɔyinɔnyilɔ ku nu kóō má owe a. Ó yɔ i lɛ Ujisɔsi tutu ku eko nɛ ó géē je piya Otrɛyi ku Acogwɛɛya ku alɔ a. Ujisɔsi má ɛgɛ nōó lɔnɔ ku ɔcɛ kóō lɛyitaajɛ lɛ Ɔwɔico eko nōó yɔ ipu unwalu nɛhi a. Unwalu a le yɛ jila ɔ ta nɛ ó gbɔɔkɔ ku otabɔ ŋma lɛ ō “lɛ ɔkɔ cɛyí gbōō le ikwū je nɛ̄hi mla agīje” a. Ohigbu ku Ujisɔsi ma unwalu nɛɛnɛhi a, ó jé ɔdā nōo wɛ ɛgbá ku alɔ a, ó kē “lɔfú tá ācɛ nēe ī yá uwa ojámá ā abɔ̄ glá.” Ó wɛ ɔdā nōo jɛ alɔ eyī nɛhi ku Ujehofa fu Otrɛyi ku Acogwɛɛya nōo lɛ eyinyinyi “nɛ̄ ahi nɛ̄ alɔ kwú ā kwú ɔ̄ iyē nɛhi” a!—Uhíb. 2:17, 18; 4:14-16; 5:7-10.

8. Ɔdi wɛ ɔdā ɔmɛta nōo ya ɛɛ nɛ Ujehofa jɛga kéē je Ujisɔsi ma bɔbi bɔbi a?

⁸ Ɔmɛta, Ujehofa jɛga ku Ɔyinɔnyilɔ ku nu kóō má owe o ya ɛɛ ku ɔka ocɛgbá nɛhi éyi kóō le cila: Ɔlɛɛcɛ duuma géē hayi kpaakpa lɛ Ujehofa naana néē yɔ i ya ojama bɔbi bɔbi? Ebilii ka ehee! Ó ka ku alɛɛcɛ gē gba Ɔwɔico ɛ̄gbā ohigbu kē dɔka kóō ya odee lɛ uwa foofunu. Ó kē kpɔtuce ku uwa i yihɔtu ku Ujehofa, ɛgɛ nɛ Adam i yihɔtu ku nu ŋ ma. (Ujób. 1:9-11; 2:4, 5) Ohigbu ku Ujehofa jé kpɔcii ku Ujisɔsi géē hayi kpaakpa lɛ ɔ a, ó jɛga kéē je Ɔyinɔnyilɔ ku nu ma bɔbi bɔbi. Ujisɔsi hayi kpaakpa lɛ Ujehofa klla mafu ku Ebilii wɛ ɔcɛ ō kɛmgbɛ.

9. Ocabɔ nyá nɛ Ujɔni le taajɛ lɛ alɔ a?

⁹ Ɛlā ō nwu lɛyikwu ɛgɛ nɛ Ujisɔsi fula alɔ a, ya ku ɔtu okpoce ku Ācɛ O Yɛce Ukraist alɛwa kóō lɔfu tōōtɔ̄ɔ̄ ɛ. É gɔbu yɔ i tɔɔna naana néē yɔ i ya uwa ŋmo, é kē lɔtu ku ojama ɛyɛɛyɛyi ipu ɛjɛɛji oyeeyi ku uwa. Leyi yɛ ocabɔ mafu ku Ujɔni nōo wɛ ɔcocɛhɔ a. Ó hayi kpaakpa tɔɔna ku ɔkwɛyi lɛyikwu Ukraist mla ofula a, a jé ŋ fiyɛ ihayi ofu ɛta. Ujɔni nyā kē le ba ō faajɛ ihayi ofu ɛhɔ ɛ, amáŋ igɔmɛnti ku ācɛ Urom a kē gbɛla ka ó gē wɛ ikpokwu kwu uwa ɔkɔ, ɛnyā kē cɛ lɛ uwa kwu u ta agba ipu idɔ ku Upatimɔsi. Ɔdi nɛ ó ya bɔbi a? Ohigbu ka ó yɔ i “cɛ̄hɔ̄ kú Ɔwɔicō tɛ́ɛcɛ, klla kē ka ɔkwɛ̄yi nɛ̄ Ujísɔ̄si mafú ā tɛ́ɛcɛ.” (Mafú 1:9) Ujɔni lɛ ɛnɛɛnɛ ocabɔ ku ɔtu okpoce mla ɔtu ō lé taajɛ!

10. Ɛgɛnyá nɛ aɛlā nɛ Ujɔni ta a mafu ka ofula a wɛ ɔdā nōo jɛ ɔ eyī nɛhi a?

¹⁰ Ipu ɛga ku Ubáyíbu nɛ Ujɔni ta a, ó ta ɛgɛ nɛ ó yihɔtu ku Ujisɔsi nɛɛnɛhi lɛ a, mla ɛgɛ nɛ ɛya nɛ ó gwo a jɛ ɔ eyī nɛhi lɛ a. Ó kɛla fiyɛ igbo ofu ɛhɔ lɛyikwu ofula amāŋ lɛyikwu ɔdā olɔhi nɛ ofula a ya tɔɔtɛ a. Ocabɔ mafu, Ujɔni ta ɔkpá kahinii: “Ɔ́dāŋ́ ka ɔ̄cɛ dúúmā lɛ íne bīya, alɔ lɛ ɔ̄cokɛ́pɔ̄ lɛ alɔ iyɔ̄bū adā ā, Ujísɔ̄si Ohɔ́nyɛtá, olɛ́pɔ̄hi.” (1 Ujɔ́n. 2:1, 2) Ujɔni klla ka ɔdā nōo ya ɛɛ nōó cɛgbá ku alɔ lɛ “abɔ̄ bī ɔkwɛ̄yi nɛ̄ Ujísɔ̄si mafú ā.” (Mafú 19:10) Ó teyi peee, ka ofula a wɛ ɔdā nōo jɛ Ujɔni eyī nɛhi. Ɛgɛnyá nɛ alɔ gáā mafu ka ó jɛ alɔ eyī duu a?

11. Ɔdi lɔfu ta alɔ abɔ ku alɔ ta ojama a?

¹¹ Ta ojama ō gáā biya íne. Ɔdaŋ ka ofula a jɛ alɔ eyī ɔkwɔɔkwɛyi, alɔ i gáā gbɛla nyā ŋ: ‘Ó cɛgbá ku um yɔ i ceyitikwu o ya ɛɛ ku um ya oyabiya ŋ. N lɔfu ya ɔdobɔbi, cɛɛ n géē gbɔɔkɔ ku ō je yɛhi.’ Ikɔkɔ ɔɔma, ɔdaŋ ka alɔ gbɔɔ ō má ojama ō gáā ya ɔdobɔbi, alɔ géē kahinii: ‘Ehee! Igbihi nɛ Ujehofa mla Ujisɔsi lɛ ɛjɛɛji aɔdā nōo ba nyā ya gā um a fa, n gáā ya ɔdā ɛgɛnyā gla ŋ.’ O ya ɛɛ ku alɔ ya ɔdā nōo géē cɛtɔha mla ɛlā nyā, alɔ lɔfu ba Ujehofa ɛba ku ɔfu iyē, ō ba ɔ kahinii: ‘A híīī cɛ lɛ alɔ gā ipú ojámá ŋ́.’—Umát. 6:13.

12. Ɛgɛnyá nɛ alɔ gáā yuklɔ mla ukɔ́ nōo yɔ ipu ɔkpá ku 1 Ujɔ́ni 3:16-18 a?

 ¹² Yihɔtu ayinɛ uwɔ. Eko duuma nɛ alɔ mafu ɛdɔ ihɔtu ɛgɛnyā, alɔ klla gē mafu ka ofula a jɛ alɔ eyī. Ɔdiya? Ohigbu ku Ujisɔsi kwu oyeeyi ku nu i gwɛɛya, ó wɛ ohigbu uwɔ foofunu nóó, amáŋ ohigbu ayinɛ alɔ nɔnyilɔ mla ayinɛ alɔ nɔnya duu. Ujisɔsi le tutu ō kwū lɛ uwa. Ɛnyā mafu peee ka ó yihɔtu uwa nɛɛnɛhi. (Jé 1 Ujɔ́ni 3:16-18.) Alɔ gē mafu ku alɔ yihɔtu ku ayinɛ alɔ ŋma ɔwɛ nɛ alɔ gē ya uce mla uwa lɛ a. (Āfi. 4:29, 31–5:2) Ocabɔ mafu, alɔ géē ta uwa abɔ eko duuma néē yɔ i doōcē amāŋ eko néē yɔ i lɔtu ku unwalu nɛɛnɛhi. Alɔ klla géē ta abɔ ɔdaŋ ka amiya ya da uwa. Amáŋ ɔdi nɛ alɔ cika ō ya, ɔdaŋ ku ɔyinɛ alɔ nɔnyilɔ amaŋ ɔyinɛ alɔ nɔnya ya odee amāŋ ka odee nōo kwu alɔ iyē nɛɛnɛhi a?

13. Ɔdiya nɛ alɔ cika ō yɔ i je yɛhi a?

¹³ Ó gē lɔnɔ ta uwɔ ō je ya ɔyinɛ uwɔ nɔnyilɔ amāŋ ɔyinɛ uwɔ nɔnya ɛhi ekoohi? (Ulīf. 19:18) Ɔdaŋ ka ó lɛ a, yɛce ahɔ ō pi nyā: “Aá hííī gwū ɔ́mpa aá ɔcí ŋ́, ɔ́dāŋ ka ɔ̄cɛ dúúmā kē lɛ ɛlā lɛ mla ɔ́mpa nū kóō kwú yá ɔ̄ ɛhi. Ɛ́gɛ́nɛ̄ Óndú ā je yá aá ɛhi ā, aá je yá ɔ́mpa aá ɛhi ɛ́gɔ́ɔmā dúú.” (Ukól. 3:13) Eko doodu nɛ alɔ gē je ya ɔyinɛ alɔ nɔnyilɔ amāŋ ɔyinɛ alɔ nɔnya ɛhi, alɔ gē mafu lɛ Adā alɔ nōo yɔ ɔkpanco a ka ofula a jɛ alɔ eyī nɛhi. Ɛgɛnyá nɛ alɔ géē yɔ i mafu tōōtɔ̄ɔ̄ ku ɛhi nōo ŋma ɛgiyi Ɔwɔico nyā jɛ alɔ eyī nɛhi a?

14. Ɔdi wɛ ɔwɛ éyi nɛ alɔ lɔfu ya ka ofula a kóō jɛ alɔ eyī tōōtɔ̄ɔ̄ a?

¹⁴ Ta Ujehofa ahinya ka ofula a. Ɔyinɛ alɔ nɔnya Joanna nōo wɛ ihayi ofu ɛnɛ ce ɛta (83) nōo lā ipu éwo ku India a kahinii: “N gbɛla ka ó wɛ ɔdā ocɛgbá nɛhi ō kɛla lɛyikwu ofula a ɛ̄cī doodu ipu ɔkɔ o gba ku um, mla ō ta Ujehofa ahinya ku nu.” Ɔdaŋ ku a gē gbɔɔkɔ abɔyi uwɔ ɛ̄cī doodu, da Ujehofa ɔdā nɛ a ya bɔbi a cɛɛ ku a ba ɔ ɛba ka ó kwu je ya uwɔ ɛhi. A kē jé ka ɔdaŋ ka ó wɛ ɔdobɔbi nɛhi éyi nɛ a ya a, a klla géē cɛgbá otabɔ ku anyakwɔcɛ ku ujɔ. É géē jahɔ ta uwa klla géē ta uwɔ ɛnɛɛnɛ ukɔ́ ŋma ipu Ɛlā ku Ɔwɔico. É géē gbɔɔkɔ mɛmla uwɔ, klla géē ba Ujehofa ɛba kóō kwu je ya uwɔ ɛhi, o ya ɛɛ ku a lɔfu lɛ ɛnɛɛnɛ ɛma mla Ujehofa kpɔ.—Ujɛ́m. 5:14-16.

15. Ɔdiya nɛ alɔ cika ō lɛ eko taajɛ cɛɛ ku alɔ jé odee lɛyikwu ofula a, mla ō gbɛla lɛyikwu ɔ a?

¹⁵ Gbɛla lɛyikwu ofula a. Ɔyinɛ alɔ nɔnya Rajamani nōo wɛ ihayi ofu ɛta ce igwo ɛta  (73) a kahinii: “Eko duuma nɛ um lɛ odee jé lɛyikwu owe nɛ Ujisɔsi má a, agije gē wɛ omoomu eyī ku um.” Ó lɔfu gē lɛ abɔ kwu awɔ abɔyi uwɔ ɔtu duu, eko duuma nɛ a gbɛla lɛyikwu ɛdɔ owe nɛhi nɛ Ɔyinɔnyilɔ ku Ɔwɔico má a. Amáŋ ɛgɛ nɛ a gē gbɛla lɛyikwu ɛya nɛ Ujisɔsi gwo a, ɛgɔɔma nɛ ihɔtu nɛ a lɛ lɛ ɔ mla Adā nu a gáā lɔfu iyē tōōtɔ̄ɔ̄ a. O ya ɛɛ ku a lɔfu lɛ otabɔ lɛyikwu ɔwɛ nɛ a lɔfu gbɛla lɛyikwu ofula a, ó géē lɔhi nɛhi ɔdaŋ ku a bi ikpɛyi ɛlā ku oklɔcɛ nyā le ya ɛnɛɛnɛ ōmiya ku oklɔcɛ ku uwɔ.

16. Ɛgɛnyá nōo nwu ācɛ ɔhá lɛyikwu ofula a lɔfu ta alɔ abɔ a? (Má ifoto nōo yɔ iyɔbu ku Ɔda Ō Gbaajɛ nyā a.)

¹⁶ Nwu ācɛ ɔhá ɛlā lɛyikwu ofula a. Eko duuma nɛ alɔ da ācɛ ɔhá lɛyikwu ofula a, ó géē yɔ i jɛ alɔ eyī tōōtɔ̄ɔ̄. Alɔ lɛ aɛnɛɛnɛ ɔkpá mla auvidio ōhī nōo gē ta alɔ abɔ ō lɛ ɔ ta ācɛ ɔhá eyī peee, ɔdā nōo ya nɛ Ujisɔsi cika ō kwū lɛ alɔ a. Ocabɔ mafu, alɔ lɔfu yuklɔ mla ɛlā ō nwu ɔmɛ 4 ku ubrucure néē hi ku Ɔkoolɔhi Nōo Ŋma Ɛgiyi Ɔwɔico! a. Ɛla ō nwu ɔɔma kahinii: “Ɔnyɛ Wɛ Ujisɔsi Ukraist A?” Amāŋ alɔ lɔfu kɛla ŋma ɛyi 5 ku ɔkpá néē hi ku What Can the Bible Teach Us? a. Ɛyi ɔɔma lɛ ikpɛyi ɛlā nōo kahinii: “The Ransom—God’s Greatest Gift.” Ipu ihayi doodu, alɔ gē ya ka ofula a kóō jɛ alɔ eyī fiyɛ ŋma lɛ ō gā Oblatu ku ikwū ku Ujisɔsi, mla ō bi ɔtu caca le hi ācɛ ɔhá igwu kéē wa i ba alɔ iyē ya Oblatu a. Ujehofa lɛ ɛnɛɛnɛ ojilima ce alɔ, ŋma lɛ ō jɛga lɛ alɔ ku alɔ nwu ācɛ ɔhá lɛyikwu Ɔyinɔnyilɔ ku nu!

17. Ɔdiya nōo ofula a wɛ ɛhi ofiyɛ duu ŋma ɛgiyi Ɔwɔico lɛ alɛɛcɛ a?

¹⁷ Ó lɛ afuu ŋ, alɔ lɛ ɔdā nōo ya nɛ alɔ cika ō mafu ka ofula a jɛ alɔ eyī nɛhi, mla ō yɔ i ya lɛ a gɔbu. Ohigbu ofula a, alɔ lɔfu lɛ ɛma olɔhi mla Ujehofa naana nɛ alɔ i jila iyē ŋ ma. Ohigbu ofula a, é géē je uklɔ ku Ebilii ca taajɛ. (1 Ujɔ́n. 3:8) Ohigbu ofula a, ococɛ ku Ujehofa lɛyikwu ɛcɛ nyā géē ya jila. Ɛjɛɛji ɛcɛ nyā géē je piya uparadais. Ɛjɛɛji ācɛ nɛ a gáā má a géē yihɔtu ku Ujehofa klla géē gba ɔ ɛ̄gbā. Ó lɛ a, ɛ̄cī doodu alɔ dɔka ɔwɛ nɛ alɔ géē mafu ka ofula nōo wɛ ɛhi ofiyɛ duu nōo ŋma ɛgiyi Ɔwɔico lɛ alɛɛcɛ a, jɛ alɔ eyī nɛhi!