1-2. Unwalu ɛyɛɛyɛyi nyá nɛ Ācɛ Ocijali alɛwa gē má a?

ƆYIKPO Upɔlu ta Utimoti ɔtu kwu ɔtu, amáŋ ó wɛ Utimoti foofunu ŋ. O yɔ i da oduudu Ācɛ O Yɛce Ukraist, kéē ceyitikwu ya ɛjɛɛji ɔfu ku uwa ipu uklɔ ku ɔna ō ta a. (2 Utím. 4:5) Ɛjɛɛji alɔ gē bi ukɔ́ nɛ Upɔlu tu nyā le yuklɔ lɔɔlɔhi. Amáŋ ó gē tɔɔtɛ ekoohi ŋ. Ayinɛ alɔ alɛwa gē yuufi ō yuklɔ ku ɔna ō ta a. (2 Utím. 4:2) Ocabɔ mafu, gbɛla lɛyikwu ayinɛ alɔ nōo lā ipu éwo néē lɛ abɔ ci aya, amāŋ oduudu uklɔ ku alɔ a. Naana a, ayinɛ alɔ nyā gē ceyitikwu tɔɔna kpɔ, naana néē kóō jé ka é lɔfu je aa ta ipu inu agba gla ɔdaŋ ka é lɛ aa má a!

² Ācɛ o gba Ujehofa ɛ̄gbā gē má unwalu ɛyɛɛɛyi, nōo lɔfu ya ku abɔ kóō hɛ uwa iyē gla. Ocabɔ mafu, ayinɛ alɔ ōhī cɛgbá ō yuklɔ lɔfu lɔfu, o ya ɛɛ kóō tɔɔtɛ lɛ uwa ō ya ɛgba ku apɔlɛ ku uwa. Ó gē he uwa ɔtu nɛhi ō yuklɔ ku ɔna ō ta a, amáŋ oŋmɛyi ku alaadi ɛ̄jɛ̄ gē jɛ uwa nɛhi. Ōhī ku ayinɛ alɔ i klla gē ya nwune ipu uklɔ ku ɔna ō ta a gla gɛ ŋ, ohigbu ka é yɔ i doōcē, gbɔɔ ō je hilokplici amāŋ é gē yɛ ŋma ɔlɛ ku uwa gla gɛ ŋ. Ɛlá nōo gē wa ipu ɔtu ku ācɛ ōhī eko doodu a, wɛ ka é cɛgbá lɛ Ujehofa ŋ. Ɔyinɛ alɔ nɔnya éyi nɛ iyē nu lé ka u Mary * a kahinii: “N gē ceyitikwu lɔfu lɔfu ka um kwu iyi um tu, ŋma ɛlá obɔbi mla ɔtu nōo gē biya gā um a, ó kē i ya ku abɔ kóō hɛ um iyē. Cɛɛ, n gbɔɔ ō ŋmo iyi um ɛbɔbi ohigbu ka ó gē kpo eko, nɛ um cika ō bi le yuklɔ ku ɔna ō ta a.”

3. Ɔdi nɛ alɔ gáā kɛla lɛyikwu ɔ, ipu ikpɛyi ɛlā nyā a?

³ Ɛgɛ duuma nɛ unwalu ku alɔ kóō nwune lɛ naana, Ujehofa géē je ɔfu nɛ alɔ cɛgbá a lɛ alɔ o ya ɛɛ ku alɔ gɔbu yɔ i gba ɛ̄gbā. Alɔ géē kɛla lɛyikwu ɛgɛ nɛ Ujehofa gē ta alɔ abɔ a. Gbɔbu lɛ ɔɔma alɔ géē kɛla lɛyikwu ɛgɛ nɛ ó ta Upɔlu mla  Utimoti abɔ kéē lɛ uklɔ ku ɔna ō ta a ya kwɛyi, naana néē yɔ i má unwalu ɛyɛɛyɛyi a.

4. Unwalu ɛyɛɛyɛyi nyá nɛ Upɔlu má a?

⁴ Upɔlu má unwalu alɛwa. Ohigbu ɛnyā igbalɛwa ó gē cɛgbá otabɔ ku Ujehofa ofiyɛ duu eko nɛ aolɛla ku nu lɛ ɔ gɔ, kwu agba kwu ɔ, amāŋ ceyitikwu kéē lɛ ɔ ŋmo. (2 Ukɔ́r. 11:23-25) Uweyi i ya Upɔlu ō ka tɛɛcɛ ka ekoohi, anuɔ gē nuunu lɔfu lɔfu ohigbu abɔ ō hɛ auɔɔ iyē a ŋ. (Uróm 7:18, 19, 24) Upɔlu klla lɛ “ōcē kú ɔkpíye nōo lɔnɔ bɛ̄ɛka ujē” a. Ó gē gbɔɔkɔ lɛ Ɔwɔico eko duudu kóō kwu ōcē nyā i fu ŋma ɔ iyē.​—2 Ukɔ́r. 12:7, 8.

5. Ɔdi nɛ Upɔlu ceyitikwu ya naana nɛ ó yɔ i má unwalu ɛyɛɛyɛyi a?

⁵ Ujehofa lɛ ɔfu iyē je lɛ Upɔlu kóō yɔ i gɔbu yuklɔ ku ɔna ō ta a, naana nɛ ó yɔ i má unwalu ɛyɛɛyɛyi a. Leyi yɛ ocabɔ ku ɔdā nɛ ɔyikpo Upɔlu ya a. Ɛpleeko néē lɛ agba kwu ɔ abɔ ɔlɛ ipu éwo ku Urom a, ó bi ɔtu caca le tɔɔna lɛ aotrɛyi ku ācɛ Ujiyu. Á jé ŋ, ó kē tɔɔna lɛ ācɛ ku igɔmɛnti a duu. (Ācot. 28:17; Ufíl. 4:21,22) Ó klla tɔɔna lɛ ācɛ ɛyɛɛyɛyi nōo gē gbo aotrɛyi ku igɔmɛnti a, mla ācɛ nōo gē wa ɔlɛ gáā má ɔ a. (Ācot. 28:30, 31; Ufíl. 1:13) Ɛpleeko ɔɔma piii a, Ujehofa klla bi Upɔlu ta aɔkpá ɛyɛɛyɛyi, nōo ta Ācɛ O Yɛce Ukraist ku eko ɔɔma jaa gā kwu icɛ a abɔ nɛhi. Ocabɔ ku Upɔlu klla lɛ ɔfu tu ayinɛ nōo yɔ Urom a iyē nɛhi, ohigbu ɛnyā “é lɔtū lɛ gbɔɔ́ ō tɔ́ɔna kú olɛhɔ̄ ā tɛ́ɛcɛ pāāla eko dóódu.” (Ufíl. 1:14) Igbalɛwa ó gē tɔɔtɛ lɛ Upɔlu ō ya nwune ɛgɛ nɛ ó dɔka a ŋ, amáŋ ó ceyitikwu bi ɛjɛɛji ɔfu ku nu le ya ɔdā nɛ ó ya gla a. Oŋma lɛ ō ya ɛnyā, “úklɔ́ kú ɔ̄kōolɔhi ā le jɛ̄ gɔbū.”​—Ufíl. 1:12.

6. Ɛgɛ nɛ ɔkpá ku 2 Ācɛ Ukɔ́rīnti 12:9, 10 ka a, ɔdi ta Upɔlu abɔ kóō lɛ uklɔ ku ɔna ō ta ku nu ya kwɛyi a?

⁶ Upɔlu gáā le má ku ɛjɛɛji ɔdā nɛ ó ya ipu ɛ̄gbā ō gba ku Ujehofa a i ŋma ɔfu ku abɔyi nu ŋ, amáŋ oŋma ɔfu ku Ujehofa nɛ. Ó cɛ ka ɔfu ku Ɔwɔico “gē lɔfú nɛ̄hi ipú ācɛ nēe kwáahi ā.” (Jé 2 Ācɛ Ukɔ́rīnti 12:9, 10.) Naana nɛ Upɔlu má ó yaŋmo ɛyɛɛyɛyi néē klla tu ɔ agba a, Ujehofa o bu ipu alelekwu ihɔ ku nu je ɔfu nɛ Upɔlu cɛgbá a lɛ ɔ, o ya ɛɛ kóō lɛ uklɔ ku ɔna ō ta ku nu ya kwɛyi.

7. Aunwalu nyá nɛ Utimoti cɛgbá ō yale, o ya kóō lɛ uklɔ ku ɔna ō ta ku nu ya kwɛyi a?

⁷ Naana nɛ Utimoti ta Upɔlu abɔ ipu uklɔ ku ɔna ō ta a, ó cɛgbá ō gbolo ce Ujehofa o  ya kóō lɛ uklɔ ku ɔna ō ta ku nu ya kwɛyi. Utimoti ba Upɔlu iye ipu ɛjɛɛji iyawu nɛ ó yɛ a. Upɔlu klla tu ɔ ɛhɔ gā ipu ujɔ ɛyɛɛyɛyi kóō nyɔ gáā ta ayinɛ a ɔtu kwu ɔtu. (1 Ukɔ́r. 4:17) Utimoti lɔfu gbɛla ka anuɔ i gáā ya ɔ gla ŋ. Ɛnyā kē lɔfu wɛ ɔdā nōo ya nɛ Upɔlu tɔ ukɔ́, ka ó hi “cɛ̄ lɛ ɔ̄cɛ dúúmā lɛ uwɔ gwéeyē ohígbū ka a wɛ ɔyipɛ ŋ́” a. (1 Utím. 4:12) Ɔdā ɔhá nōo ya a, wɛ ka Utimoti lɛ ōcē ku ɔkpiye nōo lɔnɔ bɛɛka uje a duu, aku nu a wɛ ka ó gē “doōce ojigógó.” (1 Utím. 5:23) Amáŋ Utimoti jé ka Ujehofa géē bi alelekwu ihɔ ku nu nōo lɔfu nɛhi a, je ɔfu nɛ ó cɛgbá a lɛ ɔ o ya kóō gɔbu yɔ i tɔɔna klla cɛ ayinɛ nu ɛhɔ.​—2 Utím. 1:7.

8. Ɛgɛnyá nɛ Ujehofa gē lɛ ɔfu ta ācɛ ɔlɛ nu iyē icɛ a?

⁸ Icɛ Ujehofa gē je “ɔfú nɛ̄ɛ̄nɛ̄hi” lɛ ācɛ ɔlɛ nu, o ya ɛɛ kéē gɔbu yɔ i gba ɔ ɛ̄gbā kpaakpa. (2 Ukɔ́r. 4:7) Ku alɔ kɛla lɛyikwu ɔdā ɛnɛ nɛ Ujehofa ya tɔɔtɛ lɛ alɔ, o ya ɛɛ kóō lɛ ɔfu tu alɔ iyē klla ta alɔ abɔ hayi kpaakpa lɛ ɔ a. Ɔkɔ ō gba, Ubáyíbu, ō piyatɔha mla ayinɛ ipu ujɔ, mla uklɔ ku ɔna ō ta a.

9. Ɛgɛnyá nɛ ɔkɔ ō gba gē ta alɔ abɔ a?

⁹ Ɛgɛ nɛ ɔkɔ ō gba gē lɛ ɔfu tu alɔ iyē a. Ipu ɔkpá ku Ācɛ Ɛ́fēsɔsi 6:18, Upɔlu ta alɔ ɔtu kwu ɔtu ku alɔ gbɔɔkɔ “ipú ɔdā dúú nɛ̄ [alɔ] bī abɔ̄ gē yá ā.” Ujehofa gē po ɔkɔ ō gba ku alɔ klla le tutu ō ta alɔ abɔ. Jonnie nōo lā ipu éwo ku Bolivia a má ɛgɛ nɛ Ujehofa ta ɔ abɔ, ɛpleeko nɛ ó yɔ i má unwalu ɛyɛɛyɛyi a. Ɔnyā nu, adā nu mla ɛ́nɛ́ nu gbɔɔ ō doōcē ɛpleeko ekponu. Abɔɔ u Jonnie yɔ i ceyitikwu kóō leyikwu uwa a, ɛ́nɛ́ nu gáā gekwu. Ōcē ku adā nu mla ɔnyā nu i klla mɛ fiya ŋ. Abɔɔ u Jonnie gbɛla lɛyikwu eko ɔɔma a, o kahinii: “Eko duuma nɛ um gbɔɔ ō lɛ ɔtu ō plico nɛɛnɛhi, ɔkɔ ō gba lɛ Ujehofa gē ta um abɔ a. Ohigbu ka um gē ka ɛgɛ nɛ ɔtu ya um lɛ piii a lɛ Ujehofa.” Ujehofa lɛ ɔfu nɛ u Jonnie cɛgbá a je lɛ ɔ, o ya ɛɛ kóō lɔtu ku ojama a. Ronald nōo wɛ ɔnyakwɔcɛ ku ujɔ ipu éwo ku Bolivia a, gáā le jé ka ɔnyā nu lɛ ōcē ku ucansa. Ó klla gáā gekwu abɔɔ ɔya éyi gáā le yɛ a. Ɔdi ta ɔ abɔ kóō lɔtu ipu āhɔ̄ nyā a? Ó kahinii: “Eko duuma nɛ um gē gbɔɔkɔ lɛ Ujehofa, um gē da ɔ ɛgɛ nɛ ɔtu gē ya um lɛ piii a. N jé ka ó jé ɔdā nōo yɔ i ya um a fiyɛ ācɛ ɔhá, ó kóō jé ɔ fiyɛ ami abɔ iyi um.” Ekoohi ó gē ya alɔ bɛɛka alɔ i gáā lɔtu ku unwalu ku alɔ gla ŋ ma, ó klla lɔfu ya ku alɔ jé ɔdā nɛ alɔ gáā gbɔɔkɔ lɛyikwu ɔ piii a ŋ. Naana, Ujehofa gē hi alɔ igwu ku alɔ gbɔɔkɔ lɛ ɔ kpɔ, ɔdaŋ nóō kóō lɔfu lɔnɔ tu alɔ ō ka ɛgɛ nɛ ɔtu yɔ i ya alɔ piii a.​—Uróm 8:26, 27.

10. Ɛgɛ nɛ ɔkpá ku Ācɛ Uhíbru 4:12 ka a, ɔdiya nɛ ó cɛgbá ku alɔ yɔ i jé Ubáyíbu ɛ̄cī doodu klla yɔ i gbɛla lipu lipu tu ɔdā nɛ alɔ yɔ i jé a?

¹⁰ Ɛgɛ nɛ Ubáyíbu ō jé gē lɛ ɔfu tu alɔ iyē a. Upɔlu gē kɔlcɛ ku Ɛlā ku Ɔwɔico eko doodu, o ya ɛɛ kóō lɔfu iyē klla lɛ ɔtu ō tu kwu ɔtu. Alɔ cɛgbá ō ya lɛ a duu. (Uróm. 15:4) Ɔdaŋ ka gē jé Ubáyíbu ɛ̄cī doodu klla gē gbɛla lipu lipu tu ɔdā nɛ a yɔ i jé a, Ujehofa géē ta uwɔ abɔ jé ɛyi ku ɛgɛ nɛ Ubáyíbu ō jé lɔfu ta uwɔ abɔ a. (Jé Ācɛ Uhíbru 4:12.) Ronald nɛ alɔ kɛla lɛyikwu ɔ gbɔbu a kahinii: “N gweeye nɛhi ka um gē ceyitikwu jé Ubáyíbu otu doodu. N gē gbɛla lipu lipu lɛyikwu auce ō ya ku Ujehofa, mla ɛgɛ nɛ ó gē lɛ ɛlá wu ācɛ ɔlɛ nu a. Ɛnyā kē lɛ ɔfu tu um iyē nɛhi.”

11. Ɛgɛnyá nɛ Ubáyíbu ō jé ta ɔyinɛ alɔ nɔnya éyi nɛ ɔba nu kwū a, abɔ kóō lɔtu ipu ahɔ ku nu a?

¹¹ Ɔdaŋ ku alɔ yɔ i gbɛla tu ɔdā nɛ alɔ jé a ojigogo, ó géē tu alɔ abɔ leyi olɔhi má unwalu ku alɔ. Ku alɔ má ɛgɛ nɛ Ubáyíbu tu ɔyinɛ alɔ nɔnyā éyi nōo yɔ i ya ɔtu noobi a abɔ, kóō  lɔtu ohigbu ɔba nu nōo kwū a. Ɔnyakwɔcɛ ku ujɔ éyi tu ɔ ɔtu kwu ɔtu ka ó géē nwu ɛlā alɛwa, ŋma lɛ ō jé ɔkpá ku Ujobu. Abɔɔ ó ya lɛ a, aflɛyi ó yɔ i ŋmo Ujobu ɛpɔbi ohigbu ɛlá ō gbo ku nu. Abɔɔ ó yɔ i leyi yɛ ɛlā nōo ya da Ujobu a gɔbu a, ó kahinii: “Ujobu! A hii gbɛla lɛyikwu unwalu ku uwɔ foofunu ŋ!” Amáŋ igbihaajɛ, ó gáā le jé ka anuɔ lɛ uce ō ya bɛɛka Ujobu a duu. Ɛnyā ta ɔ abɔ kóō lɛ ɔwɛ nɛ ó gē gbɛla a piyabɔ, ó kwu lɔfu iyē, ó klla le tɔɔtɛ lɛ ɔ ō lɔtu ipu ɔtu nobi nɛ ó yɔ anu a.

12. Ɛgɛnyá nɛ Ujehofa gē bi ayinɛ nōo yɔ ipu a le je otabɔ lɛ alɔ, o ya ɛɛ ku alɔ yɔ i lɛ ɔfu iyē a?

¹² Ɛgɛ nɛ ō piyatɔha mla ayinɛ ipu ujɔ gē lɛ ɔfu tu alɔ iyē a. Ɔwɛ ɔhá nɛ Ujehofa gē lɛ ɔfu tu alɔ iyē a, wɛ o bu ipu ayinɛ alɔ nōo yɔ ipu ujɔ a. Upɔlu da ayinɛ ku Urom a, ka ó yɔ i ŋmo anuɔ unwu ku anuɔ “lɔfú tū aá iyē, cɛ́ɛ́ aá kē lɔfú tū um iyē.” (Uróm 1:11, 12) Mary nɛ alɔ kɛla lɛyikwu ɔ aflɛyi a, gē dɔka ō yɔ mla ayinɛ ipu ujɔ nɛhi. Ó kahinii: “Ujehofa gē bi ayinɛ ipu ujɔ, nóō kóō jé ɔdā duuma lɛyikwu unwalu ku um ŋ ma le je otabɔ. É gē kɛla amāŋ tu ɔkpá ɛhɔ fu um nōo gē ta um ɔtu kwu ɔtu, ɔdā nɛ um kē cɛgbá yiili yɔ abɔɔ a. Alɔ klla géē lɛ ɔtu ō tu kwu ɔtu, ŋma lɛ ō kɛla lɛ ayinɛ alɔ nɔnɔya mla ayinɛ alɔ nɔnyilɔ nōo má ɛdɔ unwalu ɛgɛnya gbɔbu ɛ ma, mla ɔdā néē ya ipu āhɔ̄ ɔɔma a. Anyakwɔcɛ ku ujɔ a klla ya ku um jé, ka ayinɛ nōo yɔ ipu ujɔ a yihɔtu um nɛhi.”

13. Ɛgɛnyá nɛ alɔ géē lɛ ɔfu tu iyi alɔ iyē ipu ōjila ku ujɔ a?

¹³ Ōjila ku ujɔ wɛ ɛga o cɛgbá fiyɛ duu nɛ alɔ lɛ, ō ta iyi alɔ ɔtu kwu ɔtu a. Eko duuma nɛ a le ta ōjila ku ujɔ, lɛ ɔfu tu ayinɛ iyē ŋma lɛ ō da uwa ŋma ipu ɔtu, ɛgɛ nɛ a yihɔtu ku uwa lɛ mla ɛgɛ nɛ aɔdā néē ya a jɛ uwɔ eyī a? Ocabɔ mafu, gbɔbu lɛ ōjila ku ujɔ éyi, ɔnyakwɔcɛ ku ujɔ éyi nɛ iye nu lé ka u Peter a da ɔyinɛ nɔnya éyi nɛ ɔba nu i wɛ Ocijali ŋ ma kahinii: “Ó gē ta alɔ ɔtu kwu nɛhi ō má uwɔ ipu ōjila ku ujɔ. A gē lɛ ɛjɛɛji ayipɛ ɔlɛ uwɔ tutu ku ōjila kéē klla toohi eko doodu.” Agije le mu ɔ eyī abɔɔ ó yɔ i toohi a. Ó kahinii: “N cɛgbá ō po ɛlā nɛ a ka nyā icɛ, nɛɛnɛhi.”

14. Ɛgɛnyá nɛ uklɔ ku ɔna ō ta gē ta alɔ abɔ a?

¹⁴ Ɛgɛ nɛ uklɔ ku ɔna ō ta gē lɛ ɔfu tu alɔ iyē a. Alɔ gē gweeye nɛhi eko duuma nɛ alɔ gē tɔɔna lɛ ācɛ, ɔdaŋ ka é jahɔ ta alɔ amāŋ ka é ta ō jahɔ. (Aíit. 11:25) Ocabɔ ku ɔyinɛ alɔ nɔnya Stacy, mafu ɛgɛ nɛ uklɔ ku ɔna ō ta a gē lɛ ɔfu tu alɔ iyē a. Eko néē kwu ɔcɛ ku apɔlɛ ku nu éyi taajɛ ŋma ipu ujɔ a, ó le kwu ɔ iyē nɛhi anu ó gbɔɔ ō da iyi nu ɔka kahinii: ‘Ó lɛ ɔdā duuma nɛ um lɔfu ya, ō bi le ta ācɛ apɔlɛ ku um abɔ gla a?’ Ó tɔɔtɛ lɛ ɔyinɛ alɔ Stacy kóō ma ō gbɛla lɛyikwu unwalu nyā gla ŋ. Amáŋ ɔdi ta ɔ abɔ igbihaajɛ kóō lɔtu ipu āhɔ̄ o lɔnɔ nyā a? Uklɔ ku ɔna ō ta! Eko duuma nɛ ó gē tɔɔna, ó gē gbɛla lɛyikwu ācɛ nōo yɔ ɔwɛ ɛga nɛ ó gē tɔɔna nōo cɛgbá otabɔ a. Anɔɔ ó kahinii: “Ɛpleeko ɔɔma, Ujehofa ya ka um lɛ ɔcɛ éyi nōo dɔka ō klɔcɛ ku Ubáyíbu má, nɛ ó klla kpo eko bonu ō bi ɔdā nɛ ó yɔ i nwu a le yuklɔ ŋ. Ɔɔma ta um ɔtu kwu ɔtu nɛhi. Ɔdā nōo ta um abɔ fiyɛ kpɛɛm a wɛ uklɔ ku ɔna ō ta a.”

15. Ɔdi nɛ a nwu ŋma aɛlā nɛ u Mary ka a?

¹⁵ Ohigbu āhɔ̄ nɛ ācɛ ōhī yɔ anu a, é lɔfu gbɛla ku aa yɔ i yuklɔ ku ɔna ō ta a ɛgɛ nɛ aa cika ō ya a ŋ. Ɔdaŋ ku ɛgɔɔma nōó gē ya uwɔ a, bla ku ɔtu gē he Ujehofa ɔdaŋ ku ɔdā nɛ a yɔ i ya a wɛ ofiyɛ duu ku uwɔ a. Alɔ leyi yɛ ocabɔ ku Mary kpɔ. Eko nɛ ó nyɛɛ gā ɛga nɛ ācɛ ku abɔɔ gē ka uce ɔhá a, ó gbɛla ku anu ɔ i tiile ŋ. Ó kahinii, “Aflɛyi a, ɔdā nɛ um ya foofunu gla a wɛ ō toohi ligii, jé ɛga ku Ubáyíbu éyi, amāŋ ō je utrat lɛ ācɛ ipu uklɔ ku ɔna ō ta a.” Ó gbɔɔ ō gbɛla ka anuɔ i cɛgbá  bɛɛka ayinɛ nōo jé ō ka uce ɔɔma lɔɔlɔhi a ŋ. Amaŋ, ó gáā lɛ ɔwɛ nɛ ó i gbɛla a piyabɔ. Ó gā gbɔɔ ō má ku Ujehofa bi ɔ le yuklɔ gla, naana nɛ ó jé ō ka uce a lɔɔlɔhi ŋ ma. Ó klla kahinii, “Ɛlā nɛ Ubáyíbu gē nwu a i lɔnɔ ŋ, ó kē lɔfu nya oyeeyi ku ācɛ ta.”

16. Ɔdi lɔfu ta ācɛ nóō dɔka ō tɔɔna amáŋ néē nyɛɛ ŋma ɔlɛ gla ŋ ma abɔ a?

¹⁶ Ujehofa jé ka ó lɛ ācɛ ōhī ku alɔ nōo dɔka ō tɔɔna, amāŋ alɔ i nyɛɛ ŋma ɔlɛ gla ŋ. Ohigbu ɛnyā, Ujehofa lɔfu ta alɔ abɔ ku alɔ tɔɔna lɛ ācɛ nōo gē wa i ta alɔ abɔ a, amāŋ aidɔkitɔ mla ācɛ nōo gē ta aidɔkitɔ abɔ a. Ɔdaŋ ku alɔ lɛ ɔdā nɛ alɔ yɔ i ya babanya a miya ɛnɛ nɛ alɔ ya gbɔbu a, ó lɔfu ya ku abɔ kóō hɛ alɔ iyē. Amáŋ ɔdaŋ ku alɔ má ɛgɛ nɛ Ujehofa yɔ i ta alɔ abɔ babanya a, ó géē lɛ ɔfu tu alɔ iyē ō lɔtu unwalu duuma nɛ alɔ yɔ i má a mla eeye.

17. Ɛgɛ nɛ ɔkpá ku Ɔ̄cokóītá 11:6 ka a, ɔdiya nɛ alɔ cika ō gɔbu yɔ i tɔɔna ɔdaŋ ka ācɛ i kóō jahɔ ta alɔ ŋ ma?

¹⁷ Ŋma ipu ɛjɛɛji ikpo ku ɛlā ɔkwɛyi nɛ alɔ gē nyi a, alɔ i jé ɛnɛ o lɔfu ya ŋma anu a ŋ. (Jé Ɔ̄cokóītá 11:6.) Ocabɔ ku Barbara nōo fiyɛ ihayi ofu ɛnɛ (80), nōo gē tɔɔna o bu ipu ɔdā ō le gwo waya mla uleta a, lɛ ɛnyā tu alɔ eyī peee. Ipu uleta éyi nɛ ó ta a, ó kwu Ɔda Ō Gbaajɛ ku Ɔya ɔmɛta 1, 2014 aku oyibo u ta ipu uleta a, nɛ ɛyi ɛlā ku nu kahinii: “What God Has Done for You.” Ɔyinɛ alɔ nɔnya a i jé ka ɔba mla ɔnyā éyi, nōó wɛ Ācɛ Ocijali Ku Ujehofa gɛ ŋ ma nɛ ó tu uleta ɔɔma ɛhɔ fu uwa a ŋ. É jé ɔkpá ɔɔma igbalɛwa. Ó ya ɔba ɔɔma bɛɛka Ujehofa yɔ i kɛla lɛ ɔ kpaakpa a. Naana néē ma ō gā ōjila ku ujɔ ŋmifi ihayi ofu ce ahaapa (27) ɛ ma, é gbɔɔ ō gā ōjila klla kwu piya ācɛ o lɔfu ipu ujɔ nɛhi kpɔ. Barbara lɛ ɔtu ō tu kwu ɔtu lɛ klla kwu lɔfu iyē nɛhi, abɔɔ ó má ɔdā olɔhi nōo bɛɛcɛ ŋma ipu uleta ɔɔma nɛ ó ta a!

18. Ɔdi nɛ alɔ cɛgbá ō ya, o ya ɛɛ ku alɔ lɛ itene ŋma ɔfu nɛ Ɔwɔico i je lɛ alɔ a?

¹⁸ Ujehofa gē je ɛga ɛyɛɛyɛyi lɛ alɔ ō miyɛ ɔfu nɛhi ku nu. Ó gē ya ɛnyā o bu ipu ɔkɔ ō gba, Ubáyíbu, ayinɛ ipu ujɔ, mla uklɔ ku ɔna ō ta a. Eko nɛ alɔ yuklɔ mla aɔdā nōo yɔ nyā, alɔ gē mafu ku alɔ kpɔtuce Ujehofa ka ó géē ta alɔ abɔ. Ó kē le tutu ō ya ɛgɛ nɛ ó ka a eko doodu. Alɔ gbolo ce Adā alɔ nōo yɔ ɔkpanco a eko doodu, ohigbu ka ó gē gweeye ō “je ɔfú lɛ ɔ̄cɛ dóódu nōo kwú ɔtú kú nū ú ce ɔ́ mɛ́mla ɔ̄cɛ nōo klla lɛyí táajɛ lɛ ɔ́ ā.”​—2 Úklɔ́ 16:9.