IKPƐYI ƐLĀ Ō KLƆCƐ ƆMƐ 26
“Aá Le Pīyeyī Wā Ɛgiyí Um”
‘Aá le pīyeyī wā ɛgiyí um, cɛ́ɛ́ kú n̄ kē le pīyeyī wā ɛgiyá aá.’—UMÁL. 3:7.
IJÉ ƆMƐ 102 ‘Ta Ācɛ Nōó Lɔfu Iyē Ŋ Ma Abɔ’
ƆDĀ NƐ ALƆ GÁĀ NWU A *
1. Ɛgɛnyá nɛ ɔtu gē ya Ujehofa lɛ, ɔdaŋ ku ɔcɛ nōo ma ɔ ta a kwu cigbihi wa ɛgiyi nu a?
IPU ikpɛyi ɛlā nɛ alɔ klɔcɛ gáā yɛ a, alɔ nwu ka Ujehofa lɛ iyi nu gbla ɔcogbaala olɔhi, nōo gē teyi tu eyeeye ku ala ku nu lɔɔlɔhi. Ó klla gē tine oduuma nōo gebi. Ujehofa da ācɛ Isrɛlu nōo ma ɔ ta a kahinii: ‘Aá le pīyeyī wā ɛgiyí um, cɛ́ɛ́ kú n̄ kē le pīyeyī wā ɛgiyá aá.’ Alɔ jé ku ɔtu gē ya Uehofa ɛgɔɔma icɛ duu, ohigbu ka ó kahinii: “Ń gē pīyabɔ̄ ŋ́.” (Umál. 3:6, 7) Ujisɔsi ka Ujehofa mɛmla aalelekwu otɛhɔ gē gweeye nɛɛnɛhi, eko duuma nɛ ɔcɛ nōo ma Ujehofa ta a, kwu cigbihi wa ɛgiyi nu kpɔ, ɔdaŋ nɛ ó kóō wɛ ɔcɛ ekponu foofunu.—Ulúk. 15:10, 32.
2. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?
2 Babanya, alɔ leyi yɛ aciije ɛta ku Ujisɔsi, nōo géē nwu alɔ aɛlā ō cɛgbá nɛhi, lɛyikwu ɛgɛ nɛ alɔ géē je otabɔ lɛ ācɛ nōo lɛ abɔ ci ɛ̄gbā ō gba ku Ujehofa a. Alɔ géē kɛla lɛyikwu auce ō ya ōhī nɛ alɔ cɛgbá, o ya ɛɛ ku alɔ lɔfu je otabɔ lɛ uwa kéē cigbihi a. Alɔ klla géē nwu ku alɔ géē lɛ eeye nɛhi, ɔdaŋ ku alɔ ceyitikwu ta uwa abɔ kéē cigbihi wa ɛgiyi Ujehofa.
Ō DƆKA IKPIIJE NŌO BI A
3-4. Ɔdiya nɛ ɔnyā néē kɛla lɛyikwu ɔ ipu Ulúku 15:8-10 a, ceyitikwu nɛhi kóō dɔka ikpiije ku nu nōo bi a?
3 Alɔ cika ō yuklɔ lɔfu lɔfu, o ya ɛɛ ku alɔ nyɔ i dɔka ācɛ nōo tine ō cigbihi wa ɛgiyi Ujehofa a. Ipu aciije éyi nōo yɔ ipu ɔkpá ku Uluku a, Ujisɔsi ka alɔ ɔ̄kā lɛyikwu ɔnyā nɛ ikpiije ku nu gebi a. Ikpiije nyā kē cɛgbá nɛɛnɛhi. Ɔdā nōo cɛgbá fiyɛ duu ipu ɔ̄kā ɔɔma, wɛ ɛgɛ nɛ ɔnyā a dɔka ikpiije a nɛ.—Jé Ulúku 15:8-10.
4 Ujisɔsi kɛla lɛyikwu ɛgɛ nɛ ɔtu ya ɔnyā éyi lɛ, eko nɛ ó lɛ ikpiije ku nu nōo gebi a piyɛ. Ɛpleeko ku Ujisɔsi a, ɔdaŋ ku ɔcɛnya duuma dɔka ō lɛ ɔba, ekoohi, ɛ́nɛ́ nu géē je ikpiije igwo lɛ ɔ. Ó lɔfu wɛ ka ikpiije nyā cɛgbá lɛ ɔnyā nyā nɛɛnɛhi, ohigbu ka ó wɛ ipu ɛ̄nɛ̄ nɛ ɛ́nɛ́ nu je lɛ ɔ a. Ɔnyā a gbɛla ka ikpiije a gaajɛ. Ohigbu ɔɔma ó lɛ ɔla hɛ kwu agege ku nu, anu ó gbɔɔ ō dɔka nu ɛbɛɛbɛ a, amáŋ ó má ɔ ŋ. Ɔla ku agege a i lɔfu ce lɔɔlɔhi kóō mɛɛbɛ lɔhi ō piyɛ ikpiije nɛ̄ŋcɛ́ a ŋ. Igbihaajɛ a, ó gáā lɛ ɛjɛɛji inu ɔlɛ nu gwu peee. Ɔga yoo, ó gáā lɛ ikpiije a má ipu imu nōó gwu ŋma inu ɔlɛ nu a, abɔ ɔla ŋma agege a yɔ i cɛ ce ɔ a. Ɔtu ku nu gaajɛ klɔdɔɔ! Ó gáā lɛ aɔya mla aoladogbe ku nu higwu, o ya ɛɛ kóō da uwa ɔkoolɔhi a.
5. Ɔdiya nōo dɔka ācɛ nōó gē piyatɔha mla alɔ gɛ ŋ ma cɛgbá oceyitikwu lɔfu lɔfu a?
5 Ipu aciije ku Ujisɔsi nyā, alɔ nwu ka ɔdaŋ ku odee ku alɔ gebi, alɔ cika ō ceyitikwu dɔka nu lɔfu lɔfu. Ɛgɔɔma nɛ ó lɛ mla ācɛ nōó gē piyatɔha mla alɔ gɛ ŋ ma. Alɔ cika ō ceyitikwu lɔfu lɔfu ku alɔ dɔka uwa. Á jé ŋ, é humayi piyatɔha mla alɔ ŋ ŋmiifi ihayi alɛwa ɛ. É lɔfu kwu calɛ gā ɛga ɔhá ɛ, á jé ŋ, ɛga nɛ ayinɛ nōo ba abɔɔ a i kóō jé uwa ŋ. Amáŋ babanya, alɔ jé kpɔcii ka ōhī ku uwa dɔka ō cigbihi wa ɛgiyi Ujehofa. É dɔka ō gba Ujehofa ɛ̄gbā mla ayinɛ uwa ipu ujɔ kpɔ, amáŋ é gáā ya ɔ gla ŋ, ɔdaŋ ku alɔ i ta uwa abɔ ŋ.
6. Ɛgɛnyá nɛ ɛjɛɛji ayinɛ ipu ujɔ lɔfu tabɔ ō dɔka ācɛ nōó gē nyɔ i tɔɔna amāŋ wa ōjila gɛ ŋ ma?
6 Anyɛ lɔfu tabɔ ō dɔka ācɛ nōó gē piyatɔha mla alɔ gɛ ŋ ma? Ɛjɛɛji ācɛ ō tɔɔna ɛlā Ɔwɔico nōo yɔ ipu ujɔ a lɔfu ya uklɔ ɔɔma a, kwu anyakwɔcɛ ku ujɔ o, ācɛ ō gbɔbu ɔna ō ta, mɛmla ācɛ nōo lɛ ācɛ ɛgɔɔma ipu apɔlɛ ku uwa a. A lɛ oklobiya, ɔncɛnya amāŋ ɔcɛ ɔlɛ uwɔ duuma nōó gē nyɔ i tɔɔna amāŋ gā ōjila ku ujɔ gɛ ŋ? Ɔdi nɛ a cika ō ya, ɔdaŋ ku a lɛ ɔcɛ ɛgɔɔma má eko nɛ a yɔ i tɔɔna ŋma ɔlɛ gā ɔla amāŋ ɛga nɛ ɛwa gē ba a? Ɔdaŋ ku ɔcɛ ɔɔma géē cɛ ō je inɔmba ku ulayi amāŋ ɔdā ō bi le gwo uwaya ku nu gā uwɔ nɛɛ, cɛɛ a kē kwu ɔ u lɛ anyakwɔcɛ ku ujɔ ku uwɔ.
7. Ɔdi nɛ a nwu ŋma ɛlā nɛ ɔnyakwɔcɛ ku ujɔ éyi nōo lé ka Uthomas ka a?
7 Anyakwɔcɛ ku ujɔ, wɛ ācɛ nōo lɛ uklɔ fiyɛ duu ō nyɔ i dɔka ācɛ nōo tine ō cigbihi wa ɛgiyi Ujehofa a. Ɛgɛnyá néē gáā ya ɛnyā a? Má ɔdā nɛ Uthomas, * ɔnyakwɔcɛ ku ujɔ éyi nōo lā Uspain a ka a. Ó je otabɔ lɛ ācɛ ofu ɛpa (40) kéē cigbihi wa ipu ujɔ a ɛ. Uthomas kahinii: “Aflɛyi, n gē da ayinɛ ɛyɛɛyɛyi ɔka, ɔdaŋ kē jé ɛga nɛ ōhī ku uwa lā babanya a. Amāŋ n lɛ ɔka da ayinɛ a, ɔdaŋ ka é jé ɔcɛ duuma nōó gē wa ōjila ku ujɔ gɛ ŋ. Ɛyinɛhi ku ayinɛ nōo yɔ ipu ujɔ a gē gweeye ō tabɔ, ohigbu kē má ka ó wɛ uklɔ ku uwa ō dɔka uwa duu. Igbihaajɛ eko duuma nɛ um gbɔɔ ō gā ɔlɛ uwa, n gē da uwa ɔka lɛyikwu ɛgɛ nɛ ayipɛ ɔlɛ uwa mla aɔmaapu uwa yɔ lɛ. Ācɛ ōhī ku uwa gē bi ayipɛ ɔlɛ uwa wa ōjila gbɔbu, ó kē lɛ eko éyi nɛ ōhī ku ayipɛ a wɛ ācɛ ō tɔɔna ɛlā Ɔwɔico. Alɔ lɔfu je otabɔ lɛ ayipɛ a abɔyi uwa duu, o ya ɛɛ kéē cigbihi wa ɛgiyi Ujehofa.”
BI AYI KU ƆLƐ UJEHOFA NŌO BI A CIGBIHI WA IPU UJƆ
8. Ipu aciije ku ɔyinɔnyilɔ nōo bi nōo yɔ ipu Ulúku 15:17-24 a, ɛgɛnyá nɛ adā ɔyi a ya odee mla ɔyi nu nōo piyabɔ a?
8 Uce ō ya nyá nɛ alɔ cɛgbá, o ya ɛɛ ku alɔ lɔfu je otabɔ lɛ ācɛ nōo dɔka ō cigbihi wa ɛgiyi Ujehofa a? Má ɛlā ōhī nɛ alɔ lɔfu nwu ŋma aciije ku Ujisɔsi lɛyikwu ɔyi ilakpa nōo nyɛɛ ŋma ɔlɛ a. (Jé Ulúku 15:17-24.) Ujisɔsi mafu ɛgɛ nɛ ɔyi a gáā gbɔɔ ō má igbihaajɛ ku uce olila nɛ ó ya a, mla ɛgɛ nɛ ó gáā le miya ō cigbihi gā ɔlɛ a. Adā nu le inya kwu gáā jila ɔyi a ɔwɛ klla lɛ ɔ kwu bɔtu lɔɔlɔhi, o ya ɛɛ ku ɔyi a kóō jé ku anuɔ yihɔtu nu. Ɔdā nɛ ɔyi a ya a kwu ɔ iyē nɛɛnɛhi, ó gbɔɔ ō gbɛla ku anuɔ i cika jɛ kéē hi ɔ ku ɔyi ku ɔlɛ adā anuɔ gɛ ŋ. Eko nɛ ɔyi a yɔ i da adā nu ɛgɛ nɛ ɔtu ya ɔ lɛ a, adā nu gbɔɔ ō menyinyi nu. Adā nu klla lɛ aɔdā ōhī ya, kóō mafu lɛ ɔ ka ō wɛ ɔlɛ ku nu jɛ ɔ eyī. Adā nu i gáā ya odee mla ɔyi a bɛɛka ó wɛ ɔfiyɛ ku nu ŋ, amáŋ ó géē bi ɔ kóō wɛ ɔyinɔnyilɔ ku nu nōo he ɔ ɔtu nɛhi. O ya ɛɛ ku adā nu kóō ma ɛnyā fu a, ó lɛ ucɛ ya klɛɛcɛ klla lɛ ɛnɛɛnɛ awulu kpo lɛ ɔyi nu nōo kwu piyabɔ ɛ ma kóō le wiiye.
9. Uce ō ya nyá nɛ alɔ cɛgbá, o ya ɛɛ ku alɔ lɔfu je otabɔ lɛ ācɛ nōo dɔka ō cigbihi wa ɛgiyi Ujehofa a? (Má ikpati nōo kahinii: “ Ɛgɛ Nɛ A Géē Je Otabɔ Lɛ Ācɛ Nōo Dɔka Ō Cigbihi Wa Ɛgiyi Ujehofa A.”)
9 Ujehofa lɛbɛɛka adā nōo yɔ ipu aciije ɔɔma a. Ó yihɔtu ayinɛ alɔ nōo habɔ ɛ̄gbā ō gba ku nu ta a, ó kē dɔka kéē cigbihi wa ɛgiyi nu. Alɔ lɔfu gbla Ujehofa ya, klla ta uwa abɔ kéē cigbihi. O ya ɛɛ ku alɔ lɔfu ya ɛnyā a, alɔ cika ō mafu ɔtoole, enyinyi, mla ihɔtu lɛ uwa. Ɔdiya nɛ alɔ cika ō mafu uce nyā lɛ uwa a, ɛgɛnyá nɛ alɔ kē gáā ma ɔ fu a?
10. Ɔdiya nɛ alɔ cɛgbá ɔtoole, o ya ɛɛ ku alɔ je otabɔ lɛ ɔcɛ kóō cigbihi wa ɛgiyi Ujehofa a?
10 Alɔ cika ō lɛ ɔtule lɛ uwa, ohigbu ka ó gē je eko gbɔbu ɛɛ ku ɔcɛ kóō cigbihi wa ɛgiyi Ujehofa. Ācɛ alɛwa ku uwa ka anyakwɔcɛ ku ujɔ mla ācɛ ɔhá ipu ujɔ wa ɔlɛ uwa igbalɛwa, gbɔbu ɛɛ néē gáā cigbihi wa ɛgiyi Ujehofa a. Unancy ɔyinɛ alɔ nɔnya éyi ŋma Asia kahinii: “Ɛnɛɛnɛ ɔya ku um éyi ipu ujɔ ta um abɔ nɛɛnɛhi. Ó yihɔtu um ɛgɛ nɛ ɔcɛ gē yihɔtu ɔyinɛ nu nyakwɔcɛ a. Ó gē da um lɛyikwu eko olɔhi nɛ alɔ jɔɔnyɛ tɔha eko tɛtɛ a. Ɔdaŋ ku um gbɔɔ ō da ɔ ɛgɛ nɛ ɔtu gē ya um a, ó gē lɛ ɔtule gē jahɔ gā um cii, ó kē i kpo eko bonu ō tu um ukɔ́ ŋ. Ó mafu gā um ka ó wɛ ɛnɛɛnɛ ɔya, nōo le tutu ō je otabɔ eko duuma.”
11. Ɔdiya nɛ alɔ cɛgbá enyinyi, o ya ɛɛ ku alɔ je otabɔ lɛ ɔcɛ néē ya ɔ cɔnu a?
11 Icɔnu gē lɛbɛɛka agbe nōo gē lɔnɔ tu ɔcɛ nɛhi a. Amáŋ enyinyi lɛbɛɛka ɛcí olɔfu, nōo lɔfu tabɔ ku ɔnɔ a kóō dee tu waajɛ. Ōhī ku ācɛ nōo habɔ ɛ̄gbā ō gba ku Ujehofa ta a, ya lɛ a ohigbu ka ɔcɛ éyi ipu ujɔ ya uwa cɔnu ihayi alɛwa nōo gáā yɛ a, ɛlā a kē yɔ i kwu uwa iyē nɛhi kpɔ ɛ. Ohigbu ɔɔma a, ó ŋmo uwa unwu ō cigbihi wa ɛgiyi Ujehofa ŋ. É lɔfu yɔ i gbɛla ka é ya uwa ɔdā nōó kpaakpa ŋ. É géē cɛgbá ɔcɛ nōo géē jahɔ tu uwa lɔɔlɔhi klla je ɛgɛ nɛ ɔtu gē ya uwa lɛ a. (Ujɛ́m. 1:19) Umaría nōo wɛ ɛdɔ ɔcɛ ɛgɔɔma gbɔbu a kahinii: “N cɛgbá ɔcɛ nōo géē jahɔ gā um, nōo géē tu um ɔtu kwu ɔtu, tu um ukɔ́ olɔhi klla ta um abɔ ku um jé ɔdā nɛ um géē ya a.”
12. Ɛgɛnyá nɛ ihɔtu ku Ujehofa lɛbɛɛka ɔŋgba a?
12 Ubáyíbu ka ihɔtu nɛ Ujehofa lɛ lɛ ācɛ ɔlɛ nu a lɛbɛɛka ɔŋgba a. Ɛgɛnyá a? Má ocabɔ nyá ka a: Alɔ jé ɔ ku a gwonu ta ipu isu, isu a kē yɔ i tu ugbagwu nɛɛnɛhi, eŋkpɔ a kē le hilaŋdɔ. Gbɔbu ɛɛ ku a jé a, eŋkpɔ a gbɔɔ ō je uwɔ. Amáŋ ɔcɛ nōo yɔ kwu uwɔ ajaajɛ ipu ugbeenyi ɔhá, lɛ odee ta gē lɛ uwɔ ku a bi ɔ, o ya ɛɛ ku eŋkpɔ a kóō hii je uwɔ ŋ. Ó géē jɛ uwɔ eyī nɛɛnɛhi. Amáŋ, a cɛgbá otabɔ nōo fiyɛ ɔɔma, o ya ɛɛ ku a hii kwú ŋ. A kē dɔka ō bɛɛcɛ ŋma eŋkpɔ a. Ó lɛ a, a géē cɛgbá otabɔ ku ācɛ nōo yɔ ipu ugbeenyi a kéē lɛ ɔŋgba ta gē lɛ uwɔ, cɛɛ kéē pi uwɔ wa ipu ugbeenyi ku uwa. Ujehofa kɛla lɛyikwu ācɛ Isrɛlu nōo ma ɔ ta a kahinii: ‘N lɛ abɔ̄ tū ūwā abɔ̄ ipú eyīnyinyi mla ihɔtū.’ (Uhos. 11:4) Icɛ, ɔtu gē ya Ujehofa lɛ a duu, lɛyikwu ācɛ nōo lɛ abɔ ci ɛ̄gbā ō gba ku nu a. É lɛbɛɛka ācɛ nɛ unwalu mla ɔtooplico yɔ i kpo uwa ɛgɛ nɛ eŋkpɔ gē je ɔcɛ a. Ó dɔka kéē jé ku anuɔ yihɔtu uwa, ku anuɔ kē dɔka ō pi uwa wa ɛgiyi nu. Ujehofa kē lɔfu bi uwɔ le mafu lɛ ācɛ a ɛgɛ nɛ ó yihɔtu uwa lɛ a.
13. Ɛgɛnyá nɛ ocabɔ ku Upablo mafu ka ihɔtu ku alɔ lɔfu ta ācɛ ɔhá abɔ kéē cigbihi wa ɛgiyi Ujehofa a?
13 Ó cɛgbá nɛhi ku alɔ bēē da ācɛ nōo nōo habɔ ɛ̄gbā ō gba ku Ujehofa ta a, ka Ujehofa mla alɔ abɔyi alɔ yihɔtu uwa nɛɛnɛhi. Upablo néē kɛla lɛyikwu ɔ ipu ikpɛyi ɛla nōo gáā yɛ a, habɔ ɛ̄gbā ō gba Ujehofa fiyɛ ihayi ofuce igwo (30). Ó kahinii: “Ɔcɔɔci éyi, abɔ um yɔ i bɛɛcɛ ŋma ɔlɛ a, ɔyinɛ nɔnya éyi nōo le hila okpliici nōo gbonɛnɛ a, wa gáā ta um klla kɛla gā um, ɔwɛ nōo mafu ka ó yihɔtu um. N gbɔɔ ō jikwu bɛɛka ɔyipɛ nɛ̄ŋcɛ́ a. N da ɔ ka ó lɛbɛɛka Ujehofa tu ɔ ɛhɔ gáā kɛla gā um á. Ikpiikpo ɔɔma nɛ um gáā le miya ō cigbihi wa ɛgiyi Ujehofa a.”
BI IHƆTU LE JE OTABƆ LƐ ĀCƐ NƐ ABƆ HƐ UWA IYĒ A
14. Oŋma aciije nōo yɔ Ulúku 15:4, 5 a, ɔdi nɛ ɔcogbaala a ya, abɔ ó lɛ ala nōo gebi a piyɛ a?
14 Igbihi nɛ alɔ lɛ ācɛ nōo lɛ abɔ ci ɛ̄gbā ō gba ku Ujehofa má a, alɔ cika ō bēē ta uwa abɔ klla tu uwa ɔtu kwu ɔtu gɔbu. Bɛɛka ɔyi noo bi ipu aciije ku Ujisɔsi a, ɔtu lɔfu yɔ i biya lɛ uwa nɛɛnɛhi. Ó kē lɔfu ya uwa lɛ a gboji ajɛ gbɔbu ɛɛ kéē gáā lɛ eeye kpɔ. Ohigbu ka é yɔ ipu ɛcɛ ku Ebilii gboji ɛ ma a, é lɔfu tubla Ujehofa ajaajɛ ɛgɛ néē yɔ a gbɔbu gɛ ŋ. Alɔ cika ō tu uwa abɔ ku ɔtu néē kpoce Ujehofa gbɔbu a kóō gáā lɔfu kpɔ. Ipu aciije ku ala nōo bi a, Ujisɔsi kɛla lɛyikwu ɛgɛ nɛ ɔcogbaala a, je ala a kla ɔkɔ, klla bi ɔ gā ɛga nɛ aɔmpa nu ba a. Ɔcogbaala ɔɔma humayi bi eko alɛwa mla ɔfu ku nu yɔ i dɔka ala nōo bi ɔɔma ɛ. Amáŋ ó jé ka ala a cɛgbá otabɔ fiyɛ. Ó jé ku ala a i lɔfu iyē ō yawu abɔyi nu cigbihi gā ɛga nɛ aɔmpa nu ba a ŋ, ohigbu ɔɔma nɛ ó je ɔ kla ɔkɔ a.—Jé Ulúku 15:4, 5.
15. Ɛgɛnyá nɛ alɔ gáā je otabɔ lɛ ācɛ nɛ abɔ hɛ uwa iye nōo dɔka ō cigbihi wa ɛgiyi Ujehofa a? (Má ikpati nōo kahinii: “ Ɔdā Ō Bi Le Yuklɔ Nōo Cɛgbá Nɛhi.”)
15 Ó géē cɛgbá eko mla ɔfu nɛhi ŋma ɛgiyi alɔ, gbɔɔ ɛɛ ku alɔ kóō lɔfu je otabɔ lɛ ɔcɛ nōo ma Ujehofa ta, lɛyikwu unwalu duuma nōo yɔ i ya kóō lɔnɔ tu ɔ ō gba Ujehofa ɛ̄gbā kpɔ a. Amáŋ mla otabɔ ku Alelekwu Ihɔ ku Ujehofa, Ubáyíbu, mla aɔkpá nɛ ɔwa ku alɔ gē ya a, alɔ lɔfu ta uwa abɔ ya ku ɛma ku uwa mla Ujehofa kóō lɔfu. (Uróm 15:1) Ɛgɛnyá nɛ alɔ gáā ya ɛnyā a? Ɔnyakwɔcɛ ku ujɔ éyi nōo jikoko ipu ɛlā Ɔwɔico a kahinii: “Ɛyinɛhi ku uwa nōo le miya ō gba Ujehofa ɛ̄gbā kpɔ a, géē cɛgbá kéē ya oklɔcɛ ku Ubáyíbu mla uwa kpɔ.” * Ɔdaŋ ka é da uwɔ ku a klɔcɛ ku Ubáyíbu mla oduuma ku uwa, a cika ō cɛ mla eeye, ɔdaŋ ku a ya ɔ gla. Ɔnyakwɔcɛ ku ujɔ ɔɔma klla kahinii: “Ɔyinɛ alɔ duuma nōo gáā ya oklɔcɛ ɔɔma cika ō wɛ ɛnɛɛnɛ ɔya ku nu. Ɔcɛ nɛ ɔcɛ ɔɔma lɔfu kpɔtuce ɔ klla ka ɔtu ku nu lɛ ɔ gla.”
EEYE IPU ƆKPANCO MƐMLA ƐCƐ
16. Ɛgɛnyá nɛ alɔ jé ku aalelekwu otɛhɔ ku Ujehofa géē ta alɔ abɔ a?
16 Ó lɛ ocabɔ alɛwa nōo mafu ku aalelekwu otɛhɔ ku Ujehofa yɔ i ta alɔ abɔ, o ya ɛɛ ku alɔ má ācɛ nōo dɔka ō cigbihi wa ɛgiyi Ujehofa a. (Mafú 14:6) Ocabɔ mafu, ɔyinɛ alɔ nɔnyilɔ Usilvio ŋma Ecuador nōo lɛ abɔ ci ɛ̄gbā ō gba ku Ujehofa a, gbɔɔkɔ lɛ Ujehofa kóō ta ɔcɛ éyi ɛhɔ fu ɔ, nōo géē ta ɔ abɔ cigbihi wa ipu ujɔ a. Abɔ ó yɔ i gbɔɔkɔ a, é lɛ abɔ gbɔɔ ɔwɛ ɔlɛ nu. Anyakwɔcɛ ku ujɔ ɛpa nɛ. Abɔ é wa a, é gweeye ō je otabɔ lɛ ɔ kōo cigbihi wa ɛgiyi Ujehofa.
17. Ɛgɛnyá nɛ ɔtu gáā ya alɔ lɛ, eko duuma nɛ alɔ je otabɔ lɛ ācɛ nōo ma Ujehofa ta a?
17 Alɔ géē lɛ eeye nɛhi, ɔdaŋ ku alɔ ta ācɛ nōo ma Ujehofa ta a abɔ kéē cigbihi wa ɛgiyi nu. Usalvador, ɔcɛ ō gbɔbu ɔna ō ta éyi, nōo gē ya ɛnɛɛnɛ ɔfu ō je otabɔ lɛ ācɛ nōo lɛ abɔ ci ɛ̄gbā ō gba ku Ujehofa a kahinii: “Ɔdaŋ ku um gbɛla lɛyikwu ācɛ nōo ma Ujehofa ta nōo cigbihi wa a, agije gē hɛ um eyī ohigbu eeye nōo wɛ omoomu ɔtu ku um a. N gweeye nɛhi ku um yuklɔ mla Ujehofa ō je otabɔ lɛ ɔcɛ ɔlɛ éyi kóō bɛɛcɛ ŋma ipu ɛcɛ ku Ebilii wa ipu ujɔ cigbihi.”—Ācot. 20:35.
18. Ɔdi nɛ a cika ō bi ɔtu kpɔcii, ɔdaŋ ku á gē piyatɔha mla ācɛ ɔlɛ Ujehofa gɛ ŋ ma?
18 Ɔdaŋ ku á gē piyatɔha mla ācɛ ɔlɛ Ujehofa gɛ ŋ, kōōcō, le jé kpɔcii ku Ujehofa yihɔtu uwɔ kpɔ. Ó dɔka ku a cigbihi wa ɛgiyi nu. Awɔ a kē cika ō ceyitikwu ku a cigbihi wa ɛgiyi nu. Bɛɛka adā nɛ Ujisɔsi kɛla lɛyikwu ɔ ipu aciije ku nu a, Ujehofa yɔ i gbeyi ku a cigbihi wa ɛgiyi nu, ó kē i gweeye nɛhi ō miyɛ cigbihi wa ɔlɛ.
IJÉ ƆMƐ 103 Shepherds—Gifts in Men
^ par. 5 Ujehofa dɔka ku ācɛ nōó gē nyɔ i tɔɔna amāŋ gā ōjila ku ujɔ gɛ ŋ ma kéē cigbihi wa ɛgiyi nu. Alɔ lɔfu ya ɔdā alɛwa, o ya ɛɛ ku alɔ ta aɛ̄nɛ̄ ō dɔka ō ce igwú ku Ujehofa a ɔtu kwu ɔtu. Ujehofa yɔ i hi uwa igwú kahinii: “Aá le pīyeyī wā ɛgiyí um.” Ipu ikpɛyi ɛlā nyā, alɔ géē kɛla lɛyikwu ɛgɛ nɛ alɔ géē ta uwa abɔ kéē ya ɛnyā a.
^ par. 7 Iye ōhī néē hi ipu ikpɛyi ɛlā nyā i wɛ iye ɔkwɔɔkwɛyi nɛ ācɛ ɔɔma gē lé a ŋ.
^ par. 15 Ōhī ku ācɛ nōo lɛ abɔ ci ɛ̄gbā ō gba ku Ujehofa lɔfu lɛ otabɔ ŋma lɛ ō klɔcɛ ku aya ōhī ku ɔkpá néē hi ku How to Remain in God’s Love a, ó kē lɛ ācɛ ōhī nɛ ó kē lɛ itene ŋma lɛ ō leyi yɛ ɔkpá néē hi ku Draw Close to Jehovah a. Ɔcɛ nōo gē leyi kwu uklɔ ku ɔna ō ta a, lɛ uklɔ ō fu ɔyinɛ alɔ nōo géē ya oklɔcɛ ku Ubáyíbu mla ɔcɛ ɔɔma a.
^ par. 68 ƆDĀ NŌO YƆ I YA IPU IFOTO A: Ayinɛ alɔ nɔnyilɔ ɛyɛɛyɛyi ɛta, je otabɔ lɛ ɔyinɛ alɔ nɔnyilɔ éyi nōo dɔka ō cigbihi wa ɛgiyi Ujehofa a. É ya ɛnyā ŋma lɛ ɔ gwo uwaya fu ɔ, ō mafu lɛ ɔ kē yihɔtu nu, mla ō jahɔ tu ɔ lɔɔlɔhi.
